'O TTARTUFO

’O ttartufo


N’amico me dicette: …Overamente?
Comm’è: ’o ttartufo n un l’hê maje pruvato?…
E gghiammo, me’… e fallo ’stu peccato
ca doppo me ringrazzie certamente!…

E i’ no pe sfizzio, ma p’ ’o fà cuntento
me so’ cunvinto e me ll’ aggio accattato!
Ma nun appena ll’ aggiu spaccuttato
s’è spaso ’nu fetore puzzulente

ca quase quase me sentevo male:
rrobba ’e ce restà sicco addirittura!
Pe ccui nce aggiu refuso… ’o capitale

e se n’è visto bbene ’a spazzatura!
i’ mo vurria sapé: ma cu qua’ core
chesta ddia ’e puzza… m’ ’a chiammano addore?!


11 febbraio 1998
Raffaele Bracale
(dal vol. 'E CCOSE D''O PPASSATO ed. Graus Napoli 2006)