Po’ venarrà l’autunno…

Po’ venarrà l’autunno…


Po’ venarrà l’autunno, ’int’ â scurdata
cu ’e fronne secche e ’o viento p’ ’e ciadine…
e ’o sole senza forza e ll’uva asprinia
ce diciarranno: n’ato anno è passato!

E nuje, nuje – bene mio – cchiú scunsulate
cu ciento acciacche nuove e male ’e rine,
penzanno ’e cuffïà vita e destino
appararrammo ’nu catarro e n’ato…

Ma a chi pigliammo in giro, gioia mia?
A cchi? Si ormaje nuje stammo ’ncopp’â scesa?
N’ata staggiona passa e comme sia

s’accosta ’o juorno ca ce fa ’a surpresa…
Stàmmece lese, oj ne’…, presso è ’o mumento
ca ll’aspirina… nun ce fa cchiú nniente!


marzo 1999
Raffaele Bracale
(dal vol. 'E CCOSE D''O PPASSATO ed. Graus Napoli 2006)