TRAMONTA 'A VITA

Tramonta ’a vita…


’O tiempo sta currenno gioja mia…
chist’anne so’ passate dinto a nniente
e nce simmo truvate, tiene mente,
cchiú de n’affanno e cchiú ’e ’na malatia…

E ’sti ghiurnate so’ ’na pucuntria
e tutte euale, inevitabbilmente…
passano ll’ ore, ll’ attime e ’e mumente
senza ’na cosa nova, comme sia!…

Tramonta ’a vita e, comme ô sole, more
sciulianno, poco â vota, ’a dinto ê vvene…
e n’arricetta tutto: anema e ccore,

speranze e delusione… e pure ’o bbene,
ca i’ t’aggiu vuluto e tu m’hê dato
juorno pe ghiuorne se fa cchiú scagnato!

Raffaele Bracale
(dal vol. 'E CCOSE D''O PPASSATO ed. Graus Napoli 2006)