DOPPO LL'ELEZZIONE

Doppo ll’ elezzione


I

Pe ggrazzia ’e Ddio n’ âmmo veduta ’a fine
è gghiuta ’mpuorto pure st’ elezzione:
cumizzie, sische, manifestazzione,
e, finalmente, tutta st’ ammuina

s’è ’nchiusa cu taralle e falanghina…
Ma mo se fanno ’e cunte: l’ addizzione,
’o scorporo, ’e spartenze, ’a divisione
pe vení a ccapo ’e segge e siggiuline,

pe sapé si magna… o se sta diune
e p’ appurà comme è gghiuta ’sta mano
’e chesta scopa, addó nun ce sta uno

ca nun à fatto ’o figlio ’e… bonalana
e à masteriato e quanto! – a mmale e a bbène
p’ accaparrarse ’o posto ’ncopp’ â scena.

II

E stanno tutte cca, cu ll’ uocchie ’a fora,
chi ô tribbunale e chi â prefettura
sbattenno comme a ppisce p’ ’a frittura
(e nun ’e smove manco ’nu… malore)

ognuno a chiaietarse a ore e ore
’na preferenza ca nun è sicura…
pecché – ca va sans dire – sapesse a dduro
perdere ’o posto ca va a ppiso d’ oro!

Giacché, fosse ’o cchiú fesso cunzigliere,
’a suglia corre e corrono ’e denare
e pe puterlo avé chistu piacere

so’ ppronte a ttutto: a se menarse a mmare,
scalà ’e muntagne, passà ’e guaje cchiú nnire,
ma vencerlo ’stu terno, che te crire?

III

E senza differenza: o parlamento
o municipio è ’o stesso! Trase dinto
te ’mbruoglie ’int â ’mbrugliata e si hê vinto
– pure si nun sî bbuono a accucchià niente… –

te salve ’a zuppa, ’o ppane e ’o… steccadente!
Guverno? Opposizzione?… Eh! Astrinto astrinto
vale pe ttutte ll’ articulo quinto!
Per cui la quale, specie si sî uscente

staje llà leso e appezzato a te fà ’e cunte
pe nun farte ’mpruzà quanno se conta…
pecché, tetillo mio, è cchisto ’o punto:

s’abbusca sempe ’na palata o ’a jonta…
E ca faje ’o ggenerale o faje ’o trabbante,
appare ’e fatte tuoje pronti contante!



IV

Po’ nun conta ’o culore: niro o russo
o ggiallo o verde, è tale e cquale ’o stesso!
Chello ca cconta è vesterse da fesso,
lasciarse ’o tre, chiammà bbusso e ribbusso

pure fagliante ’e palo…, fà ’o marfusso
nijà, si attocca, chello c’ hê prumesso,
’mbruglià, sbruglià, scanzarse ’mmiez’ â ressa,
e nun perdere ’e vista maje ’e… filusse!

E restà sempe a ggalla, comme fósse
purtannote ’int’ ê mmane terzo, ll’ asso…
Tanto che te ne fotte?… Tu faje ’a mossa

ma chi se move e nce arrefonne ’a sciassa
è sulo l’ elettore… E sultant’ isso
’o piglia arreto e s’ alloggia ’o… cerisso!
Raffaele Bracale
(dal vol. 'E CCOSE D''O PPASSATO ed. Graus Napoli 2006)