A 'NA CERT'ORA

A ’na cert’ora…


Me so’ stancato d’aspettarte! E Ccristo!
Ma che ce vo’ a metterse ’na vesta
’nu paro ’e scarpe, n’astrignunta ’e busto
e ’nu sciacquaglio â recchia, punto e basta?…

Te muove o no? So’ ’e ddiece e d’ ’a rivista
a st’ora cca, oj ne’ poco ne resta
Ma insomma ch’âmmo ’a fà? Te pare justo
ca ’e ’sti bigliette n’aggio ’a farne craste?…

Nun te ’ntalliarte! Sí! Va bbuono chisto!
’Nce azzecca bbuono ’stu rrusso araosta!
Cacciale ’a fora, sí!… miettele a bbista!…

E allora simmo pronte? Â grazia vosta…
E votta ’e piede mo, ja’ lesta lesta
ca sta levanno mane ggià… l’orchesta!


Raffaele Bracale
(dal vol. 'E CCOSE D''O PPASSATO ed. Graus Napoli 2006)