CALA ’O SIPARIO

CALA ’O SIPARIO


Cala ‘o sipario: ll’ opera è fernuta…
‘a sala se sbacanta poco â vota.
Smonta, ca jammo ‘e pressa… ‘Stu spezzato
miéttelo â parte ‘e dinto… M’ hê capito?

E manco ‘o tempo ‘e dí: Madonna ajuto…
‘e machiniste sciarmano ‘o piazzato,
‘o custumista abboffa e votta areto
pe farse dà ‘e costume e ‘nziva ‘a rota:

Cca ve ‘ntalliate e i’ stongo ‘ncopp’ ô bbrito!
Tengo n’ ata cummeddia e sto’ ‘mpacciato!
Nun ve pozzo aspettà!…. Qua’ terramoto!
È ca tengo premura, e v’ ò precate!

Cala ‘o sipario… N’ urdemu saluto,
‘na sciacquatella ‘e faccia e… addio Petito…
se ‘nzerra ‘o cammarino e cuieto cuieto
torna dint’ ô silenzio ‘stu triato!

…E tale e cquale ahimmé è chesta vita:
‘a stessa pantumima senza mèta…
‘e stessi lluce e ‘a stessa cammenata
chi cchiú, chi meno e senza fà… n’ acuto…

tutte cumparze: tutte scena muta!
E quanno po’ è ‘o mumento destinato,
arronza arme e bagaglie. E ‘o benservito?
‘Na sbattutella ‘e mane e vaje ‘int’ â nota
assieme a ttutte quante ‘e trapassate!
E pure a cchi, pe ssorte, aveva avuta
‘a primma parte, embè che ve credite?,
ll’ attocca tale e cquale ‘a cascia ‘abbete…

Dice: e ‘o ricordo? Addó! Càgnano ‘e mite
e n’ atu primm’ attore è ggià sagliuto
‘ncopp’ a ‘stu palcuscenico appruntato
p’ ‘a sceneggiata nova e, avota avota,

s’ appiccia ‘sta ribbalta … e po’ se stuta
e po’ s’ appiccia ancora… ‘Na tirata,
cu ‘o rrusso ‘nfaccia e ‘ncuollo ‘na crocóta,
‘nu bbisse, quacche sisco e… ite ite

fernesce ‘a bagattella e ‘a tammurriata…
Qua’ primm’attore?! Seh! Quali bbattute
ca lassano ‘nu segno!? Cca, ‘e signato
tenimmo sule ‘e juorne… e ppo’ ‘int’ â mota

va a cunzumarse tutto, una vutata…
Tutto: scenografia, trucco e vestite,
bilance, tire, tròccele e parete
‘e cartapesta, llà – chi à avuto à avuto –

tutto ‘int’ ô ffuoco,… tutte una riuscita…
cupiune e carrettelle ammuntunate
fanno una fine… e ‘o stesso, una caduta,
cumparze e primm’ attore: sott’ ê prete!

Cala ‘o sipario: e cchillo c’ à chiagnuto,
chillo c’ à fatto ‘o bbuffo e ‘o sibbarita,
chi facette l’ Otello e chi ‘A Resata
mo songo tutt’ ‘e stesse… e ‘int’ ô revuoto
nun se capisce chi menava ‘a piota,
annant’ ô spettatore a ffà ‘a sbrasata,
e chi – dint’ a ‘na quinta annascunnuto –
penzava a suggerí, sciuscianno areto.

Nun se capisce e cu ‘a stessa muneta
simmo pavate tutte: ‘a stessa quota
ce attocca a ttutte quante… ‘a stessa ggita
‘nu ddio ‘e tenore e ‘na voce sfiatata!

E ‘o munno scorda ‘o masto e chi à servito,
chi s’ è miso cu ‘a mazza e chi à abbuzzato,
chi à fatto ‘o spallettone e s’ è creduto
‘e tené tuttu quante dint’ ê ddete!

S’ ‘e scorda: t’ ‘o dich’ io! Quanno se stuta
chesta ribbalta lloco, è gghiuto acito
chello c’ hê fatto hê fatto… e ‘int’ a unu ruoto
carne ‘e crapetto e ccarna mmacenata!…

E vale ‘a pena ‘e farse vení ‘e mote
pe metterse ‘ntusiello e ffà ‘a sfilata,
saglí ‘ncopp’ a ‘nu scanno e ddí:” Sentite!…
Vuje state sotto a mme e llà restate!”… !?

Nun vale ‘a pena!… No!… Giacché, cernuta
tutt’ ‘a farina bbuono, ‘e chesta vita
ne resta poco o niente, ‘sti mmazzate
p’essere sempe primme, addó 'appujate?

Addó appujate tutta ‘sta muféta
si è sulamente n’ opera ‘e triato?
Raffaele Bracale
(dal vol. 'E CCOSE D''O PPASSATO ed. Graus Napoli 2006)