E TE PAREVA CA…

E TE PAREVA CA…
E te pareva ca…doppo ô fatto ‘e Totti, ca aveva buttizzato (istigato) ê tifuse rumaniste e doppo d’ ‘o bburdello (cu mmazzate, curtellate e fferite) succieso doppo â partita Lazio – Roma, te pareva ca nun ferneva a tarallucce e vvino e ‘a Roma (‘mmece ‘e avé ddoje o tre ghiurnate ‘e squalifica d’ ‘o campo e tre o quatte punte ‘e penalizzazzione in classifica…pe responzabbilità uggettiva),te pareva ca ’a Roma nun se n’asceva libbera e ffranca comme a ccicero ‘ncopp’â cucchiara?...
Po diceno ca nun esiste ‘a camurría d’ ‘a suggità ‘e Rosella Sensi!... Ma jate a arrubbà dint’ ê cchiesie! Che paese poco serio ch’è cchisto! Fosse succieso a Nnapule chello ca succedette a Rroma, ô mminimo, ô mminimo ce ammullavano quatto jurnate ‘e squalifica d’ ‘o campo, cinche o seje punte ‘e penalizzazzione in classifica e ‘o divieto d’ ‘e trasferte ‘nzino â fine d’ ‘o campiunato…
Ma è succieso a Rroma e allora è ccosa ‘e niente, e se ‘nzerrano uocchie, vocche e rrecchie: tanto ‘a Roma à dda vencere ‘o campiunato pe fa dispietto a Mou ca è antipatico a ttutte quante e a Moratti… ca è fesso e s’ à dda tène ‘a posta o si no se ‘ncazzano chille d’ ‘a Juventús, ca cu chille d’ ‘a Roma ‘a cumannano dint’ ô Palazzo! Tenesse ‘a salute e ‘e denare pe farlo, cagnasse paese e me ne jesse â Svizzera o ‘nTurchia!
Raffaele Bracale