‘A SCUPERTA ‘E LL’ACQUA CAVERA!
Finalmente se songo decise a nn’ ‘o caccià a cauce ‘nculo!
Tanto ce vuleva a ffà ‘a scuperta ‘e ll’acqua cavera, a capí cioè ca Luciano Moggi steva a ccapo ‘e n’ urganizzazzione ca guvernava e decideva ‘ncoppa a ttutto ‘o pallone nazziunale, n’urganizzazzione cu ttanto n’ elenco d’arbitre cuntrullate ‘a ll'ex d.g. d’ ‘a Juventús? Tanto ce vuleva a s’accorgere ca ce stevano tanti telefonine riservate pe cuntattà ‘e tirettore ‘e cara? Tanto ce vuleva a s’accorgere d’ ‘o sistema ausato pe stabbilí ‘e ccarriere d’’e tirettore ‘e cara ‘nbase a ccomme se fossero cumpurtate arbitranno ‘e partite d’ ‘a Juventús o ‘e ati squatre ca erano «rrobba » ‘e Moggi? Finalmente però se songo decise a nn’ ‘o caccià a cauce ‘nculo e Luciano Moggi è stato finalmente ratïato ‘a ògne ffunzione dô pallone taliano; mo nun putarrà manco jí a scupà ‘nterra dint’ ê spugliatoie d’ ‘a juventús, ‘e ll’ Atalanta (ca comme tutte sanno è ‘na squatra abbaccata cu ‘a Juventús), d’ ‘o Messina o ‘e quacch’ata squatra taliana«rrobba soja »! Nun è stata n’idea ‘e ll’urdemo pretore ‘e ‘nu paisiello scanusciuto â carta giugrafica…, gnernò! L’ à stabbilito ‘a Corte ‘e Justizia d’ ‘a Federcalcio (danno risposta ô quesito ‘nterpretativo d’ ‘o presidente federale Giancarlo Abete) precisanno, ca «la preclusione da ogni rango o categoria debba ritenersi implicita come effetto ex lege» doppo ‘a cundanna p’ ‘e fatte ‘e Calciopoli. Ma però p’ arrivà a cchesto, ca po nun suddisfa pe nniente, pecché si ddoje e ddoje fanno ancòra quatto e nno tre e mmiezo s’avessero ‘a revocà tutte, ma proprio tutte!, ‘e scudette vinciute d’ ‘a juventús quanno Moggi ‘a cummannava e faceva ‘o mammasantissima…., p’ arrivà a cchesto c’ è vuluto ‘o memoriale d’ ‘a bonanema ‘e Giacinto Facchetti (‘na serie ‘e fuoglie ‘e mana soja) cunzignato lunnerí passato, dô figlio Gianfelice ê p.m. d’ ‘o pruciesso ‘e Calciopoli Giuseppe Narducci e Stefano Capuano. C’è vuluto ‘o memoriale quanno tutte ‘o ssapevano e nun ce vuleva ‘a zingara p’ ‘o ‘ndivinà ca ‘o mammasantissima Moggi pe ffà ‘e ‘mpicce suoje a ffavore d’ ‘a juventús se serveva ‘e ‘nu certo «De Santis ca era ‘a mana longa ‘e Moggi dint’ â CAN».Pe nun dicere po d’ ‘e ritiri ‘e ll’arbitri a Coverciano e de tutto l’elenco luongo ‘e arbitri ca stevano dint’ ô ggiro ‘e Moggi. Lassammo stà ‘o fatto ca dint’ ê dichiarazzione d’ ‘o figlio ‘e Facchetti, sempe parlanno d’ ‘e documente scritte dô pate, ce stessero ati riferimente a ‘nu certo Mariano Fabiani, perzona ‘e Moggi, ma nun ce scurdammo d’ ‘o riferimento ê disignature (ca nun so’ cchille ca fanno ‘e fumette, ma chille ca decidono qua’ arbitro mannà a diriggere ‘e ppartite…) Bergamo e Pairetto, nun ce scurdammo d’ ‘o Messina comme squatra«rrobba ‘e ll’ex diriggente janco e nniro » e nun ce scurdammo ‘e tanti ati fatte capitate diverze anne primma, tutte cose ca dimustrassero chiaramente ca ‘o sistema ‘e mariuliggio jeva annante ‘a paricchiu tiempo. E allora? Allora pe ffà justizzia, ma chella vera…,senza aizà póvera e senza fa ‘a scuperta ‘e ll’acqua cavera, nun abbasta avé ratïato a Mmoggi, s’avessero ‘a revocà tutte, ma proprio tutte (no uno e dduje…) ‘e scutetti ca ‘a juventús s’è arrubbate dinto a ll’urdeme trent’anne e s’avesse ratià ‘a società juventús dê campiunate ‘e serie A, B etc. e custringerla a accummincià dô capo, partenno dâ promozzione, ma cagnammo nomme e mmaglia pecché « ‘o nomme d’ ‘a juventús» e « ‘a maglia janca e nnera » so’ sputtanate pe ssempe e nun s’ammeretano cchiú ‘e se fa vedé ‘ncopp’ê campe ‘e serie A, B etc.!
E sperammo proprio ca primma ‘e primma, primma ‘e subbeto quacche Corte federale me facesse arrivà chesta bbella nutizzia!
Raffaele Bracale