DOPPO NAPOLI-UTRECTH 0 A 0

Carissimo Presidente don Aurelione, me permiette ca te dongo ‘o ttu e ca te parlo chiaro? Sí? Grazzie assaje!
Avive ditto, dopo d’ ‘a partita cu ‘o Bbari, ca avimmo ‘a aspettà pe ghiudicà, allimmeno 6 o 7 partite...; Bari e Utrecht t’ ànno fatto divertí? A mme no e songo passate, e si nun avimmo perzo è stato sulo per pura furtuna e pe duje o tre miracule ‘e De Sanctis, ca ‘mmece ajeressera à fatto ddoje o tre puttanate! Aspettammo ‘e prossime... Dimme ‘na cosa a mme: ‘a difesa a che livello ‘a vulimmo mettere?
Nun parlammo ‘e Europa o ‘e serie A!.....DiciMmo a livello ‘e serie B a vulé essere tifuse?
Non hê vuluto accattà e vvennere lla addó ce servevano rinforze, anze t’hê vuluto levà a quaccheduno cu ‘e piede bbuone (Bogliacino, Datolo), a cchille cu carattere forza e bbona vuluntà (Rinaudo, Denis, Pià) pe te tenere ‘e vuote a perdere comme a P. Cannavaro o p’accattà a chi è vviecchio e ‘ntamato ‘ncuorpo (Lucarelli ca doppo ‘nu quarto d’ora ggià steva cu ‘o denucchio ‘mmano! E mmo stammo vedenno ‘sta famosa bella fisionomia d’ ‘o nuovo Napule vuluto ‘a te, Bi(d)oncino e Don Mazzarri ... ‘A qualità primMa ‘E tutto....Seeeeeeeeeeeeeeeeh!
Esaminammo ‘nu poco:
Chille cu Rejia so’ state cinche anne sprecate! Reja,ca nun teneva carattere, era Sempe accondiscennente ê "crapcce" ‘e Marino, e se limitava a ggestí ll’uommene ca lle venevano affibbiate, senza maje aumentarle ‘e valore! Certo ca ‘a vita soja sportiva nun ll’aveva cuncesso cumpagne ‘e classe nè tecnici ‘e valore pirciò nun teneva valore ‘a trasferí! Era però assaje onesto ô punto ‘e definí cuntratte ‘e fatica d’ ‘a durata ‘e n’anno sulamente.Marino faceva cuntratte ‘e cinche, seje anne cu ‘o beneplacito d’ ‘o presidente "nuvellino". E purtaje ‘a chesta via paricchie meze tacche. Ce ne ammullajeno pacchi a Pierpaolo e quaccheduno ‘o tenimmo ancóra (Cannavaro, Blasi)!
Doppo ati dduje anne cu Donadoni e Mazzarri nun tenimmo uno, uno sulo, tra ‘e jucature,ca avesse capito ca ‘o pallone è ‘nu juoco cullettivo (Lavezzi e Gargano), nun tenimmo a ‘nu jucatore ( avessero ‘a essere Maggio e Dossena....,ma chi t’ ‘e ddà!) capace ‘e fà ‘nu crosso ‘a fondo campo e stammo sempe aspettanno ‘o ritorno ‘e MarekiaroHamsik dô Suddafrica. Pe nun dicere po ca nun ce sta chi è ccacchio ‘e tirà ‘na punizzione comme si deve o fà ‘na rimessa laterale senza regalà la palla ê nemice! Pe carità, presidè nun farme parlà d’ ‘e calci d'angolo.Quase sempe so’ ‘nu passaggio ê purtiere o ô mmassimo tutte spiuvente muolle muolle ‘ncopp’ô dischetto d’ ‘o ricore, e so’ facilmente respinte dê difenzore! ‘Nzomma presidè, comme stanno ‘e ccose aggio paura ca ‘a ll’ Europa ce ne cacciano subbeto a sische e pernacchie e ‘ncampiunato si ce arrivammo a salvà nun ce piazzammo meglio d’ ‘o decimo posto!
Comunque nun voglio fà ‘a seccia: ‘a nave cammina e ‘a fava se coce.... speriamo bbene! Ma è tosta, presidè, è tosta assaje!
Brak