CAGLIARI – NAPOLI 10.11.10 – 0 A 1 **LL’AGGIU VISTA ACCUSSÍ

CAGLIARI – NAPOLI 10.11.10 – 0 A 1
LL’AGGIU VISTA ACCUSSÍ
Guagliú nun me firo; sto’ cchino ‘e ‘nfruenza e vaco annante a bbotte d’ efferalganne (visto ca p’ati mutive nun me pozzo piglià ato...). Pe ccuje nun me sprellongo ( mi dilungo) e dditto ca sto’ cu ‘o core dint’ô zzuccaro doppo d’ ‘a vittoria
d’ ajeressera a ll’urdemu siconno ô sant’Elia ‘e Cagliare, vittoria ca doppo tantu tiempo ce à permiso ‘e farle agliottere a Cellino chillu Bastarde! ca ce cunzignaje a nnuje napulitane, vittoria ca p’ ‘o mumento ce cunzente ‘e stà – ‘nclassifica – ‘a copp’â juventussa, ô terzo posto a dduje punte dô Milanno, primmo, ringrazziato ‘o Cesena ca à fermata ‘a Lazzio ‘e Reja, passo subbeto ê ppaggelle:
DE SANCTIS 6 – Pe cchello ca se vedette, ‘o pirata avesse pututo pure starsene â casa;partita senza prubbleme, tranne ‘nu passaggio arreto ‘e Santacroce... ‘O Cagliari nun scummudaje quase maje!
SANTACROCE 6 – ‘Nu passaggio ‘nfelice p’ ‘o purtiere, ma p’ ‘o riesto lassaje ‘ntravvedé ‘a velocità e ll’anticipo d’ ‘e tiempe bbelle!
(Dô15′ s.t. CAMPAGNARO 6,5 – Trasette (tu vide ‘nu poco quanto è bbello Parigge...) e fuje custretto a ffà ll’attaccante, ma ce pruvaje nfino a ll’urdimo.)
CANNAVARO 5,5 –Mantenette a Matri senza fà ggrossi puttanate, ma quacche vvote fuje, ô ssolito!, ‘nu retecone arresecato... (incerto e rischioso)
ARONICA 5,5 – Sbaculiaje (vacillò) sulo ‘nu pare ‘e vote; nun facette ggrossi fessarie, ma quacche vvote ce facette vení ‘o friddo ‘ncuollo cu ccierti chiusure azzardate e pe ffurtuna nosta se nn’ascette comme a ccicero ‘ncopp’â cucchiara quanno, sbrunzuliato ‘a n’avverzario, tuzzaje scasualmente ‘o pallone cu ‘nu vraccio !
MAGGIO 5 – Nun è cchiú Mmaggio ‘e ll’ anno passato, e chi sa si ‘o ssarrà maje cchiú; ajere se vedette ca proprio nun ce ‘a faceva a guvernà ‘a curzia ‘e dritta!
YEBDA 6,5 – Tanta sustanza! Fuje ppure pe cchello ca facette ll’algerino, turzuto e ‘nsalute, ca nun se nutaje ll’ommo ‘e cchiú d’ ‘a mediana d’ ‘o Cagliare.
GARGANO 6,5 – Pe tutto ‘o primmo tempo currette a capa sotta smestanno (spingendo) assaje; po ô siconno tempo s’appannaje, ma cumplessivamente ‘a mana data ô centrocampo fuje majateca (notevole).
DOSSENA 5,5 –Forze fisicamente sta ‘nu poco ‘nguajato e lle manca ‘a cundizzione nicessaria, ma ajere smestaje poco e nniente e lassaje ‘o campo primma d’ ‘o 45°
(Dô42° ZUNIGA 5 – Farlo jucà a mancina è ‘na jastemma, e ajeressera praticamente nun ce stette.)
SOSA 6 – Friccecariello assaje cchiú d’ati partite. Cresce cu ‘o ppassà d’ ‘e ppartite e ajere se vedette.
(‘A ll’ 11° s.t. CAVANI 7 – Praticamente ‘a quanno trasette ‘ncampo, pe ffà paura a ll’isulane, nun se vedette quase maje, però proprio â fine avviaje a mmestiere ‘o caputamiento ‘e fronte e mannaje a ssignà a Lavezzi, ca nun se facette prijà.)
HAMSIK 5,5 - Qualcuno ll’êsse visto ‘mmiez’ ô campo? Accumparette sulo ‘nu paro ‘e vote; no, nun ce simmo! Nun se po’ tené ‘nu jucatore ca joca sí e nno cumplessivamente diece minute e dda ô viento pe cciento ‘e chello ca po’ ffà! O s’ à dd’ arrepusà o à dda avé ‘na tirata ‘e recchie!
LAVEZZI 7,5 –Fuje ll’unico ca currette pe tutt’ ‘a partita comme a ‘nu ‘ndemuniato e ppo â fine mettette ‘o mierco (il sigillo) â partita cu ‘nu contropiede straurdinario, comme si nun avesse jucato 95 minuti.
All. MAZZARRI 7 – ‘O Napoli d’ ajeressera non fuje ‘nu granchè, ma ‘o voto è ammeretato p’avé cassato, vincenno a Cagliare, ‘nu ‘nciarmo (tabú) ca durava ‘a tropp’ anne. E pure pe ‘na classifica ca è ssempe cchiú ‘mportante e ca p’ ‘o mumento ce cunzente ‘e stà ‘a copp’â juventussa! E nun mettimmo limmete â Pruvvidenza!
Arbitro Rocchi 6 – Meza cazetta comme a ttutte ‘e sischette italiane, ‘stu commerciante (nun se sape ‘e che...) fiorentino era stato mannato pe spezzà ‘e passe ô Napule. Ma nun lle riuscette! ‘A partita fuje tosta e ll’isulane mazziulavano, cu ‘o permesso ‘e ll’arbitro, senza pietà ê napulitane e isso, senza tené ‘o curaggio nicessario ‘e piglià pruvvedimente, pigliaje ‘o pallottoliere dispenzanno quacche cartellino “a nnota ‘e lavannara” (voglio dicere addizziunanno ‘e falle.) Quacche decisione nun se capette e ‘o Cagliari protestaje pure p’ ‘o ricupero forze esaggerato, ma pe nnuje meglio accussí!
Ce sentimmo llunnerí ca vene speranno ca me sentesse meglio e ca dummeneca jessemo a ‘nturzà ‘e mmole a Rreja e â Lazzio!
Brak