NAPOLI – LECCE 19.12.10 1 A 0! LL’AGGIU VISTA ACCUSSÍ

NAPOLI – LECCE 19.12.10 1 A 0!
LL’AGGIU VISTA ACCUSSÍ

Che se po’ dicere guagliú? Sulo ca ajere êtt’ ‘a mettere ‘nzieme ‘a cuntentezza ‘e vencere ‘na partita all’urdimu siconno,(doppo d’avé sudato friddo ddoje vote e pe ffurtuna ‘na vota ce penzaje De Sanctis e n’ ata vota ‘o surdatiello nuosto...) cu ‘arraggia ‘e tènere n’allenatore ca ancòra ‘na vota dimostraje ‘e farsela sotto e ‘e nun tené curaggio, mettenno ‘ncampo ‘nu Napule ca ô primmo tempo fuje euale a cchillo ‘e contro ô Steaua quanno s’èrano ggià visto ‘o desasío (il disagio) di Zuniga e Dossena eppure à fatto ‘e stesse errore tale e cquale,’nu primmo tempo jettato a ll’aria e ppo ‘nu siconno tempo cchiú sistimato cu ‘nu quarto d’ora finale fatto cu ‘o core di cuore.’O core d’ ‘o Napule è granne,comme è ggranne ‘a sciorta ‘e Mazzarri, ma certamente isso perzunalmente nun s’ammereta ‘o posto ca tène ‘o Napule.Criticatemi pure: stongo cuntento, ma arraggiato pe comme s’è vinciuto,contro tenévamo ‘o Lecce, no ‘o Barcellona e pe ppoco nun perdevamo! Mazzarri à dda appiccià ddoje cannele: una a Grava e n’ata a Cavani; si ‘o Napoli è ancora siconno è grazzie a lloro.Mazzarri tène ‘o bbuttu vizzio d’ essere attaccato sempe ê stessi jucature. Oramaje nun se cóntano cchiú ‘e ppartite dicise odoppo d’ ‘o 90°. Cagliari, Palermo, Steaua (andata e ritorno), Lecce. Sempe cu ll’intervente dicisivo ‘e Cavani (dduje assiste e ttre golle e scusate se è ppoco). Però nun se po gghí annante sempe accussí! Ajere sultanto grazzie a ‘nu salvataggio ‘a fine d’ ‘o munno(strepitoso) ‘e Grava ‘ncopp’ a linia nun ce ànno fatto ‘a cucca (non abbiamo subíto una beffa). Si, sperammo maje,corna facenno se fa male Cavani ‘a veco overo brutta!‘Na partita chella d’ajere nun adatta ê malate ‘e core, ma fernuta cu ‘nu regalo d’ ‘o Bbammeniello-Cavani ca m’à fatto addecrià. Cumplessivamente po ‘a 17ª jurnata ‘e serie A à salutato ‘o duimileddiece e à mannato ‘e squatre a ffà festa nfino â Pifania d’ ‘o duimilaunnece in vacanza cu ‘na ponta d’ ‘a classifica ‘ndicisa quantu maje; ‘o Milanno tène tre ppunte ‘e vantaggio ‘ncopp’ a Napule e Lazzio, ‘a juventussa è staccata ‘e cinche pusizzione. Ma sempe parlanno ‘e situazzione nun adatte ê malate ‘e core, âmm’ ‘a dicere ca ‘a classifica s’è sistimata accussí all’urdimissime minute nfra ll'89° e ‘o 93°! Cumminfatte dint’ô finale è arrivato ‘o gollo a mmazzo (autogollo) d’ ‘a vittoria d’ ‘a Lazzio ‘ncuollo a ll'Udinese, ô 93° ‘o gollo – cu ‘na ‘mbomma ‘a cchiú ‘e trenta metre – d’ ‘o zengariello Cavani ca rijalaje ‘a vittoria ê napulitane e ssempe cchiú o meno ô 93° ‘o gollo ‘e Pellissièrro ca cunzentette ô Chievo ‘e pariggià cu ‘a juventussa! E nun ce scurdammo ‘e dicere grazie â Roma ch’ êva fermato ‘o Milannno dinto a ll'anticipo; accussí mo Napule e Lazzio (ma spicialmente ‘o Napule...) se ponno fà ‘nu scicco Natale e ‘nu divertente urdemo ‘e ll’anno scialannose cu pizza ‘e scarole, vermicielle a vvongole,mussillo ‘e baccalà fritto, capitone limone e llauro, spicula a ll’acqua pazza, vruoccole barise, ‘nzalata ‘e rinforzo, scioccele assurtite, struffole, stringhette, roccocò,lettere, mustacciuole e pasta riale, tutto arracquato cu Fiano, Falanghina, Greco ‘e Tufo, Asprinio d’Averza e Code ‘e Volpe Lacrima Christi e aspettanno chello ca lle porta ‘a Bbefana, senza mettere lemmete â Pruvverenzia!
Passammo ê ppaggelle:
DE SANCTIS 7,5 Ll'intervento ‘ncopp’ a Piatti fuje cchiú dicisivo ca maje: salvaje ‘o risultato; p’ ‘o riesto nurmale amministrazione. Ma comunque fuje assenziale (determinante).
SANTACROCE 7: tante cose bbone, ‘na granne partita; a ccierti mumente me parette ‘e vedé ‘o Santacroce ca tutte vulessemo vedé! sgrigno(grinta), anticipi e putenza fisica, comme ê tiempe bbelle ‘e ‘na vota! Sperammo.

CRIBARI 8: Pulito e ssicuro, specialmente ‘e capa nun sbagliaje niente! Partecipaje ô finale travulgente, sguarnenno definitivamente ma, giustamente, ‘a difesa, e poco ce mancaje ca nun facesse gollo.

GRAVA 9: ‘Nsuperabile ‘nfase difenziva, sbagliaje quacche appoggio, ma chillu salvataggio ‘ncopp’â linia jettanno fora ‘na palla destinata â rezza vale quanto a ‘nu un gollo. ‘Ncoppa a cchistu surdatiello se po’ sempe cuntà! assenziale (determinante)bisso.

MAGGIO 6,5: ‘A corza soja è turnata chella d’ ‘e tiempe d'oro e soprattutto ‘nfase difenziva ‘a parta soja ‘a facette e ccomme! Certo ê vvote ‘a cunzistenza fisica nun abbastaje e difficilmente riuscette a zumpà a ll’avverzario ‘e rimpetto o a ffà ‘nu crosso decente... ô finale venette ‘mpiacato comme difenzore centrale, e riuscette a ffà cierti bbelli diagunale assenziale! ‘E ‘na manera o ‘e n’ata, mo ca s’è acchianato cu ‘a capa, ce se po’ fidà d’ ‘o ggiuvinotto! E menu male

GARGANO 5: Nun passaje maje ‘o pallone, perdennolo spisso. Arresecaje d’essere jettato â via ‘e fora doppo d’essere stato ggià ammunito e rialaje ‘nu pallone a gghí arreto ê liccise ca pe poco nun signajeno!
YEBDA 5,5: Jette bbuono ô primmo tempo; po ô siconno se vedette poco e nniente e spisso spisso tuzzaje ‘nfacci’ ô muro ‘e ll’avverzarie facenno desiderà ‘a presenza ‘e Pazienza... P’ ‘a verità è ‘nu bbellu cummò cu ‘o specchio e va bbuono quanno se tratta ‘e rompere..., ma no cchiú ‘e chesto!

DOSSENA 5,5: ‘A chiena e ‘a vacante, ma cchiú vacante ca chiena, comme spisso lle succede urdimamente. Spisso prisente ‘ncopp’â curzia ‘e mancina pe dà ‘na mana all’azzione d’attacco, nun lle riuscette maje d’essere priciso. I’ dico ca fosse meglio n’incurzione mancante, ma quacche crosso, decente ‘e cchiú!
ZUNIGA 5: Mazzarrise ‘nfessette a farle fà n’ata vota ‘o trecquartista, ô posto ‘e Sosa e manco ‘sta vota convincette: se move sempe comme a llaterale ‘e mestiere..., ma pe ffà ‘o trecquartista s’à dda tènere n’atu passo e soprattutto nun ce s’à dda fessià cuntinuamente a ffà dribblinghe inutile... Ajere cantaje pe tutt’ ‘o tiempo a meza voce steccanno spisso e sulo ‘na vota tentaje ‘e fà n’acuto, ma ‘o purtiere liccese ll’appilaje ‘a vocca... p’ ‘o riesto facette sulo casino!
HAMSIK 6,5: Sprecaje, ô siconno tempo, n'uccasione d'oro, ma ‘a partita soja a ttuttu campo fuje ‘mpurtante assaje dimustranno ca è un centrocampista ‘e livello europeo, cchiú ammaturo, cchiú ttuosto, cchiú fforte ‘nsomma.È n’ommo squatra!
CAVANI 10: E nun aggio esaggerato!’Nu gollo comme a cchillo d’ajere (‘o nummero diece d’ ‘o zengariello nuosto) ce po’ arricurdà quaccuno che a Napoli chistu nummero ‘o purtava cusuto ‘ncopp’â maglietta. Ajere jucaje assaje pochi pallune e pareva ca stesse fora d’ ‘o juoco, justamente stanco. E invece no! ‘N’ata vota ô 93°, ‘nu golllo ‘mpressiunante pe pricisione e putenza; nun ce vulevamo credere tant’era stato bbello... Cielo quant’ è fforte Cavani… Coppola ê ddenocchie (Inchiniamoci)!….
SOSA 5,5: Quanno trasette quase nisciuno se ne accurgette. Flemmatico, senza cunzistenza... e senza zuco, ‘A tecnica soja,che chiaramente superiore a chella d’ ‘a media, nun avastaje e nun avasta . Ce à dda mettere coccosa ‘e cchiú; i’ ce cuntino a credere e sso’ certo ca ce farrà stravedé (sbalordire).
DUMITRU 5: Se continua a dicere ca ‘stu guaglione tène stoffa: i’ ne vulesse vedé ‘o mmacare ‘nu pare ‘e metre primma d’ ‘a fine d’’o campiunato!
VITALE 5,5 Trasette troppo tarde! Nun riuscette a ddà ‘o cagno ‘e marcia; abburdante (arrembante) ma, casinista(confusionario).

Mazzarri 6,5: Cagnaje pure ‘o modulo ‘ncorza ô siconno tempo;cu tutto ca ce stettero troppe assenze e cu ttutto ca (pe comme ‘a vedette i’) sbagliaje a scegliere cierti pedine (Zuniga, Dossena)o ‘e cagnaje troppo tarde, ‘o Napule sujo vincette cumunque e â fine avette ‘a meglio, comme ggià fatto cu ‘o Genoa e cu ‘o Steaua Culo? Dint’â vita è ssempe quistione ‘e culo: o ‘o tiene o t’ ‘o fanno... È mmeglio si uno ‘o tène!
L’ARBITRO 4 Troppo guaglione, senza perzunalità e nun vedette o vulette vedé ‘nu fallo ‘a cartellino russo ‘ncuollo a Mmaggio!
Cunchiudimmo: Zona Napoli, zona Cavani, zona Mazzarri…Chiammamela comme vulite, ll’impurtante è ca ‘o Napoli segna e vvence n’ ata vota pure si dint’ê minuti ‘e ricupero. Ma nun sulo: ‘nu quarto d’ora, l’ultimo, fatto di attacche furiuse, ê vvote pure sbertecellate (scriteriati), sprunato ‘a ‘nu pubblico eccezziunale, ca comme â squatra nce crede nfino a ll’urdemo... Vittoria grande e ‘mpurtante assaje assaje; onore e tanti tanti auguri â squatra nosta speranno ca doppo d’ ‘a sosta nun s’appresenta ‘ntufata ‘ncuorpo e ffuceta dint’ê ggamme! Naturalmente tanti tanti tanti auguri a ttutte vuje ca tenite ‘a pacienza ‘e leggerme. FORZA NAPOLI, CIUCCIO FA’ TU E ‘O CIELO STRAMALEDICESSE juventussa, atalanta e Lazzio!
Brak