NAPOLI – PALERMO 6.12.2010 1 A 0 LL’AGGIU VISTA ACCUSSÍ

NAPOLI – PALERMO 6.12.2010 1 A 0
LL’AGGIU VISTA ACCUSSÍ

Faccio ‘a scuperta ‘e ll’acqua càvera: ‘a partita d’ajeressera ce dètte ll’ennesima pussibbilità ‘e renderce conto ca ‘a squatra d’ ‘o Napule nun s’arrenne maje primma d’ ‘o tiempo, vincette all’urdimu siconne cu ‘o core ‘ncanna, ma vincette (comm’io avevo prunusticato cu ll’amico Federico, dicennòle: Nun preoccuparte ca vincimmo all’urdimu siconno!) doppo d’avé duminato pe tutto ‘o tiempo, ma senza zuco, ‘nu Palermo casinista (Balzaretti), presuntuoso (Pastore & Miccoli) e manisco (Nocerino) e maje veramente ‘mpartita ca cumunque tutto summato fuje difficile, assaje difficile, e nun puteva essere diverzamente; ma pe furtuna ....quanno se tène ‘na squatra ‘e cumbattente come â nosta, ‘na squatra ca nun s’arrenne maje, tutto è e ffuje pussibbile! Uno a zzero? E uno a zzero, basta ca se vence! Cosicché quanno fuje ô 95° i’ me putette mettere a ccantà cu ‘a capa ‘nfilata dint’ô matinè, pe nun fà scetà a mia moglie: Maggio, sî ttu!/ca st'aria doce vaje prufumanno.../Quanta canzone faje cantá a doje voce!
/Quanta suspire io manno!/Mme faje murmuliá/tutt''e ccanzone amate/pecché tu viene e dice:/"'E 'nnammurate
ànn''a cantá!/"Ànn''a cantá...
/ca pure Ammore/passa e nun more!/E chi à vuluto bbene,
se sente, dint' ê vvéne,/cchiù ardente 'a giuventù:/Maggio sî ttu!
E che ato âmm’ ‘a dicere? Nient’ ato; sulo ca âmm’ angappato n’ata vota ‘a juventussa ch’era juta a ffà ‘a carta ‘e tre a Ccatania E ve pare poco?
Passammo ê ppaggelle:
DE SANCTIS: 6. Maje seriamente ‘mpignato, avett’ ‘a gestí ll’urdinaria amministrazzione e ‘o ffacette senza patème d’anema! Pulito cu ‘e rinvie e ‘mpresa sicura ‘ncopp’ê cornèrre ‘e ll’isulane.

GRAVA: 7. ‘O ‘mpacchettaje e fuje ‘a sanguetta ‘e Miccoli pe tutto ‘o campo e appprima n’ ‘o mannaje luntano dô juoco e ppo addirittura ‘mpanchina! Mancanno Campagnaro fuje isso ‘o ministro d’ ‘a difesa; s’abbarrucaje ‘e fatica (si caricòdi lavoro) e a ll’uccurrenza, accurciaje ‘e distanze pure ‘ncopp’ a Pastore ca comme diceva ‘nu cartiello è valutato 50 meliune (‘O cartiello E SI ‘NU PASTORE VALE CINQUANTA MELIUNE, TUTT’ ‘O PRESEBBIO QUANTO COSTA?). ‘A fine d’ ‘o munno quanno ‘ndiagunale stuppaje, senza fà fallo a Maccarone pronto a fà male. Ammunito, ‘o surdatiello casertano nun ghiucarrà ‘a prossima partita, ma ‘o fallo ca ce sparagnaje ‘na ripartenza periculosa era nicessario!

CANNAVARO: 6-. ‘O Palermo non dette pricise punte ‘e riferimento lla ‘nnante e ‘o capitano culo’echiummo facette ‘o juoco d’ ‘o libbero ‘e ‘na vota radduppianno e ‘nchiudenno ‘nsiconna battuta. Quacche sbavatura cu ‘e lance ‘ncopp’ a ll’esterne, poco pulezzia e poca prisenza quanno se trattaje ‘e jucà ‘e capa...dipennettero d’ ‘o fatto ca tecnicamente è scadente assaje, ma ringrazzianno a dDio, puttanate grosse nun ne facette e pe uno comme a isso è ggià assaje!
ARONICA: 6.Barbaruso (spigoloso) e mesteriante (d’esperienza) ê lemmete (ai limiti) d’ ‘o recolamento ‘ncoppa a Iličičcio ca scigliette ‘o lato suĵo pe ddà ‘na mana â manovra d’ ‘e suoje. Arresecaje gruosso, ma jette a cciammiello, quanno ‘ntervenette cu ‘na sciuliata dinto a ll’area‘ncopp’ a Balzaretti.

MAGGIO: 8 ‘o meglio.Ajeressera turnaje a ffà ‘o Maggio ca mme piace a mme e mettette ‘nchiaro subbeto,(fin dô pprincipio) ca ‘a curzia ‘e dritta è ‘a soja, tutta soja. ‘Nu treno a auta velocità senza soste o fermate facultative sia quanno se trattaje ‘e affunnà sia quanno êtt’ ‘a fà ‘a cerniera senza palla. Balzaretti pruvaje a ‘nzerrà ‘o passaggio a llivello, ma ‘o guaglione ajeressera spenzierato e vulitivo fuje travulgente e nun cunoscette barriere. A ll’urdimu siconno ‘e recupero se truvaje priciso all’appuntamento cu ‘a coincidenza ‘e Cavani e cu tutt’ ‘e ddoje ‘e ccosce menaje dinto ‘o pallone d’ ‘a vittoria strameritata e ppoco ce mancaje ca a Forarotta nun se ne cadesse ‘o san Paolo
p’ ‘o terramoto scatenato dê tifuse. Che bbella cosa!
GARGANO: 5,5. Facette ‘a molla d’ ‘o Napule: arrubbaje e recuperaje tantissimi pallune, pure si po puntualmente sbagliaje ‘e passagge. Allargaje e strignette ‘nmediana: se sganciaje pe dà ‘na mana ‘nfase avanzata e tampunaje ‘e rilance d’ ‘o Palermo.

PAZIENZA: 6,5. Tenette bbuono ‘o campo, appilaje cchiú ‘e ‘nu pertuso, e cuntrullaje Pastore a zzona e facette ripartí ‘o juoco cu aperture pulite e pricise. Cumplessivamente pure si ati vvote era stato cchiú lucente fuje priggevole (prezioso) soprattutto p’ ‘a quantità!
(dô 77° YEBDA: 5,5. Affruntaje troppo a ffriddo ‘a partita sbaglianno ‘ncuntinuazzione ‘a mesura d’ ‘e passagge. ‘Mpruvvisamente po truvaje ‘e mmesure e ammullaje ‘a luntano ‘na chiantella periculosa(un pericoloso fendente) ca ‘mpignaje seriamente ‘o purtiere palermitano).

DOSSENA: 6. Quacche temmeruso (timido)signale ‘ncuraggiante, pure si ll’eccheso d’ ‘o Liverpullo nun fuje ancòra chillo d’inizzio d’anno. Bbuone ‘e traverzune e ‘a scelta ‘e tiempo p’ammuccarse (per inserirsi) ‘e lato; ancòra nun ce simmo p’ ‘a cupertura! ‘Nu tocco ‘e tacco fernette ‘ncopp’ê piede d’ ‘o Pocho ca sciupaje esaggeratamente!
(da ll’84° VITALE: sv. S’ ‘a cavaje bastantamente bbuono dint’ê poche minute avute a disposizzione, soprattutto cu puntuale e pricise radduppiamente. M’aspettavo ‘e cchiú però!)

HAMSIK: 6-. S’ accuntentaje ‘e fà ‘o stritto nicessario, purtanno a termine ‘o prublemino sicco sicco; facette ggirà ‘o pallone e quanno capitaje dètte sustegno ê centrocampiste. S’accentraje, se defilaje, mantenennose sempe dint’â ‘mbrugliata ( nel vivo del gioco ), ma senza n’acuto e senza maje pruvà ll’uno contro a uno. Risultaje dicisiva ‘a futezza (la profondità) pe Cavani ca arrefenette (rifiní) pe Mmaggio.

LAVEZZI: 6- Doppo ‘o periodo ‘e forma eccezziunale, ajeressera fuje ‘o mumento ‘e ‘na liggiera fase calante, ma quanno arapette ‘o ggasse smanettanno fuje ‘o solito muturino ‘ncopp’ô marciappiede, ‘a solita anguilla dint’â vasca d’ ‘e capitune...Trainelle (insidiose) ‘e traiettorie dô funno e sfurtunato ‘nu tiro ‘ndirizzato a ll’angulo vascio, tiro ca p’ ‘o parà Sirigu êtt’ ‘a fà ‘e straurdinarie. Pe gghiella nera, se facette male overamente abbuscannose ‘na distursione â caviglia: capoteco e battagliero provaje pure a rummané ‘ncampo e ce rummanette nfino a cquanno ‘o delore nun ‘o cunzigliaje ‘e ascí. Sempe cchiú ‘o preferito,ll’accumpagnajeno applavuse a scena aperta quanno ascette.
( dô 72° DUMITRU: 6. Se strapurtaje (svariò) pe tutto ‘o fronte d’attacco, scalanno a ddritta e mancina ‘ncoppa a ll’esterno p’ allarià (per allargare) ‘a difesa, s’avasciaje pe piglià palla e fuje prisente dinto a ll’aria ‘e ricore. So’ cunvinto ca ’ncopp’ a ‘stu guaglione ce se po’ cuntà!).

CAVANI: 7,5. ‘Stu zengariello uruguajano à dda essere parente lasco ‘e sant’Antonio ‘e Padova: fuje prisente quase cuntemporaneamente ‘mmiezo, annante e arreto: ‘nu capaglione (una gazzella), ‘na motocicletta, ‘na ciaula, ‘nu farco ca vola …sciglite vuje ‘a parola cchiú adatta pe significà ‘a cupertura tattica ‘a nun credere a tutto campo ‘e ‘stu giuvinotto cu straurdinaria e ‘mpressionante saluta fisica: n’attimo primma ‘o vediveve all’attacco, n’attimo doppo spuntava ‘ndifesa ê spalle ‘e ‘nu palermitano e lle zucava ‘o pallone; Cacarella ‘e Castiellammare, ‘o tràino nun ll’à fatto maje ‘na cosa ‘e chesta! D’ ‘o zengariello ll'assisto a zzuco ‘e caramella p’ ‘o gollo ‘e Maggio. Edinson: tant’oro quanto pesa e pure ‘e cchiú!

MAZZARRI: 6,5. Reggistraje a dduvere ‘o raccordo difesa – centrocampo stuppanno dô principio (arginando sul nascere) ‘a velocità ‘e Miccoli e Pastore nfra ‘e linie. Costringette ‘o cullega palermitano a mettere a squatra rosanera cu ‘nu schema maje aduttato, a specchio d’ ‘o suĵo; liggette a dduvere ‘a partita e andivinaje pure ‘e cagne.
‘O Napule s’ammeretaje tutta ‘a vittoria e ‘o gollo a ll’urdemu siconno è n’atu signale d’ ‘o carattere ‘e Mister Cammisa-janca.
arbitro MORGANTI 3,5 ‘e ‘ncuraggiamiento!
E pure isso ce mancava ‘ncopp’â strata d’ ‘o Napule!; ‘e Ascoli Piceno(‘nformatore d’ ‘e medice:’nzomma piazzista ’e mmedicine e spero pe isso ca faticasse ‘mproprio e nno a gguaglione ‘e quaccheduno, pecché si fatica comme à arbitraje ajeressera, s’ammereta d’essere licenziato ‘ntrunco (per giusta causa)…e s’ammereta ‘e jí a ccercà ‘a llemmosena fora ê cchiesie; scadente assaje , forze ‘o pejo nfra ll’arbitre ca nurmalmente già so’ ‘na fetenzia… Viecchio, granne ,gruosso e gravante, sempe a ccurto d’ussigeno e de sciato, corricchiaje ‘ncopp’ a ll’ova e cieco e surdo ô primmo tempo facette avvedé ca nun era succieso niente quanno Maggio fuje scamazzato sott’ê piere (nun mm’arricordo ‘a chi)a ‘nu metro dâ porta e nun ce dètte ‘o ricore;ô siconno tempo po se pigliaje ‘o ppusilleco (si divertí) affuscanno (agitando) troppi cartelline jalizze contro ê napulitane ca â prossima partita ce custregnono, pe ffà n’asempio, a ffà a mmeno d’ ‘o surdatiello Grava.Pe ffurtuna cecaje bbuono a vvedé ca quanno Cavani passaje a Mmaggio ‘o pallone ca ce facette vencere, nun steva ‘nfuorigioco! Cchiú ‘ngenerale però governaje ‘a partita cchiú cu ‘a mutria (con la grinta) e cu ‘a boona sciorta, ca cu ‘a corza e ll’attenzione. Sarrà pure ‘nternazziunale, ma è n’ arbitro matèleco (pessimo) comme a ttutte ‘e culleghe taliani ‘ncrociati dô Napule; a ccunte fatte, ‘nternazziunale è ssulo n’aggettivo e lle ce vo’ ‘nu sustantivo ca mecco io: fetenzia; ecco: Morganti è ‘na fetenzia ‘nternazziunale! Pe mme ce vonno arbitri prufessionisti e ànn’ ‘a essere tedische o svizzeri! ‘O Napule sta sempe ‘ncredito cu ll’arbitre; De Laurentísso se facesse sèntere dint’ô Palazzo!
Nuje – a siconna ‘e chello ca succede - ce sentimmo nfra ‘na semmana o quinnece juorne.
Staveti bbe’!
Brak