UTRECTH – NAPOLI 02.12.10 – 3 A 3
LL’ AGGIU VISTA ACCUSSÍ
Schirchiato (pazzo) e sfurtunato ‘o Napule d’ajere ssera.Ma pure fesso: è ‘na vita ca vaco dicenno e ‘o ssanno ca chella inutila divisa blu-savoia jettatoria ll’ànno ‘a jettà e nun se ll’ànn’ ‘a mettere cchiú: porta ‘na scalogna futtuta e nun capisco che s’ ‘a mettetero a ffà visto ca ‘a maglia ‘e l’ Utrechetto è ghianca e rrossa e nno azzurra. E cumminfatte ‘o Napule jette súbbeto ‘nvantaggio e me facette allargà ‘o core, po ‘mmece ‘e risolvere ‘a quistione, se ‘nzallanette e ne pigliaje tre; pe furtuna ô siconno tempo adderezzaje ‘a varca pariggianno e addirittura poco mancaje ca nun vincesse centranno ‘o palo cu Cribari. Cavani fuje ‘o salvatutte: tre golle,cumpreso ‘nu ricore (prucurato ‘a Lavezzi) trasfurmato cu ppalla ‘a cca e purtiere a lla!
‘Na partita strana ca se vedette uno‘e tutto: rimpalle a ripetizzione ca ustaculajeno (impedirono) a Lavezzi e a Cavani ‘e purtà ‘a squatra napulitana ‘nvantaggio, n'arbitro ca permettette senza ca ‘o fatto fosse d’ ‘o suĵo ‘na sciarra (rissa) a centrocampo,ll'ammonizzione a De Sanctísso juto pe spàrtere e mmettere pace ca se zucaje ‘nu cartellino jalizzo (giallo). ‘Ntutale nove ‘e cartelline sventagliate (agitati) ‘ncampo.Furtunatamente s’è schiarita ‘a facenna d’ ‘a presenza ‘ncampo ô quinnece ‘e dicembre ‘e Cavani, pur’isso ammunito:po’ essere prisente pecché ‘o zengariello uruguaiano nun è diffidato.’Nconcrusione Utrecht-Napoli fernette 3-3 e mmo ‘o Napule (rummasa ll’unica squatra taliana ancòra ‘ncorza), à dda vencere pe fforza cu ‘o Steaua pe sperà ‘e passà ‘o turno ‘e ll’Europa League. ‘A partita fuje ‘ncredibbile, chiena ‘e surprerse e cagne ‘e scena. ‘E napulitane apprimma arresecajeno ‘e perderla, po ô finale, ‘e vencerla e nun avessero arrubbato niente! . Pazzoteca ‘a partita e cchiú pazzuoteco l’arbitraggio ‘e Iturralde Gonzalezzo, ca nun ce capette quase niente: ô pprincipio s’annascunette ‘o siscariello dint’â sacca e lassaje correre; po accumminciaje a siscà troppo e â fine parette ll’asino ‘mmiez’ê suone mentre ‘e jucature, asciute a chi sî ttu e cchi so’ io, se ‘mparuliavano o se mazziavano.
Passammo ê ppaggelle, va’!
DE SANCTIS: 4,5 ‘Na chiena e ttroppi vvacante;tène ‘ncopp’â cuscienza allimmeno dduje golle; ‘ncopp’ô primmo nun riuscette a capí ca Cribari nun ce ll’avesse fatta a anticipà a ‘o guaglione ulandese e ‘mmece ‘e se menà ‘nterra ‘mmiez’ê piere e pigliarse ‘o pallone, ascette cuoveto-cuoveto (lemme lemme) accuvato ‘nterra a mmane aperte, senza fà niente, manco ll’uovo ca, pe ccomme s’era miso puteva fà...; ‘ncopp’â capata d’ ‘o tre a uno, restaje a gguardà senza ascí comme avesse avuto ‘a fà visto aró steva ‘o jucatore ulandese; ‘ncopp’ô ricore po se muvette, comme nun è abbituato, primma d’ ‘o tiro e se facette fessià cchiú facilmente. Sulo quacche bbuono intervento pe ttroppi fessarie comme a cchella dint’ô finale quanno rimettenno ‘o pallone ‘e mana ‘o menaje ‘ncapa a n’avverzario libbero e ffranco e me facette scennere ‘o friddo p’ ‘e rine!
GRAVA: 5-. Êsse pututo stregnere ‘ncopp’â discesa ‘e ll’esterno ‘ e ll’Utrechto dint’ a ll’azzione d’ ‘o primmo gollo, ma restaje a gguardà... Cumplessivamente lle mancajeno ll’ardetezza(vivacità) e ‘a brillantezza d’ ‘e juorne bbelle p’anticipà ‘e jucature janco e rrusse. Alternaje precise chiusure pricise a ripartenze affannose e annegliate (fumose).
Dô (dal) 63° MAGGIO: 5,5. primma entratura, guardateve ‘e ssacche: trasette, sbagliaje ‘e primme pallune, sciuliaje e cunzentette a ll’ulandese ‘nu contropiede periculuso!Pe furtuna se ripigliaje cammin facenno e affunnaje ‘ncopp’ a ll’accelleratore truvanno ‘a linia ‘e funno campo ma maje riuscette a truvà ll’assisto bbuono!
CRIBARI: 4. ‘Sta vota nun me piacette e me ne dispiace, ma nun è ‘o caso ‘e darle ‘ncuollo: ‘o friddo, ‘o campo chiatrato (ghiacciato),’a poca cullabborazzione ‘e Grava e De Sanctisso, nun saccio che cert’è ca nun fuje isso; nun è caso ‘e darle ‘ncapo (di infierire), ma ‘a lentezza esasperante d’ ‘a soja (comme a Bucaresto) ca annullaje dinto a ‘nu siconno ‘a perla ‘e Cavani, ‘o fatto ca se perdette a Demouge ca s’aizaje in area sulo solo davanti a De Sanctisso ‘ncopp’ a ‘na punizzione dô lato mancino, e – pe fferní ‘o gollo sciupato ô finale, me custringono ‘sta vota a bocciarlo o a rimannarlo!
CAMPAGNARO: 5. Ll’ aggio ‘a ripetere ancòra ‘na vota: ‘ncopp’ô pere ‘e supponta (d’appoggio) ca nun è ‘o suĵo(innaturale) nun sta commeto (non è a suo agio) e ghiette dint’ ê chiavette quanno fuje custretto a mettere toppa (a rimediare) ê smagliature laterali p’ ‘e discese ‘e Vitale. Cchiú cu ll’anema ca cu ‘o sciato, pruvaje a purtarse in avanti annanze, ma nun riuscette a ddà spessore comme ‘mmece sape fà!
(‘A ll’84° CANNAVARO: sv. Dette ‘na mana ‘ndifesa – senza fà guaje dinte a ll’urdimi minute e tentaje pure quacche assalto gnògno (timido) ascenno dâ difesa palla ô pere retrovie.)
ZUNIGA: 5,5. Tentaje d’essere urdinato e priciso, ma ‘o solito difetto ‘e fà quacche passo ‘e cchiú lle facettero perdere tiempo e pussibbilità.S’ accentraje e ce pruvaje tiranno a vienetenne (alla carlona) ‘a luntano. (‘A ll’86° DUMITRU: 5. Trasette troppo tarde e è ddifficile risolvere coccosa dinto a ppochi minute e senza tené esperienza ‘nternazzionale, e cumminfatte chillu tiro azzardato cu ‘e cumpagne libberi fa penzà ca nun ce sta sperienzia e forze ‘nu poco ‘e delusione (frustrazione) e nun è ‘a meglia manera pe fà capí ca perzunalità ce sta!
YEBDA: 6. Tuosto e massiccio se piazzaje ‘mmiez’ â trecquarti e ffuje ‘o punto ‘e riferimento d’ ‘e cumpagne; Troppi passagge fora mesura ô pprincipio, po ‘a facenna migliuraje e azzardaje pure quacche tiro ‘a fora; e uno fuje deviato miraculosamente ‘a Vormo, ‘o signore purtiere ulandese, ca i’ m’ ‘accattasse!
GARGANO: 5-.’A forza e ‘a salute ce stettero, ma quanta cunfusione a ffà girà ‘a palla e spisso ‘int’ ô faccia a ffaccia mantenette periculosamente ‘o pallone; sbagliaje ‘a direzzione ‘e tiro ‘e ‘na punizzione laterale: rrobba ‘e paccariarlo!
VITALE: 6-.Assicuraje futezza (profondità) ‘e juoco ‘ncopp’â curzia soja andivinanno passagge e crosse periculuse. ‘Nzomma levantino (rapido),friccecariello (vispo) tinco (dinamico),’e perzunalità (autorevole), sbagliaje , soprattutto ô primmo tempo, ‘nfase difenziva lassanno scurmo (sguarnito) ‘o lato ‘e dritta e se facette cogliere sott’ â scella comme a ‘nu passariello ‘e primma asciuta pruvucanno ‘o ricore ca ce stette tutto quanto.’Nu tiro a ggiro ‘ncopp’a ‘na punizzione dô lemmeto s’avesse ammeretato ‘e cchiú.
HAMSIK: 6-. Chianu chiano sta turnanno a essere isso:tenette ggenio e vvuluntà ‘e fà ( fu in vena),zumpaje ll’ommo e p’ ‘e piede suĵe passajeno pricise e brillante funnalezze (verticalizzazioni) ‘e juoco.Peccato ca ê ssesche ( ai tagli) dinto a ll’area e a ll’ esatto assacchiamiento (preciso tempismo) nun agghiuntaje affettuazzione ( non aggiunseconcretezza) sotto mesura.
LAVEZZI: 4,5. ‘E bbuono ‘o ricore ca se prucuraje cu cazzimma e mmalizzia; ‘e bbuono ancòra quacche ghiucata ‘nsulitaria, ma se ‘ncapunette e ‘nfessette a farne ttroppe e senza zuco, causanno ‘naffannoso arremmiédio (ripiegamento) d’ ‘e cumpagne.
CAVANI: 8,5 – ‘O meglio. Tenette isso sulo a ggalla ‘o Napule: ‘na jucata ‘e capione eccezziunale, ‘nu gollo a stumpagnamiento (in sfondamento) e na freddezza tremenda ‘a ll’unnece metre; ‘nu trisso da tené a mmente pe ssempe! Si ê magaríe fatte agghiuntammo n’esaggerato sacrifiggio tattico, ‘a partita soja è stata perfetta. Santo subbeto, anze primma!
MAZZARRI: 5. Dinto a ‘stu mumento è ‘a difesa ‘o punto debbole e lla à dda faticà!Cavani nun saccio pe cquanto po’ reggere ‘stu passo (ritmo) a tutto campo. ‘A partita d’ ajeressera è ll’esatto ritratto d’ ‘a squatra ca isso à vuluto cu ‘e pregge (carattere e ripartenze espresse) e cu ‘e difietti (difesa lenta, pussesso ‘e palla discuintinuo e cierte scelte ‘e mercato sballate ‘a accuncià subbéto). Po ce avesse ‘a spiecà ch’intenzione tène cu ‘e ggiuvane: Dumitru e Maiello. ‘O Napule è ancòra ‘ncorza, ma s’ à dda accellerà!
Arb. GONZALES (Spagna): 5 Aveva diretto Barça-Real e ajere vulette fà ancòra ‘o primm’attore:troppe ‘e cartelline jalizze, puntigliuso chillu russo a Mazzarri; guardaje – comme aggiu ditto - senza ca ‘o fatto fosse d’ ‘o suĵo ‘na sciarra (rissa) a centrocampo,e dètte nu cartellino jalizzo (giallo). a De Sanctísso juto pe spàrtere e mmettere pace e ‘o pirato se ll’êtte ‘a zucà!
Ve saluto e ce sentimmo doppo d’ ‘a partita cu ‘o Palermo.
Staveti bbe’!
Brak
Nessun commento:
Posta un commento