NAPOLI – FIORENTINA 15/01/11 0 A 0

NAPOLI – FIORENTINA 15/01/11 0 A 0
LL’AGGIU VISTA ACCUSSÍ
È ffernuta comme è ffernuta guagliú, cu ‘nu scunzulato zero e zzero e mme pare justo ripetere chello ca me diceva ‘o nonno quanno fravecavo ‘ncopp’ârena currenno cu ‘a fantasia appriesso a puntaríe (mete) ‘e suonno: “Guagliò, ‘o ffruscià fa bbene â salute!..",ciovè: si vuó pazzià cu ‘a fantasia, fa pure, magari te siente meglio, ma... ‘a rialtà è ato!” Cumminfatte doppo ca ‘o Napule êva dato tre purpette â juventussa c’èramo fatte tutte quante ‘o stesso suonno addirittura currenno appriesso a chella fantasia ‘e chiullo coso a ttre culure vinciuto pe ddoje vint’ anni fa... Turnammo cu ‘e piede ‘nterra guagliú e rennimmoce cunto ‘e qual’è ‘a vera natura ‘e chistu Napule! Rennimmoce cunto ca niente ll’è ‘mpussibbile Nessuna impresa preclusa, peffino ‘e vattere ‘a juventussa pe 3 a 0, ma sulo si se tratta ‘e mumente... Magare uno addietro a ll’ato, ma sempe fatte pruvvisorie, maje pretre ‘e valore ‘ncastunate dinto a ‘nu pruggetto serio e urdinato ca tène cuorpo pecché prugrammato...cu ‘a sacca e ‘o tavulino!è ‘o Napule, è Nnapule...: tenímmoce astrignuta, fino a cche dura chesta pusizzione quase ‘mpizzo d’ ‘a classifica ... gudimmancella...dicenno :"Dimane penzo ê diebbete, stasera so' ‘nu rre...", ma rummanimmo cu ‘e piede ‘nterra Doppo ddoje vittorie all'urdemu rispiro contro Palermo (mmeretata assaje) e Lecce (poco mmeretata),êva succedere ca ascesse ll’icchese, meglio ‘o zzero a zzero ‘ncopp’â rota ‘e Napule. Nisciuno fantango (nessuna catastrofe); è ccosa ‘e niente: cu ttutto ca quaccuno se sonna ‘o tramme elettrico (si illude), ‘e certo nun stammo ‘nlotta p’ ‘o saciccio a ttre culure(comme vulesse a ggiugno puté ddicere "me sbagliaje!"), ‘nu zzero a zzero ‘ncasa contro a ‘na squatra tosta,catenacciara, ma valida comme â Fiorentina ce po’ stà... Ma tenimmo ‘o duvere ‘e piazzà tanta qualità ‘mpanca pe lluttà sino â fine p’ ‘a Ciampionsa. ‘o vero dispiacere d’ ‘a partita d’ajere fuje chillo ‘e essere custretto a ccagnà upinione ‘ncopp’ a Sosa... I’ ce credevo e ‘mmece aggi’ ‘a avuto ‘a cunvení ca ‘o ggiuvinotto ‘a fora ca è ‘nu muscemattèo (lentissimo) pejo ‘e ‘na cestunia , manca ‘e curaggio e nun è acciaccuso (aggressivo); ‘mmiez’ô campo lle mancavano ‘a burzetta, ‘e tacche a spillo e ‘a paglia ‘ncapo; pareva ‘na signurina ‘e bbona famiglia, capitata pe scagno lla mmiezo e chisto è ‘na cosa ca nun sta; ‘na squatra comme ‘o Napule ‘e Mazzarri ave bbisogno ‘e ggente cu ‘o sanco a ll’uocchie e cu sette parme ‘e ca**o! Fosse a Biguncino vedesse ‘e scagnarlo cu quacche ata squatra, mettennoce pe gghionta a Blasi!
‘O stesso pe lI’attacco addó ce serve assolutamente ‘na riserva chiantuta (valida); primma d’ ‘a fine ‘e ‘stu mese s’ànn’ a appurà (si devono verificare) ‘mmiez’ô campo comme sta miso Lucarelli e, si – comm’i’ penzo – ce stanno paricchie ‘ncertezze ‘ncopp’ô fatto ca overamente e marco overamente êsse ricuperato , s’à dda piglià (visto ca ce simmo private e ancòra m’addimanno ‘o pecché ‘e Denisso) n’attaccante ‘e aria ‘e ricore. Nun putimmo penzà ‘e risolvere ‘e partite comme chella d’ajere mannanno ‘ncampo a Dumitru, che è ancòra acievero e ghiucatore ca sumiglia a Henry e nno a Inzaghi o Trezeguet! ‘Nserie B ce stanno cierti viecchi filibbustiere ‘e ll’urdimi unnice metre ca putessero servirce accuntentannose d’ ‘a panca e de pochi sorde!
Ma, mo comme a mmo, soprattutto nun putimmo permettere ‘o lusso ‘e perdere pe troppo tiempo a Grava,’o surdatiello nuosto ca forze nun tène tanta stoffa, ma tène core e apprettatezza (combattività) a strafottere!
‘Na nutarella a pparte: Aggiu visto ‘e jucà ‘nu scampulo ‘e partita d’ ‘o Torino e Ogbonna m’à ‘ ‘mpressionato sulo ‘nu poco; simmo sicure ca vale ‘o ddoppio ‘e Santacroce?
Venimmo a nnuje; d’ ‘e pprossime seje partite sulamente una è overamente tosta......chella a ll'Olimpico contro â Roma (ma pure lla putessemo cògliere ‘nu pareggio bbuono: di solito jucammo sempe bbuono lla)...ll’ ati partite so’ â purtata nosta: Catania,Cesena,Bari,Chievo,Sampdoria...tutte partite tranquille e cchelle fora casa a accummincià ‘a dummeneca a Bbari songo ancòra cchiú ffacile pecchè so’ lloro ca ànn’ ‘a fà ‘a partita e nnuje putimmo apprufittà d’ ‘o contropiede...Penzammo pusitivo!...Chistu Napule nun ce dà ‘na delusione: ajere se sentette ll'assenza ‘e Marekiaro cu Sosa(‘ncunsistente!...) ca nun è ccerto ‘o sostituto adatto; pure Lavezzi fuje sotto tono e Cavani fuje ‘ngabbiato dinto a ‘na rezza ‘e tre perzone... Po ce se mettete ll’arbitro Banti ca nun ce dette ‘nu ricore sacrosanto ‘ncuollo a Michelino Pazienza.. ‘Nu poco ‘e pacienza:nun se po’ po’ ssempe vencere, nun simmo nè ll’Interre, nè ‘o Barcellona. Rassignammoce!
Pe carità ‘o Napule sicuramente sta facenno bbuono, ma si vulimmo restà ê piane avete, s’ànn’ ‘a accattà per lo meno tre ghiucature e bbuone : uno pe reparto. Del resto ‘o stesso Mazzarri à ditto ca oramaje ‘o Napule vène cunziderato ‘na grana squatra e comme a ttale chiunque vene ô San Paolo, vène a arruccarse a ddifesa d’ ‘o zzero a zzero.E nnje comme ‘e vulimmo vencerle ‘sti partite? Si ce attappano ‘e curzie laterali (Maggio/Zuniga o Dossena/Vitale) e ce bloccano a Llavezzi e Ccavani, Dumitru o Lucarelli nun abbastano pe scardinà ‘e catenacce. Assodato ca ‘mmiez’ô campo s’à dda truvà ‘na bbona riserva ‘e Marechiaro, ca (comme aggiu spiecato) nun è ccerto Sosa, ‘ndifesa me pare ca che Ogbonna po’ essere ‘nu bbuono acquisto, pecché è ggiovane ,tuosto, chino ‘e salute e senza paura..., ma penzo pure ca Santacroce nun po’ esserne mannato visto ca purtroppo per Grava ‘o campionato e ttutt’ ‘o riesto so’ fernute. Passammo ê ppaggelle:

DE SANCTIS 6 Nun avette ‘a fà nisciuno straordinario: urdinaria mministrazzione.

GRAVA 7 ‘e stima pecché se facette male quase subbeto
(ARONICA 6,5 Facette sèntere ‘a presenza soja e tutt’ ‘o mestiere pure cu ‘na guvetata (gomitata) a Ljajic ca ll’arbitro overamente nun vedette si no nun lle fosse paruto overo ‘e dà ‘nu ricore contro ô Napule...).
CANNAVARO 3,5 (media ‘e 5 + 2): 5 p’ ‘o duello senza fessarie cu Gilardino; 2 pecché ô primmo tempo jette a ddà fastidio a ll’attaccante napulitane, ma nun fuje capace ‘e sfruttà a dduvere ‘na palla d’oro capitata proprio a isso a uttanta centimetre dô gollo: si nun sî scarparo pecché vaje a rompere ‘o ca**o ê ssemmenzelle? Statte areto e nun dà ‘mpiccio!

CAMPAGNARO 6,5 Sicuro ‘ndifesa, ô siconno tempo cantaje e purtaje ‘a croce jenno a ddà custantemente ‘na mana â manovra uffenziva.

MAGGIO 5,5 Facette sempe fatica a superà a Pasqual,e fuje sempe ‘ncuncludente. I’ ll’êsse cagnato cu Zuniga .

PAZIENZA 6+ Overo ‘nu passo arreto rispetto a ll’urdema partita, ma dètte ll’anema e nun avette ‘a cullabborazzione ‘e nisciuno.
Ll’arbitro le negaje ‘nu ricore gruosso comme a ‘nu palazzo ‘e casa...

GARGANO 5,5 Malamente p’‘a primma parte, meglio p’‘o siconno tempo quanno, asciuto Sosa, truvaje velocità avanzanno ‘a zzona d’azzione e bluccanno pirfettamente a D’Agostino.

DOSSENA 4,5 Suffrette tremendamente a De Silvestri; nun ‘ncarraje ‘nu crosso ca fosse ‘nu crosso!
Nun capisco pecché Mazzarri nun ‘o cagnaje cu Vitale!

SOSA 4 Accuminciaje bbuono danno ‘nu bbellu pallone a Cavani ca però sparacchiaje dint’â curva, po sparette cumpletamente...
(Yebda 6- Mettette centimetre e ssalute ‘mmiez’ô campo.)

LAVEZZI 5 Aizaje parecchia póvera, ma senza riuscí a essere produttivo e dicisivo!

CAVANI 5 Doppo d’ ‘e ttre purpette date â juventussa, ll’allenatore d’ ‘a Fiorentina ll’appruntaje ‘na rezza ‘e tre perzone e isso nce cadette dinto;nun facette vedé quase niente ‘a fora ‘e doje o tre cumbinazzioni, ma senza custrutto, cu Lavezzi; mannaje dint’ â curva ll’unicu bbuonu pallone ca le dètte Sosa. Peccato!


All: MAZZARRI 4,5 Liggette malamente ‘a partitaNun s’accurgette ca s’erano ‘a cagnà subbeto Maggio e Dossena e ca Sosa era cchiú ‘e ‘mpiccio ca d’aiuto. ‘O Napule attaccaje senza idee e a bbienetenne; ‘ncarraje sulamente, asciuto Sosa a ffà avanzà a Gargano.
Arbitro BANTI 3,5:scadente e chiaramente ‘nmalafede! Comme avevo facilmente prunusticato (ma nun ce vuleva ‘a zingara) st’assicuratore ‘e Livorno, (vuje capite uno d’ ‘a Tuscana mannato a arbitrà ‘na partita d’ ‘a Fiorentina!)capitato ggià ati vvote ‘ncopp’â strata d’ ‘o Napule, fuje mannato a spezzà ‘e passe d’ ‘e guagliune ‘e Mazzarri pe ffavurí ‘mpruspettiva ‘a juventussa... e ce riuscette a mmestiere! P’accummincià concedette tutto e de cchiú ê guappe cammuriste d’ ‘a Fiorentina (De Silvestri,Gamberini e Kroldrup pe ffà quacche nnomme, ma nun avasta, giacché so’ ttutte d’ ‘a stessa livrera: faveze ‘mbrugliune e viulente...). Gravissimo e dicisivo ll’errore vuluntario ô mumento chiave d’ ‘a partita, quanno nun concedette ‘o ricore ô Napule pe ffallo ‘e De Silvestri ‘ncuollo a Michelino Pazienza.
E dummeneca se va a Bbari.Ma tengo bboni speranze. Ce sentimmo.
Raffaele Bracale Brak