NAPOLI – CATANIA 20.02.11 (1 -0) LL’AGGIU VISTA ACCUSSÍ.

NAPOLI – CATANIA 20.02.11 (1 -0)
LL’AGGIU VISTA ACCUSSÍ.

Che sudata fredda, guagliú!
Ma â fine vincettemo cu ttutto ca i’ vedette ‘nu Napule stanco e nervoso,’mpignato a ffà soja ‘na partita scuntrosa e troppo ‘mpurtante p’ ‘o riesto d’ ‘o campiunato nuosto; ‘a ciampionsa è cquase cosa nosta pecché sulo nuje ‘a putimmo jettà... visto comme se mettettero ‘e ccose â fine d’ ‘a jurnata d’ajere pe Roma, juventussa e cumpagnia cantante.Turnanno â partita e scennenno dint’ê particulare prassempio (per esempio) aggi’ ‘a dicere ca Yebdà fuje deludente: me parette assaje muscio (lento) e poco cuncentrato,prubbabbilmente ‘nu poco stanco; joca assaje meglio quanno, ‘mmece ca dô pprincipio, trase ‘ncorza; Sosa risulta praticamente inutile quanno è ausato ‘ncampo assieme a Marekiaro: se cassano ll’uno cu ll’ato(si annullano a vicenda); Mascara s’à dda ‘mparà a ffà ‘o Lavezzi si no Cavani nun ll’ave ‘nu pallone decente; ‘ncumpenso (e nun me ll’aspettavo) Gargano fuje suddisfacente quanno trasette; comme pure putimmo cunziderà d’avé fatto n’arbasciuso accatteto ( un grandissimo acquisto) cu Santacroce; ‘nzomma ll’avé vinciuto ‘sta partita maledetta soffrenno, significa ca ‘o Napule è ‘na granna squatra; p’ ‘o ppassato è capace pure ca ll’”êssemo perza e ‘mmece ll’âmmo vinciuta e ‘a vittoria nun puteva mancà ,visto ca juventussa, Roma e Ppalermo ll’ànno avute ‘ncopp’ê rrecchie e ca ll'Udinese ‘mpattaje ‘ncasa soja. Passammo ê ppaggelle e sperammo ca ‘na vota tanto aggiu visto ‘a stessa partita d’’o prufessor Trombetti.
DE SANCTIS 6,5: Ô primmo tempo e ‘e cchiú s’êsse pututo pure stà â casa: cumminfatte accumminciaje a ffà coccosa sulo dinto â siconna parte d’ ‘a ripresa, dimustrannose attiento’ncoppa a ògni ppalla cchiú o meno periculosa d’ ‘o Catania. Cose ‘e pazze: ‘ncarraje perzino ‘e rinvie!
SANTACROCE 6-: ‘E guaje musculare ancòra ‘o cundizziunajeno ‘nu poco, ma sta turnanno a essere ‘o bbellu jucatore ‘e ‘na vota!
CANNAVARO 6: Festiggiaje ‘o rinnovo d’ ‘o cuntratto senza fà puttanate e p’uno comme è isso è ggià tanto, ma ‘o vizzio ‘e jí a rrompere ‘o cacchio ê cumpagne ‘e ll’attacco nun se ‘o vo’ levà!
ARONICA 6+: ‘A solita partita ‘e tutto rispetto p’ ‘o difenzore palermitano.
MAGGIO 6 -: Ca tenesse ‘nu muturino ô posto d’ ‘e ccosse se sapeva,ma putesse essere cchiú cuncreto e priciso Dê piede suĵe partettono quacche palloni p’ ‘e cumpagne, ma nun fujeno nè custruttive, nè ‘nteressante.
PAZIENZA 6: Chisto è uno ca lla ‘mmiezo ce vo’ sempe; jucaje sí meno pallune ‘e ati vvote, ma dint’ê chiusure nun mustraje quase maje vaviature .
(Dô 76° Gargano 6 Quanno trasette se dètte da fà e se facette apprezzà).
YEBDA 5,5: Mazzarri penzaje ‘e vederlo comme chillu reggista ca manca â squatra soja p’essere cumpleta p’ ògne reparto; ma ‘o giuvinotto franco-algerino nun è Ciccio Romano e nun po’ ffà ‘o metronomo, visto ca spisso rallenta troppo ‘o juoco.
ZUNIGA 7,5: ‘O miraculo, ‘o miraculo!... Jucaje titulare ‘ncopp’â mancina, addó cchiú ‘e ‘na vota fallette; ma ajere ssera fuje miraculato e addirittura truvaje ‘o primmo gollo ‘a che sta a Nnapule e se prupunette cchiú ‘na vota. Serata maggica ‘a soja.
( Dô 79° Dossena Sv).
HAMSIK 6 -: Durante ô primmo tempo s’estraniaje dâ manovra napulitana. Durante â ripresa tentaje ‘e scetarse e cercaje pure ‘o gollo però senza truvarlo.
SOSA 6 - - : Jucaje ‘nu poco cchiú sicuro rispetto ê ppartite ‘e inizio campiunato, marisultaje praticamente inutile, visto ca –me ripeto - fuje ausato ‘ncampo assieme a Marekiaro: se cassano ll’uno cu ll’ato(si annullano a vicenda); Si procuraje ‘o ricore ca però Cavani po sbagliaje.
(Dô 61° MASCARA 5 Me deludette: nè ccarne, nè ppesce, nun finalizzaje, nè custruette e ppo à dda capí ca ce vo’ perzunalità pe ffà vedé chello ca sape fà o quanto meno s’à dda ‘mparà a ffà ‘o Lavezzi e dialugà cu Cavani ca si no chisto nun ll’ave maje ‘nu pallone decente ).
CAVANI 5: Sbagliaje ‘o ricore ca avesse miso ‘a partita ‘ncopp’ a ati bbinarie cchiú ffavurevule pe nnuje..., e ca ll’êsse purtato a cquota 21 golle ‘ncampiunato. Pe ‘na sera ‘nzomma dimostraje pur’ isso d’essere ‘e carne e ossa e nno ‘nu marziano!
MAZZARRI 6,5: ‘O Napule suĵo sta spisso sott’esame, ma ‘e ssupera ògne vvota egreggiamente. Giovedí e lunnerí ca venono prossimo ànn’ ‘a fà chille ‘e spagnolo e ‘e milanese contro Villareàllo e Milanno: si ‘e riesce a superà tutt’ ‘e dduje, s’abbusca a dduppio ‘na lavura cu llode a maggio.
L’ARBITRO GAVA 6,5 Finalmente ‘nu sischetto ca arbitraje a dduvere senza aizate ‘e cape e fessarie grosse. Forze pecché st’avvocato tène trentaseje anne e è gguaglione e nun è ancòra trasunto dint’ô ggiro d’ ‘e sischette allezziunate.... Damme tiempo ô tiempo!
Ce sentimmo.
R.Bracale Brak