NAPOLI – CESENA 06.02.11 2 A 0 LL’AGGIU VISTA ACCUSSÍ

NAPOLI – CESENA 06.02.11 2 A 0
LL’AGGIU VISTA ACCUSSÍ
Tutto summato, guagliú, ‘a jurnata d’ajere si nun fosse succieso ca ll’Interre avesse lardiato malamente ‘a Roma, ca mo starrà ‘ncazzata nera e sapato ca vène s’ ‘a vularrà scuntà cu nnuje, ma pe ffurtuna nosta tène ‘nu purtiere accattato dint’ê scampule ‘e ll’Ikea... e si nun fosse succieso ca ‘a juventussa fosse juta a vvencere a Ccagliari (ma s’è trattata chiaramente ‘e ‘na pastetta urganizzata cu ‘o bisinisso d’ ‘o passaggio ‘e Matri ‘a Cagliari a Turino...)si nun fósse stato pe ‘sti dduje fatte, ‘a jurnata d’ajere fósse juta a cciammiello: ‘o Chievo fermaje ‘a Lazzio a Rroma, ‘o Genoa ‘o Milanno e ‘o Napule, cu ttutto chella fetenzia ‘e Celi,vincette cu ‘o Cesena, cunfermmànnose sulo sulo ê piane avete a ttre ppunte dô Milanno.’O pallone – se sape - nun è ‘na scienza esatta...e po’ succedere qualunqua cosa... e p’ ‘o mumento me sto’ gudenno ‘o primmo gollo ‘e Sosa, pecché i’ a ‘stu guaglione ce credo, e ll’aggiu sempe sustenuto e ssaccio ca pure ‘nu gollo signato ‘a cinquanta centimetre po’ significà assaje pure pe isso, comme significa assaje ‘o pallone miso ‘mmiezo ‘a Mascara! ‘O Napule era stracquo ma vincette e êsse pututo vencere cchiú abbunnantamente...si nun fósse stato pe chella fetenzia ‘e Celi e soci. Guagliú cercammo ‘e vedé ‘e ccose ‘nzenzo pusitivo senza ‘ntussecarce ll’anema cercanno ‘e guardà arret’ ô muro....’O Napule affunnaje ‘o Cesena sotto ê bbotte ‘e Cavani e Sosa e lanzaje n’avviso chiaro ô campiunato: ce stongo pur’ i’, nun v’ ‘o scurdate! ‘O Napule, ridisignato ‘a Mazzarri doppo d’‘a chianetta pigliata a Vverona, se presentaje ‘ncampo deciso a risolvere ‘a pratica a cquatto â scopa puntanno a vvencere senza misericordia, e lle capitaje ‘nu Cesena disposto a pigliarlo ‘ncopp’ê rrecchie, manzo (remissivo) e difenzivista ca dette ‘na mana â varca cucivulanno (agevolando) ‘e pruggette ‘e Lavezzi e cumpagne ,ca fujeno capace ‘e fà ‘na partita vigurosa,mastressiata (dominata) pe ppasso (ritmo) e pe ll’ uccasione ‘e gollo custruite...
Tanto precisato passammo ê ppaggelle meje, ca scummetto nun se trovano cu cchelle d’ ‘o prufessore Trombetti.
DE SANCTIS 5,5. ‘Na sola parata durante ô primmo tempo. Ancòra friddo,se ‘mpappinaje mane e ppiere ascenne (ca se sape nun è articulo suĵo) e ricalaje ‘a palla a Bogdani ( ca pe ffurtuna steva ‘nfuoriggioco).’Ncopp’ê rilance ‘a chiena e ‘a vacante!
ARONICA 6- . ‘O chi sí ttu e cchi so’ io (confronto) cu Jimenezzo nun ‘o mettette cumpletamente a còmmeto suĵo (a proprio agio). Ancòra nervoso ‘nfase ‘e ‘mpustazzione, criscette dint’ô finale. Sapato ca vène facesse jucà a Campagnaro.
CRIBARI 7+ Anticipaje sistematicamente a Bogdani, riuscenno bbuono a ffà ricupere difficultuse cu gghiucature levantine (veloci) comme a Giaccherini e Jimenezzo. ‘E capa nun ne sbagliaje una! Accumminciaje, cu ‘na granna smestuta, ll’azzione d’ ‘o primmo gollo. Sperammo ca sapato ca vène a Mmazzarri nun lle vène ‘a ‘nziria ‘e mettere n’ata vota a culo’echiummo-cannavaro!
SANTACROCE 6,5. Comme sape fà isso , cercaje cuntinuamente ll’anticipo arresecannòlo pure dint’ ô chirchio ‘e centrocampo. Se dimustraje canzaniello (intraprendente) e dètte signale ‘e aggrannetura (di crescita).
ZUNIGA 5. ‘A palla ‘e chiummo ô pere d’ ‘o Napule. È ‘na jastemma farlo jucà comm’esterno; pe gghionta ‘e ruotolo tène ‘e piere stuorte ca manco ‘nu bbuonu masterascia po’ accuncià; nun vede maje ‘a porta.Ne fa tutte dribblinghe inutile, aiza póvera e perde ‘a palla... S’arrangiaje quanno se trattaje ‘e difennere, ma – passata ‘a linia ‘e mità ccampo - nun se putette guardà.Una cosa bbona facette: ll’assisto p’ ‘o gollo fantasema ‘e Maggio. I’ a ggiugno vedesse a cchi ll’êsse abbarrucarlo! Sperammo ca pe sapato ricupera Vitale!
(dô 35°s.t. DOSSENA s.v. Piezzo e ppejo:scarte fruscio e ppiglie primera...)
GARGANO 6-. ‘O solito luttatore ‘e centrocampo cu ‘e piére stuorte: sbagliaje cchiú ‘e ‘nu passaggio e soprattutto uno (ca ce puteva) custà caro ‘ncopp’â trecquarte napulitana.
YEBDA 7. Mettette ‘ncampo tanta saluta,sustanza e cumbattività, vincenno cuntraste e retuorne (rimpalli). Cuvernaje tranquillamente ‘a palla riuscenno a ‘mpiantà ‘a manovra d’ ‘e napulitane.
MAGGIO 7,5. Affuscante (Impressionante) ‘a smestuta (progressione) che lle permettette ‘e mettere dâ linia ‘e funno ‘ncopp’ a ‘na guantiera ‘nu pallone d’oro pe Cavani. Antonioli, ‘mbruglianno e ‘ncullabburazzione cu ll’arbitro e l’assistente Puggioni ll’ annecajeno ‘a joja ‘e ‘nu gollo ca s’êsse meritato assaje! Priggievole pure quanno êtt’ ‘a difennere.
HAMSIK 6,5. Spunzone (spina) cuntinuo dint’ ê scianche d’’e difenzure rumagnole; ‘ntrusione (inserimenti) ‘ntelliggente e passagge allezziunante (illuminanti). ‘Na perla ‘o passaggio lammeccante (filtrante) pe Mmaggio ca mettette a Cavani a ttu ppe ttu cu ‘o gollo.Se ne scennette ‘nu poco dint’â ripresa.
(dô 29°s.t. MASCARA 6,5. Voto ‘e sustanza e nno ‘e cummenienza;trasette cu ‘o desiderio ‘e fà vedé chi è e ce riuscette a mmeraviglia, tenenno ‘a palla, dialuganno bbuono cu ‘e cumpagne, e mettenno a ccentro ‘nu granno pallone p’ ‘o doje a zzero ‘e Sosa.P’essere ‘a primma vota avasta e avanza e ve faccio vedé ca si ‘o fanno tirà ‘e punizzioni e vattere ‘e calce d’angulo ce allustrammo ll’uocchie! Niente ‘a dicere: bbona ‘a primma!)
LAVEZZI 5,5. Francamente m’aspettavo ‘e cchiú, ma ce accuntentammo;forze se sparagnaje p’ ‘a Roma visto ca ‘o Cesena nun preoccupava; avette ‘a palla troppo luntano dâ porta, quacche spunto d’ ‘e suoje, ma nun fuje certamente ‘a jurnata soja; e però tenette custantemente ‘mpreoccupazzione ‘e rumagnole.
(dô 45°s.t. SOSA 6,5. Chesta volta ll’ avastaje ‘nu minuto p’ essere dicisivo firmanno ‘o doje a zzero comme a ‘nu farcone ‘mplacabbile!
CAVANI 7. Spadellaje ‘a diciottesima purpetta ‘mbuttunata. Po se muvette tanto annante,cercanno ‘e riuscí a frijere ‘a diciannuvesima ma nun ll’arrivajeno ati pallune ‘a mettere dint’ â tiella.... Priggevole comme a ssempe ajutaje ‘e cumpagne pure arreto â linia ‘e mità campo,faticanno ‘nu granne pallone pe Mascara ca fruttaje ‘o doje a zzero. MAZZARRI 6,5. ‘A partita se mettette súbbeto ‘ncopp’ê cchiaste juste. Ô mumento cchiú ddifficultuso arresecaje mettenno Mascara ô posto ‘e Marekiaro; i’ avesse levato a Zuniga; cumminfatte ‘a cincurenza (il forcone) a ttre ddiente nun funziunaje e s’avette ‘a jucà ‘a carta Sosa ca risultaje chella bbona: ‘o doje a zzero levaje ‘e pacchere ‘a faccia tanto â squatra ca ô Principito!
L’ARBITRO CELI 2 ‘e ‘ncuraggiamento. Scadente assaje isso e ll’assistente suoje . Dinto a ‘na partita tutto summato tranquilla e senza prubbleme overe Celi dimustraje‘ncampo ‘e jí poco o niente sbaglianno tutto, malamente cunzigliato pure dê dduje signalinie assistente: ‘nzomma ‘a funicella corta e ‘o strummolo tiriteppe. Sbagliata ‘e cquanto ll’amministrazzione d’ ‘e cartelline e d’ ‘e minute ‘e ricupero.’O mmassimo è ppo ca ô Napule â fine mancaje ‘nu gollo signato ‘a Maggio ma ca nun fuje visto dâ trina arbitrale. Nun voglio fermarme a elencà tutt’ ‘e pputtanate ‘e ‘stu ‘mpiacato barese: doppo ve faccio sulo quacche asempio; ppe mmo dico sulo ca pe furtuna nun riuscette a mmettere vocca dint’ô risultato finale giacchè a pparere mio nun se trattaje ‘e n’arbitro disonesto o vennuto, ma sulo ‘e n’arbitro cchiú ca scadente: ‘na vera fetenzia; p’asempio ô 38° Jimenez cauciaje a Aronica ca proteggeva ‘o pallone ‘ncopp’â línia laterale. S’êsse avut’ ‘a ammuní, ma manco p’ ‘a capa! ô 42° Giaccherini cummettette fallo ‘ncuollo a Mmaggio, nun visto ‘a Celi;seguitanno po ‘o laterale napulitano ancòra nervuso atterraje ‘a ponta cesenate e se zucaje ‘o cartellino jalizzo: curnuto e mmazziato. Furtunatamente Maggio non era ‘nfra ‘e diffidate e cu ‘a Roma ce po stà…
‘A ripresa era ‘a poco accumminciata quanno succedette ‘o fatto ca aggiu anticipato cioè d’ ‘o colpo ‘e testa ‘e Maggio respinto ‘a Antonioli quanno ‘o pallone êva tutto e abbunnantamente superato ‘a línia ‘e porta e cchisto è n’arrore grave ‘e Celi e ‘e ll’assistente suĵo Pugiotto .Ancòra a ll’ 8° s.t. Colucci trasette comme a zzimmaro ‘a dereto ‘ncuollo a Zuniga lanzato, ma pure dinto a ‘st’uccasione Celi nun sventulaje ‘o cartellino jalizzo ‘nfacci’ ô cesenate. Celi (‘na cosa peduno) se dimustraje scadente e ‘ncompetente pure ô18°s.t. quanno nun siscaje ‘nu fallo lustro (evidente) ‘e Aronica ‘ncuollo a Jimenezzo e ritardaje ‘e ccure ô jucatore cileno ca nun steva facenno triato. Ô 28°s.t. â festa ‘e Piererotta d’ ‘e pputtanate partecipaje pure ll’assistente Carrer ca cu Celi nun vedette ‘nu punio ‘a cartellino russo ammullato ‘a Jimenezzo a Aronica. Ô 34° s.t. Celi s’ arricurdaje ‘e tené ‘e cartelline e mustraje chillo jalizzo a Santacroce pe ‘nu fallo ‘e niente a centrocampo. Esaggerato!Fujene troppe pure ‘e cinche minute ‘e ricupero cuncesse ‘a Celi. Ma ch’êv’ ‘a ricuperà? Pe ffurtuna ca ce penzajeno Cavani, Mascara e Sosa a mmettere ‘e ccose a pposto! A dDio piacenno ce sentimmo dummeneca ca vène sempe speranno ca sapato e ssera a Rroma ‘o Napule e Mmazzarri nun s’ ‘a fanno sotto e vanno a cumbattere cu ‘o curtiello ‘mmiez’ê diente! Staveti bbe’!
R.Bracale Brak