SPUTI & SQUALIFICHE

SPUTI & SQUALIFICHE
L’amico don Mimí Carratelli, à consigliato su IL NAPOLISTA un atteggiamento signorile e da grande squadra in reazione alla vicenda SPUTI & SQUALIFICA di Lavezzi al quale la Corte di Ricorso à confermato una (ingiusta) squalifica di tre turni. Gli ò risposto come segue.
No, don Mimí ‘sta vota nun songo d’accordo cu vvuje; cca nun se tratta ‘e signurilità..., se tratta ‘e nun passà pe ffesse! Fundamentalmente a mme me dà ‘mpiccio ca Lavezzi è stato squalificato cu ‘na manfrina zuzzosa.... Trovo overamente ‘nqualificabbile ‘o sistema ausato pe ghiudicà cu sentenze assemplare ògne fatticiello (episodio) ca riguarda società,squatra e ttifuse d’’o Napule; pare quase ca ll'auto senzo ‘e justizzia ca vale dinto a ‘stu paese s’ à dda appricà sulamente e unicamente ê culure nuoste; ma chi simmo? ‘E figlie d’ ‘a criata(serva)? E vvuje ce cunzigliate ‘e fà ‘e signure.... Ma facite overo o state pazzianno? Oh dDio i’ m’aspettavo ca ferneva accussí e nun me faccio meraviglia 'E 'na manera o 'e n'ata ce ll'avevan' 'a mettere cchiú ddinto 'e dinto ô tafanario!E ll’ànnu fatto scientificamente senza ausà vasellina o (pe rrestà ‘ntema) senza sputazza... E che ffà si a nnuje ce à fatto ‘ncazzà ‘o fatto ca ‘e filmate nuove (no chille ‘e SKY) (azzettate (acquisite),’e ‘na manera chiaramente cuntraria a ògne prucedura, dâ ggiudice leghista Tosello e ppo dê ggiudice d’ ‘o ricorzo) songo arrivate proprio ‘a CONTROCAMPO , chella trasmissione spurtiva appartenente ê prugramme ‘e MEDIASET,ca pe pparta soja appartene esattamente ô presidente del A.C. MILAN, Purtroppo, caro don Mimí penzo ca chesta è ssulo ‘a primma ‘e ‘na seria ‘e fetenzie ca ‘o Napule à dda suppurtà si cuntinua a vencere.....Vuje dicite ca no? Ve voglio bbene: nun stammo ascenno mo ‘a sott’ô mantesino. Simmo scafate e nun ce putévamo aspettà ato!
Mo che se po’ ffà? Dongo quatto pussibbilità, ma a mme me piace ‘a quarta: 1)Chijarsela a llibbretta zitte e mmute nun me pare ‘na cosa justa;
2)’Na vota ca ce ll’ànnu miso addó sapite, aggitarse servesse sulo a ffà ‘o juoco lloro e farle divertí cchiú assaje;
3) Ritirà ‘a squatra e assuciarla ‘o prossimo anno ô campiunato albanese, turco o greco (simmo sempe ‘na città d’ ‘a Magna Grecia...) deprimesse ê tifuse... e allora?
4) Visto ca vonno vencere a fforza e si nun ce ‘a fanno ‘ncopp’ô campo, ‘o ffanno cu ‘e ssentenze allezziunate..., i’ a Mmilano jesse a gghiucà cu 'e guagliune e 'e mmezziasse pe ffà bbuone struppià a dduje o tre ghiucature d' 'o Milanno (accussì dessemo 'na mana a ll'Interre, ca fetenzie grosse nun ce n’à fatte...).
E ‘nchiudo, caro don Mimmo cu ‘na cunsiderazzione tecnica: certo ‘o juoco d’ ‘o Napule dipenne assaje ‘a Lavezzi, però quanno è mancato avimmo vinciuto cchiú ‘e ‘na vota e si a Milano ce jammo senza guagliune e senza metterce paura, po’ succedere qualunqua cosa. I’ cumunque so’ ppurtato a avé cchiú ‘e ‘nu suspetto ‘ncopp’ a ttutta ‘sta faccenna,ma si ‘a sputazzata c'è stata ‘a squalifica ce po’ stà,e nnuje simmo forte pure senza ‘o Pocho ca vvène a ddicere è cchiú arrepusato pe l’ urdemi gghiurnate... Nun perdimmo ‘a fiducia e ghiammuncell’ a gghiucà. Forza Mascara e forza Napoli!
Brak