NAPOLI – CAGLIARI 20.3.11 (2 -1)
LL’AGGIU VISTA ACCUSSÍ
Quanno ajere ssera m’ appriparaje a vedé ‘a partita tenevo una paura, chella ‘e vedé ‘e pporte cu ‘e rezze triculore e ‘ntussecarme ‘a serata..., fortunatamente a Nnapule ‘a sbrasata ‘e tegnere tutto janco russo e vverde nun succedette!!! Tenévamo ‘na cosa cchiú sseria ‘a fà e cioè chella ‘e vattere ‘o ‘nzavuóriato (odiato) Cagliari ca nun se vatteva dô ’93...E – comme sapite – ce riuscettemo e facennoce ‘nu poco ‘e cunte so’ vint'anni ca nun vulammo accussí auto...Pe cquanto me riguarda sulo stammatina me songo ripigliato doppo nuvantacinche minuti ‘e sufferenza cuntinuata!!! Ma che gudimento gruosso vencere ( e ppo ‘mpresenza ‘e ‘nu tifoso juventino ca ‘ntribuna divano aummo aummo menava ‘a seccia...) e sentirsi sempe cchiú ‘ncoppa! Però, guagliú, che partita tosta e difficultosa cu ‘nu primmo tempo assaje sciascio (scialbo) e senza passo (ritmo), primmo tempo ca ‘o Cagliare nce dètte assaje ‘mpiccio. Pe ffurtuna ca po ô siconno tempo ‘o trebbeto napulitano pe ‘na bbona mez’ora allummaje ‘a serata: velocità, fantasia e classe e ‘o Napule nuosto pure suffrenno soprattutto pe ‘na fessaria ‘e culo’echiummo e p’‘a jonta mísace dô Pirata conquistaje 3 ppunte ‘mpurtante e sustanziuse (pesantissimi)! E me gudette ‘o spettaculo d’ ‘e sciarpe luvarde arremescate (agitate)ô viento ‘mmece d’ ‘e bbannere triculore!Che pozzo dicere? Niente! Sulo grazzie a ‘sti guagliune luvarde ca ce ànno rialato n’ata serata maggica !!! E mmo succedesse chello ca vo’ succedere ll’importante è nun mullà maje, cuntinuà a farce sunnà e crederce nfino a ll’urdemo....e ppo si è scritto nun po’ mancà! E mmo, mo comme ce mantenimmo pe ddoje semmane...senza d’ ‘e nuoste? Saranno n’eternità!!! Passammo ê ppaggelle:
DE SANCTIS 5 – ‘A chiena e ‘a vacante; ‘a chiena: ‘nu pare ‘e bboni asciute e ll’avé superato cu 799 minute ‘o primato ‘e Castellini ‘e ‘nsuperabbilità (imbattibilità) casalinca; ‘a vacante: ‘o gollo pigliato facennose passà ‘o pallone ‘mmiez’ê ccosce; ‘a fessaria aggravata: chella ‘e metterse chella jettatoria divisa blu-savoia, quanno puteva metterse ‘a divisa verde pesiello ch’è auriosa !
SANTACROCE 6- – Nun sempe cuncentrato dint’ê chiusure,s’apparaje cu ‘ a velocità quanno lle sfujette ll’ommo.
CANNAVARO 5 – Culo’echiummo, soprattutto ‘e capa è ‘nu guajo passato. È storia vecchia e cumminfatte ‘e capa facette ‘a puttanata grossa e cunzentette a Acquafresca ‘e signà ‘o gollo d’ ‘o mumentaneo pareggio isulano; e ddicere ca Acquafresca nun era maje stato capace ‘e fà ‘nu gollo ô Napule... Ce vuleva culo’echiummo pe ce ‘o fa fà! Me dispiace ca Prandelli nun ll’à cunvucato p’ ‘a nazziunale ttaliana: puteva succedere ca, vedennolo, coccheduno se ne fosse annammurato, s’ ‘o fosse accattato e ce avesse levato ‘o ‘mpiccio!
RUIZ 6 –Poco cunvincente durate ô primmo tempo, po però pigliaje ‘e mmesure e nun sbagliajecchiú.
Cumplessivamente però fuje troppo muollo (lento).
ZUNIGA 6- – Ô primmo tempo aizaje póvera; pe furtuna ca ô siconno tempo cercato cu fermezza ( con costanza) addiventaje ll’ommo ‘e cchiú ‘e ll’attacco cu accavallamiente (sovrapposizioni) ‘mpurtante,ca fruttajeno l’appassamiento ‘e nummero (superiorità numerica). Che bbella cosa ‘o corpo ‘e tacco ca avviaje ll’azzione d’ ‘o ricore. Peccato ca spisso spisso nun se capette cu Marekiaro.
PAZIENZA 6,5 – S’êtt’ ‘a ammesurà a palla pe bbia ca Yebdà scavallaje luntano, lassannolo sulo e fuje custretto quase isso sulo a usà rica e cumpasso mettenno ordine mmiezo ô campo.
YEBDA 6 – Perdette spisso ‘a posizzione lassano sulo a Michelino,po però specie ô siconno tempo migliuraje assieme a ttutta ‘a squatra.
DOSSENA 6+ – Arrivaje puntualmente ‘ncopp’â linia ‘e funno, ma nun andivinaje ‘nu crosso ‘mpurtante. Ne facette uno priggevole p’’a capa d’ ‘o fruttajuolo ca però centraje ‘o palo. Fuje custretto a ascí pe prubbleme ‘e gammuncielle (per problemi muscolari). (dô 37° st ARONICA 6,5. Pochi minuti abbastajeno pe scungiurà ‘e capa ‘na facenna arresecata (rischiosa). Facette valé ‘o mestiere e ‘a frischezza soja).
HAMSIK 7+ – Ô pprincipio fuje marcato a vvista comme fósse ‘nu ricercato; ô siconno tempo decidètte ‘e fà ‘o quarto d’ora, anze – ajere – ‘a mez’ora soja e facette ‘o prufessore mettenno ‘o scarpino dinto a ògne azzione periculosa d’ ‘e luvarde. Eccezziunale ‘o passaggio p’ ‘o siconno gollo ‘e Cavani. (33′ st MASCARA sv)
LAVEZZI 6,5 – Cu ttutt’ ‘e squatre ca, comme ‘o Cagliari d’ajere, jocano acussí nchiuse, quase a catenaccio, ‘o cuntrollo ‘e palla e ll’accelerazzione soje so’ fundamentale; cumminfatte facette vedé ‘e surece verde a chiunque capitaje dint’â zzona soja, cumpreso l’arbitro Damato ca isso s’êtt’ ‘a scartà ‘nu paro ‘e vote e ca se ne vendicaje ammunennolo ‘ngiustamente! ‘Nu paro ‘e passagge fenomenali cu Marechiare e se ne jette dribblanno ‘e bbirille isulane e prucuranno ‘o ricore d’ ‘o primmo vantaggio luvardo.
CAVANI 7,5 – Se vedette ca fisicamente nun è cchillo d’ ‘e tiempe bbelle, ma ‘o ricore trasfurmato cu freddezza e precisione lle dètte ‘a fiducia nicessaria e accussí jette a radduppià, cu ‘nu pallunetto coppola ê ddenocchie (da riverenza). Si è turnato a essere ‘o Matadorro ca sapimmo, ‘o Napule po’ permetterse tutt’ ‘e suonne!
All. MAZZARRI 6,5 – Dinto â primma frazzione patette l’accurtenza tattica ‘e Donadoni, ma po evidentemente ‘na bbona scartata (una strigliata) ê suĵe dint’ê spogliatoje facette cagnà faccia â squatra , e ‘o Napule jette a pigliarse tre punte d’oro!
Arb. DAMATO 4 Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchi mise dê ‘nguacchie fatte a Udine,tentaje ‘e tutto pe dà fastidio â luvarde mettennose pe ‘mmiez’ê piere d’ ‘e napulitane custrette a scartà primma a isso e ppo a ll’isulane e nun vedenno ‘o juoco viulento e pruvucatorio d’ ‘e delinquente ‘e Cellini; nun putette fà a mmeno ‘e dà ‘o ricore ‘ncuollo a Llavezzi, ma po se ne pentette e â primma uccasione ll’ammunette - ingiustamente! – pe simulazzione!
Cu ‘na bbona salute! Ce sentimmo â prossima.
R.Bracale Brak
Nessun commento:
Posta un commento