PALERMO – NAPOLI (23.04.11) 2 A 1 LL’AGGIU VISTA ACCUSSÍ

PALERMO – NAPOLI (23.04.11) 2 A 1
LL’AGGIU VISTA ACCUSSÍ

Che peccato,che peccato! Perdenno ajere cu ‘o Palermo ce simmo ‘ntussecato tòrtano, pastiera e crapetto...’e oje.Pe ffurtuna pure Lazzio e Udinese ll’ànnu pigliato ‘ncopp’ê rrecchie...Ma nun putimmo campà ‘ncopp’ê ddisgrazzie ‘e ll’ate! Nun ce vuleva proprio! Êvemo fatto tanto pe zumpà ‘a cuollo a ll’Interra, e simmo jute a perdere cu ‘na squatra ca quacche semmana fa ne pigliaje sette da ll'Udinese.Nun ce pigliammo p’ ‘a parte cchiú famosa d’ ‘a Belen(na) : jucajemo malamente,e nun fujemo capace ‘e prufittà ‘e n’arbitraggio a ffavore (Damato, forze pe farse perdunà ca ati vvote ce aveva trattata malamente, ajere ce sparagnaje ‘nu cartellino russo a Michelino Pazienza,e nun dètte ô Palermo ‘nu ricore pe ‘nu mane ‘e Campagnaro...), jucajemo malamente mentre lloro, ll’isulane ce dettero ‘na mano sbaglianno l'impussibbile sotto porta. Io speravo ca l'avessero pavate tutte chilli sbaglie, e ‘mmece niente: chi t’ ‘o ddà. Ma è nnaturale! Quanno s’ accummencia ‘na partita mettenneso ‘ncuollo chella jettatoria divisa blu- savoia (inutilmente, giacché ‘o Palermo teneva ‘na divisa rosa-femmeniello ca nun se po’ cunfonnere cu cchella luvarda d’ ‘o Napule...), che nne vuó sperà? Quanno n’allenatore nun legge bbuono ‘a partita e nun s’accorge ca Maggio è cumpletamente spumpato mentre ll’avverzario diretto suĵo, Balzaretti, tène ‘e sette spirete...; quanno Marekiaro nun è stato capace pe tutt’ ‘a partita manco ‘e fà ‘o solito quarto d’ ora suĵo...,quanno tutt’ ‘a squatra è stanca, visto ca a ttirà ‘a carretta so’ sempe ‘e stesse (giacché Mazzarri nun è capace ‘e gestí cchiú ‘e tridice, quattuordice perzone e vvo’ ‘a panca corta) è nnaturale ca êva ‘a ferní a vvrenna!

Cumunque mancano quatto jurnate.’E cchiacchiere e ‘e suonne (ca stanno a zzero) lassammo ‘e pperdere e penzammo ca tenimmo ancòra cinche punte ‘e vantaggio ‘ncopp’â Lazzio... Chesto sulo ce à dda ‘nteressà a ‘stu mumento. Si nun facimmo ati ffessarie grosse, stammo dint’â Ciampionsa e (pe ccomme èramo partute) fosse ‘nu risultato majateco (un grandissimo risultato).Pe mme avimmo ggià fatto ‘o campiunato nuosto e âmm’ ‘a rimannà a ll’anno ca vène ’e pruggette cchiú ‘mpurtante... ‘A mo a gghí ‘nnante, pe cchello ca resta serve sulo tené m’a capa ‘ncapo pe sfruttà bbuone bene ‘e turne casalinche vattenno assulutamente assolutamente ‘o Ggenoa e ‘o Lecce speranno ‘e nun perdere ‘o terzo posto (allimmeno chillo!).E passammo ê ppaggelle; ma v’avviso ca siccomme stammo a Ppasca so’ stato ‘e maneca larga e aggiu dato miezu punto ‘e cchiú a ttutte quante!
DE SANCTIS 5.5: êsse pututo fà coccosa ‘e cchiú ‘ncopp’ô diaconale ‘e Balzaretti, ma facette ‘nu bbuono ‘ntervento ‘ncoppa a Hernandezzo.
CAMPAGNARO 5,5: ‘a chiena e ‘a vacante
CRIBARI 5,5: ‘E cchiú nun putette fà cu n’arillo comme Hernandezzo ca quacche vvota ‘o mettette ‘ndifficultà, ma – pe furtuna – senza conzeguenze!
RUIZ 5,5: A ccierti mumente fuje ‘nu poco ‘ndiciso, ma nun facette marrune gruosse (grossi errori)
MAGGIO 3.5: Cu Marechiaro, ‘o pejo d’ ‘o mazzo;spumpato nun prupunette, nè difennette; fósse stato meglio levarlo ggià mmerzo ‘a mmità d’ ‘o primmo tempo!
PAZIENZA 4: Damatolle facette ‘a grazzia ‘e nun sventularle sott’ô naso ‘o siconno cartellino jalizzo e cchillu russo pe ‘nu gruosso e ffesso sbarione dinto a ll’ aria ‘e ricore isulana .Cu ttutto chesto Mazzarri aspettaje ancòra primma ‘e cagnarlo. Pur’ isso stracquo a centrocampo nun ‘a pigliaje quase maje!
GARGANO 5,5: assaje meglio ‘e ll’urdeme asciute, ma dint’â ‘mbrugliata ggenerale pur’isso perdette ‘a tramuntana. DOSSENA 5: Pur’ isso stracquo ô pprincipio facette quacche cusarella , po, passanno ‘e minute, se perdette e aizaje póvera...
HAMSIK 4: Nun facette manco ‘o solito quarto d’ora suĵo:’e palle ca tuccaje durante tutta ‘a partita se ponno tranquillamente cuntà ‘ncopp’ê ddete ‘e ‘ma mana.
MASCARA 5,5: Cu ttutto ca nun è Lavezzi, pruvaje a dannarse ll'anema,facenno ‘o juoco d’ ‘o Pocho, ma dint’â ‘mbrugliata ggenerale pur’isso nun truvaje maje ‘na soluzzione decente.
CAVANI 5,5: partette a ccapa sotta,e doppo duje minute signaje pure ‘o ricore, dimustranno ‘e avé curaggio e determinazzione e d’avé smaltita ‘a delusione d’ ‘o ricore sbagliato cu ll’Udinese; purtroppo stracquo comm’è ô siconno tempo nun ne ‘ncarraje una!
ZUNIGA 5,5: assaje meglio a ppietto cu Mmaggio, ma tutte chelli finte e controfinte cuntinue, quasi maje riuscetteno a ggenerà coccosa seriamente periculosa
YEBDA 5,5: fatto nuovo meglio ‘nfase ‘e costruzzione,ca quanno se trattaje ‘e tampunà o mettere ‘na pezza; e cumminfatte spisso perdette ‘o scontro cu ll’avverzarie facciaffronte (dirimpettai).
LUCARELLI 5: l'aità se facette sèntere e Bovo e Munoz lo ll’anticipajeno puntualmente.
MAZZARRI 4,5: Cu ‘nu poco ‘e curaggio avesse pututo levà pe ttiempo dô campo a Maggio e a Pazienza, evitanno cunzeguenze toste p’ ‘a partita ca cumunque sbagliaje a lleggere

DAMATO 4,5: Sbagliaje assaje, sfavurenno soprattutto ‘o Palermo, ma nun cagnaje ‘o binario d’ ‘a partita!
E fermammoce cca! Avverto sulamente ca pe comme ‘a veco io, ‘o mumento cchiú difficultuso ca à dda ggestí Mazzarri é proprio chisto. ‘A squatra po’ sènterse suddisfatta ‘e chello ca à fatto nfino a mmo, essere convinta ‘e avé purtato â casa ‘a partecipazione â Ciampionsa e cunzeguentemente sbracà, futtennose ‘e ll’urdimi partite, cosa chesta ca facesse svapurà tutto ‘o bbuono fatto nfino a mmo.Sperammo ca no e ca ghiettassero chella divisa jettatoria! Santa Pasqua e bbona salute pe tutte. Ce sentimmo.
R.Bracale Brak