MUORTO ‘NU PAPA SE NE FA N’ATO!

MUORTO ‘NU PAPA SE NE FA N’ATO!
Ê cari amice e a ttutte ‘e tifuse d’ ‘o Napule a ‘stu mumento voglio sulo dicere ‘na cosa per quanto riguarda tutt’ ‘a tarantella ca se sta facenno attuorno ô fatto ca misterro Mazzarri se nne va o rummane. Pe comme ‘a veco i’ forze nun è proprio ‘na disgrazzia si Mazzarri se nne va... Muorto ‘nu papa se ne fa ssempe n’ato! Certo cu tutto chello che à fatto a Nnapule, è overo ca ll’âmm’ ‘a ringrazzià! Nun dico ‘e no, ma forze a ‘stu mumento ô Napule pe crescere serve n’allenatore cu ‘nu poco ‘e ‘sperienzia ‘nternazzionale, n’allenatore capace ‘e amministrà ‘nu cumplesso ‘e vintiquatte jucature tutte bbuone e de livello superiore; Sí pecché, guardannoce dint’a ll’uocchie e parlanno seriamente ...’a coppa campioni nun ‘a putimmo jí a ffà cu culo’echiummo, Mascara, Aronica, Lucarelli,Sosa,Gargano, Zuniga e ate comme a lloro ca nun danno nisciuna sicurezza e ffanno continuamente ‘a chiena e ‘a vacante; è inutile annasconnerse addereto a ‘nu dito: ‘o Napule à dda tené dduje Cavani dduje Lavezzi,dduje Marekiaro, dduje Campagnaro,ecc, si no ‘ncoppa Campione, jammo a ffà fijurelle marrò e facimmo ‘a parte d’ ‘o Cral Cirio quanno ‘na vita fa ô Vommero veneva a allenà ‘o Napule...
Peccato ca a Nnapule quanno se sta pe ffà coccosa ca putesse dà lustro â città ecco ca se rompono ‘e ggiarretelle e succede ‘na disturbata... Ma è possibile ca ‘a Suggietà nun riesce a ffà chiarezza ‘ncopp’ a ‘sta storia d’ ‘o misterro ‘mpredicato ‘e passà â rubbentussa....
‘E ccose so’ ddoje: o â S.S.C. Napule fa commeto perdere ‘o tecnico oppure è isso ca s’è talmente muntato ‘a capa e vo’ dimustrà ch’è capace ‘e fà jennosene a Tturino (sponna janca e nnera) a risuscità ‘e catavere!Se ne vo’ jí?! E se nne jesse, ca nisciuno ‘o trattène: Chella cammisa ca nun vo’ sta cu tte stràcciala e ghièttala.......
E ppe mme fosse ‘o mumento, si Mazzarri lassa, ‘e piglià n’allenatore serio e sette parme ‘e ca**o, cioè ‘e piglià a Hidding l'ulandese ca a pparere mio doppo ‘e Mou è ‘o meglio ‘e tutte quante, tène ‘sperienzia ‘nternazzionale e ssape amministrà ‘a panca longa!
R.Bracale Brak