NAPOLI – VILLAREAL (27.09.11) 2 A 0!LL’AGGIU VISTA ACCUSSÍ

NAPOLI – VILLAREAL (27.09.11) 2 A 0!
LL’AGGIU VISTA ACCUSSÍ

Tengo ‘o core mio luvardo dint’ô zzuccaro, guagliú! Doppo d’ ‘o sciuliamazzo ‘e Verona e ‘o miezu passo favezo ‘ncasa cu ‘a Fiorentina,finalmente ‘na partita cu sette parme ‘e chello ca sapite vuje...Vuó vedé ca – comme vo’ Mazzarri - ‘e guagliune cuane ànnu miso ‘mprimmese ‘a Ciampionsa o ppo ‘o campiunato? Vallo a ssapé! Cert’è ca ajere a ssera dinto a ‘nu san Paolo ca cantava ‘ncoro: Oj vita..., oj vita mia! ‘nu granne Napule urdinato e cuncreto se levaje ‘e pacchere ‘a faccia mazzianno ê spagnuole ca ll’anno passato ll’aveva eliminato da ll’E.L. Venenno â partita i’ dico ca si ‘o Napule jucasse sempe comme jucaje ajere ssera ô primmo tempo..., si jucasse sempe accussí overamente s’ ‘a putesse jucà ‘mparo cu tutte quante! Avevo ditto a ll’amico Sasà doppo d’ ‘a partita cu ‘a Fiorentina ca ‘a partita d’ajere ssera e cchella ‘e sapato ca vene contro a ll'Inter(re) c’êssero fatto capí qua’ tempurata(stagione) ce aspettava;ora mo pozzo dicere ca sapimmo ‘e jucarce ‘nCiampionsa ‘a qualificazione pe ll’uttave fino a ll'urdema partita d’ ‘o ggirone, e mmo me parono mill’anne ca vène sàpato pe vedé si dimustrammo ‘e puté fà ‘na bbella fijura pure ‘ncampiunato; peccato ca quase certamente s’ â dda fà a mmeno ‘e Cavani e d’ ‘o Pocho ‘nfurtunate e nun tenimmo sustitute all’ardezza grazzie a Aurelione, a Bbiguncino e a Mazzarri! Passammo ê paggelle:
DE SANCTIS 6 - Poco ‘mpignato. ‘Na vota tanta ‘a difesa luvarda le cuncedette ‘na serata tranquilla.

CAMPAGNARO 7,5. – Chisto sí ch’e ‘nu bbellu jucatore: ‘nu muro. Si sta bbuono , ce stanno pochi difenzori forti comme a isso dint’ê ddoje fase: difesa e ripartenza

CANNAVARO 6-. – Accumminciaje facenno ‘na puttanata cu ‘nu rinvio ca rimpallaje ‘ncuollo a Aronica e turnaje periculosamente arreto, ma po riuscette a mettere ‘a musarola ô spauracchio Pepito Rossi, pure si s’avette arrangià ‘nu paro ‘e vote e poco mancaje ca nun prucurasse dduje ricure. Pigliaje ‘ngenuamente ‘nu cartellino jalizzo, ma cummannaje quase a mmestiere ‘e muvimente d’ ‘a difesa.

ARONICA 7. - Pronti via: ammunito. M’aspettaje pirciò ‘na partita ‘ndifficultà e ‘mmece ‘o difenzore palermitano sfuderaje ‘na prestazione furmidabbile!Tène sulo mestiere, ma serve e ccomme!

ZUNIGA 6,5 - Peccato p’ ‘e cruzze (per i cross) poco pricise, ma zumpaje ll’ommo e raramente perdette palla. Pusitivo sia ‘nfase ‘e puzamiento (spinta) ca ‘ncupertura.

INLER 7 – ‘Ncrescenza a ppietto a ll’urdimi vvote. ‘Nu centrocampista ‘e carattere e perzunalità ca nun se fa passà ‘a mosca p’ ‘o naso e nun molla maje... Êsse ‘a pruvà a ttirà cchiú assaje ‘mporta, isso ca tène ‘nu tiro murtifero.

GARGANO 8 – ‘E solite passagge sbagliate ( ca però, pe ffurtuna, calano a vista d'ucchio) nun avettero ‘nfluenza (incisero) ‘ncopp’â prestazzione soja overamente cratista (ottima)! Durante ô primmo tempo distruggette ê centrocampisti e a ll’attaccanti spagnuole.Uragano Gargano à dda tènere tre pulmune...

DOSSENA 6,5 – Pochi cruzze, ma tanta corza,’nu guverno savante (sapiente) d’ ‘o pallone e ‘na diacunale acàbbata (perfetta) p’ avventà (per sventare) n'accasione ‘mpurtante d’ ‘e spagnuole.

HAMSIK 7 - Furtuna vulette ca Marekiaro decidette ‘e fà subbeto ‘o quarto d’ora suĵo dimustrannose ‘e jaccio ô mumento d’ ‘a redda e ppo sempe presente dint’ô vvivo d’ ‘o juoco. Peccato ca nun venettero premiati ‘nu paro ‘e ‘nsertamiente (inserimenti).
(Dô77°MASCARA s.v.)

LAVEZZI 7,5 - Miezu voto ‘e cchiú pecché se sapeva ca ‘o Pocho nun era all’arribba (al top) eppure lla ‘nnante facette quase tutt’isso: aiúda (assist) e ricore prucurato durante ô primmo tempo,quanno spisso spisso mannaje ô manicomio ‘a retrocuardia d’ ‘o Villarreal; peccato ca ô siconno tiempo sciupaje ‘nu cuntropiede murtifero, ma cumplessivamente dimustraje d’èssere determinante e ca ‘o Napule nun se po’ permettere ‘o lusso ‘e tenerlo fora.
(Dô87°SANTANA s.v.)

CAVANI 7 – ‘E jaccio ‘ncopp’ô ricore quanno mannaje ‘o pallone ‘a cca e ‘o purtiere ‘a chell’ata parte; generuso comme a ssempe,ô primmo tempo sbagliaje retissantamente (clamorosamente) ‘nu retropassaggio , ma ce ‘o pputimmo perdunà datosi ‘o contribbuto ca assicuraje sempe ê cuane.
( Da ll’82°PANDEV 5,5 – Nun facette ato ca pruvà a tènere ‘a palla..., ma è ppoco pe uno comme a isso! Purtroppo è assaje luntano ‘a ‘na forma fisica ca lle permettesse ‘e fà quacche gghiucata a mestiere. Sperammo ca pe sàpato se migliora allimmeno ‘nu poco!)




All. MAZZARRI 7,5 – ‘O Napule durante ô primmo tempo juocaje a mmemoria. ‘A cunnizzione fisica generale nun pare chella ‘e ll’anno passato, ma ‘a squatra ‘a cumpenzaje cu ccegna, carattere e vvoglia ‘e véncere, ca po so’ ‘e cqualità ca s’ ànn’ ‘a ricunoscere ô trainer(ro) cuano!
LL’ARBITRO 7 ‘Nu signor arbitro, pronto a siscà tutto e a ccundannà ‘e ffalte. Spicialmente chelle ‘a ricore.Succede quanno ‘o Napule trova n’arbitro ca nun sta ammanigliato cu ‘o Palazzo e nun è attaccato ô prezziosismo, â ricercatezza,â raffinatezza faveza d’ ‘o pallone taliano; Chi sa’ si Paolo Valeri se guardaje ‘a partita; forze se fósse ‘mparato comme se fa a arbitrà!
Bbona salute! Ce sentimmo
R.Bracale Brak