CRUSTINI ‘E FEGATIELLE

CRUSTINI ‘E FEGATIELLE

Chello ca serve pe sseje perzone
12 fellocce ‘e pane casareccio abbrustulute ô tiesto (a duiciento grade) o a sciamma auta;
8 -10 fegatielli ‘e purciello pe 500 gramme arravugliate dint’â rezza (omento) ‘nzieme (pe ògne fegatiello) a ‘na fronna ‘e lauro frisco;
‘Na cepolla ndurata ‘e Montoro rebbanata (affettata) fina fina;
‘Nu bicchiere ‘e vino russo,asciutto e de sustanza;
8 sulumiglie (filetti) ‘e alice salate levate ‘e sale e senza spina, o paro piso ‘e sulumiglie (filetti) d’alice salate sott’uoglio;
‘Nu bicchiere d’ uoglio ‘auliva dunciglio (e. v.p.s. a f.);
‘Nu cucchiaro ‘e chiappare levate ‘e sale e sciacquate;
sale fino e ppepe nero q. n. s.

Comme se fa
Dinto a ‘na granna tiella ‘e fierro niro mettere mità ‘e ll’uoglio, auní ‘a cepolla rebbanata (affettata) fina fina e a ffuoco allero farla abburrí (stufare) (senza farla appiccià );agnadí ‘e fegatielle arravugliate dint’â rezza,’nfonnerle cu ‘na tazza d’acqua vullente e lassarle cocere a a ffuoco allero allero; appena ca so’ cuotte e suassate (rosolati), levà ‘e fronne ‘e lauro, spezzettà ‘e fegatielle e metterle dinto a ‘nu mmiscatore (mixer), ‘nfunnennole cu ‘nu bicchiere ‘e vino russo;avvià ‘o mmiscatore a vvelocità sustenuta e appruntà ‘na crema ‘a tené a pparte; tenete da parte; fraditanto dinto â stessa tiella mettere ll’ata mmità d’uoglio e a ffuoco allero sciogliere l’alice salate ‘nzieme ê chiappare; auní ‘a crema ‘e fegatielle accuncianno ‘e sale e ppepe; fà ripiglià calore a ttutto ‘o cumposto e pprimma ca se fa friddo auntarlo (spalmarlo) ‘ncopp’ê crustine ca vanno servute caude caude comme sabrosa trasetura.
Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza ‘a magnà.
Mangia Napoli, bbona salute! Scialàteve e aggarbbatéve ‘o vernecale!
Raffaele Bracale