NAPOLI – JUVENTUS (29/11/11) 3 A 3LL’AGGIU VISTA ACCUSSÍ

NAPOLI – JUVENTUS (29/11/11) 3 A 3
LL’AGGIU VISTA ACCUSSÍ

Mannaggia chello ca ‘un se po’ ddicere, mannaggia! Guagliú âmmu sciupato ‘nu sangradale! Fino a ‘nu certo mumento d’ ‘o siconno tempo me s’era allariato ‘o core comme a ‘nu cufenaturo..., po ‘ncapo a ‘na ventina ‘e minute me scennette dint’ê cazette! E ggià! Nuje stévamo mettenno sotto ‘a vecchia zoccola janca e nnera pe tre a uno e chella capa fresca ‘e Mazzarri ‘mmece ‘e levà uno ‘e ll’attaccante (ch’êvano fatto ‘o lloro...)facenno trasí ‘nu difenzore ‘e cchiú e mettenno ‘a difesa a cquatto... che fa? Cagna ‘o difenzore ca nfi’ a cchillu mumento s’era cumpurtato meglio ‘e ll’ate... e rummane cu ‘a fissazziona soja d’ ‘a difesa a ttre! Me fósse dato cu ‘a capa dint’ô telaro d’ ‘e llastre! Cose ‘e ll’atu munno; robba ca sulo a Nnapule se fa! E accussí fernette ca ‘a rubbentús(sa) ricuperaje ddoje redde e ‘nchiudette ‘a partita ‘ncopp’ô tre a ttre ca pe mme fuje comme a ‘na curtellata dint’a ‘nu scianco. Passammo ê ppaggelle:
DE SANCTIS 5 Pigliaje tre rredde doppo meza partita passata a guardà ‘e stelle; ‘ncopp’a ‘nu pare ‘e redde êsse pututo fà coccosa ‘e cchiú e nun ‘a facette!
CAMPAGNARO 5 ‘O Toro me parette ‘nu poco stanco e ‘mpriciso: dâ parta soja ‘a rubbentús(sa) signaje ddoje redde e isso spisso nun accumpagnaje ll'azione; se vedette ca nun steva ‘nforma.
CANNAVARO 5 Ddoje bboni cchiusureue chiusure cancellate quanno se perdette a Matri ‘ncopp’ ô doje a uno.
ARONICA 6 Ll’unico d’ ‘a difesa a dà sicurezza, Mazzarri stranamente n’ ‘o facette ascí e ghièttemo dint’ê chiavette! (dô 75° FERNANDEZ s.v.)
MAGGIO 5,5 Estigarribia fuje n’accunto cchiú scurbutico d’ ‘o previsto peggiore del previsto.’O cuano s’abbuscaje n'ammunizzione scema e rummanette cundiziunato p’ ‘o riesto d’ ‘a partita.Ll’unica cosa overo bbella fuje ll’ajuda pe Pandev!
GARGANO 5,5 Tantu muvimento, ‘na granna pirciata (apertura) pe Lavezzi, ma pure ‘e ssolete smarrunate ‘e pricisione. ‘A terza redda juventina nascette ‘a ‘na palla ch’isso ‘ngenuamente perdette.
INLER 5,5 Se vedette ca ‘o turco napulitano nun è ancòra a ll’arribba (al top): timido ‘ncostruzzione ‘e juoco e liggiero pe ll’ interdizzione tanto è vvero ca cunzentette a Ppepe, ‘ncopp’â terza redda juventina, ‘e fà ll’ancarella ô lemmeto ‘e ll’area luvarda senza sbilanciarlo (cu ‘na ciancata) manco ‘e tanto!
ZUNIGA 6,5 Peccato ca nun riuscette a ttruvà ‘a cuntinuità nicessaria pe ttutta ‘a partita e alternaje mumente pusitive cu mumente ‘e stanchezza. (da ll’ 81° DOSSENA s.v.)
HAMSIK 6- Tutto summato ‘nu bbuonu primmo tempo ‘a fora d’ ‘o ricore sbagliato pe mancanza ‘e cuncentrazzione; calaje ô siconno tempo quanno s’êtte adattà a ccuntrastà sulamente.

PANDEV 7 Ll’êvo sempe scritto ca se trattava d’aspettarlo... e finalmente, quase certamente, àmmo ritruvato n'alternativa ô trebbeto d’ ‘e meraviglie: ‘a siconna redda fuje ‘nu sciucquaglio! (dô 71° SANTANA s.v.)
LAVEZZI 7 Sbagliaje spisso assaje, ma currette pe ttre e cu ttutto ca ‘o muzzulajeno scientificamente fuje ll'unico ca zumpaje ll'ommo crianno ‘a superiorità nummereca.
All. MAZZARRI 4,5 ‘Stu pareggio ‘o tène tutt’isso ‘ncopp’â cuscienza soja! Sí ‘a scuatra ô primmo tempo jucaje overamente bbuono e ‘o doje a zzero p’ ‘e cuane ‘o dimustraje. Quanno però, ô siconno tempo êtte ‘a gestí ‘e cagne nun ne ncarraje miezo; ‘mprimmese êsse avuto mettere Dzemaili e nno Santana e ppo ‘ncopp’ô tre a uno pe nnuje, a vvintiduje minute dâ fine, te vuó tutelà mettenno ‘a difesa a cquatto?’Mmece no! Capoteco pejo ‘e ‘nu mulo sardagnuolo levaje a Aronica e ‘ndebbulette tutt’ ‘a difesa. Dich’i’: “Te sî ffissato cu ‘sta difesa a ttre? Vuó fà trasí a Fernandez(zo)? E fall’ ‘o trasí, ma leva a Cannavaro o a Campagnaro, ma no a Aronica ca sta mantenenno ‘o carro p’ ‘a scesa”... Ma quase certamente i’ nun ne capisco niente ‘e pallone e pparlo ‘a tifoso antijuventino e nno dâ nascita,ma ‘a dint’â placenta e ajere me fósse arrecriato si ‘a televisione avesse dato ‘a nutizzia ca s’era sfravecato ‘o tturreno ‘e sotto a ll’hotel Parker ca sgarrupannose êsse arricettato tutte chille (juventine) ca stevano dinto!
Arbitro TAGLIAVENTO 4,5 – , Vulesse proprio vedé ‘o cummissario ‘e campo comme ll’à trattato a cchisto parrucchiere ‘e Terni (ca si fa tinture e ppermanente comme arbitraje ajere ssera... ‘e ssignore lle scippano ‘a faccia). Ajeressera ‘stu ‘ntontero sistematicamente se ne futtette d’ ‘o recolamento e ‘e ffalte ‘e ssiscaje ô ccuntrario pe nun parlà d’ ‘o ricore fatto ripetere quanno appriesso a Hamsik dinto a ll’area nun c’era trasuto sulo Inler, ma cinche juventine;doppo d’ ‘o ricore po se facette scappà ‘a mano ‘a partita e poco mancaje ca nun fernesse a mazzate. Fossero state nicessarie quacche cartellino jalizzo o russo ‘e cchiú spicialmente cu chilli delinquenti futtute d’ ‘e jucature ‘e Conte ca facettero ‘e guappe e ‘e pruvucature!
E mettimmo punto cca. Ce sentimmo. Staveti bbe’!
R. Bracale Brak