VILLAREAL – NAPOLI (07.12.11) 2 A 0! LL’AGGIU VISTA ACCUSSÍ

VILLAREAL – NAPOLI (07.12.11) 2 A 0!
LL’AGGIU VISTA ACCUSSÍ


Che suddisfazzione luvarda, che cuntentezza guagliú! Ajeressera ô Madrigal(e) ‘o Napule (comme facette a ll’annata) dètte dduje bbuffettune ê canarine spagnuole jettannole fora dâ Ciampionsa e classificannose pe ll’ottave ‘e finale comme, si nun me sbaglio, ê tiempe bbelle ‘e Maradona! Nun ce scurdammo guagliú ca a Villariale nisciuna scuatra ttaliana era maje riuscita a azzuppà tutt’ ‘a fresella d’ ‘e tre ppunte. E ce riuscettero ‘e guagliune ‘e Mazzarri,ca – ‘na vota tanto scennettero ‘ncampo cu ‘na fissa sola ‘ncapa: chella ‘e vencere, dimustranno, spicialmente ô siconno tempo, ‘e vulerlo fà a ttutt’ ‘e coste e credennoce sempe pure quanno arrivaje ‘a nutizzia ca ‘o Manciaster(ro) steva paccherianno ‘o Bayern(o) e quanno chille d’ ‘o sottomarino jalizzo accumminciajeno a avutà ‘a valanza â via d’ ‘o ggruosso, tentanno ‘e ascí a cchi sî ttu e cchi songh’ i’! P’ ‘o mumento cu ‘stu passaggio a ll’ottave ‘nciampionsa, ‘a tempurata luvarda si nun è gluriosa, è suddisfacente... E nun ce mettimmo palille o burnie (limiti): ll’appetito vène magnanno e ‘sta scuatra d’‘e guagliune ‘e Mazzarri po’ ffarce granni surprese e ddarce ggranni suddisfazzione, p’ ‘a joja nosta e p’ ‘a cuntentezza d’ ‘o cogliapiecuro ‘e Aurelione ca sulo a cchello penza! Passammo ê ppaggelle:
DE SANCTIS 7 Poco ‘mpignato, sfuderaje ddoje granni parate dicisive, soprattuto chella sott’â fine, dimustranno d’essere ‘nu purtiere ‘nternazziunale!
ARONICA 7,5 Ati vvote capitaje ca pure facenno ‘a jucata justa me faceva vení ‘o fruiddo ‘ncuollo, ma ajeressera nun sbagliaje proprio niente e gghiucaje overo bbuono!
CANNAVARO 7 Avette ‘a furtuna ca Nilmar d’ajeressera nun ‘o vulette fà, ma ‘o capitano si dimustraje sicuro cu ‘e piede e (chi ll’avesse ditto!) ppure cu ‘a capa. ‘Nzomma ‘na bbona partita. E si ‘o dich’i’ ca nun ‘o stimo, m’âte ‘a credere!
CAMPAGNARO 7,5 Chisto sí ch’e ‘nu bbellu jucatore: ‘nu muro. Si sta bbuono , ce stanno pochi difenzori forti comme a isso dint’ê ddoje fase: difesa e ripartenza e ajeressera ‘o ddimustraje cu ‘nu granne siconno tempo.
MAGGIO 6,5 Currette assaje, ma spisso a vvacante, appressuranno però custantemente; peccato ca ô primmo tempo sbagliaje ‘nu paro ‘e jucate ch’avessero pututo essere dicisive.
INLER 7 Dicímmola comm’è: chi non ll’avesse visto meglio ‘mpanca doppo d’ ‘e primme diece minute d’ ‘o siconno tempo? P’’a verità ‘nfatte ô primmo tempo jucaje senza zuco e ssenza sale... però doppo d’ ‘a granna bbotta ‘a fora ca arapette ‘a strata d’ ‘a vittoria luvarda, ‘o turco napulitano se scetaje lassanno ‘ntravvedé ca se sta mettenno ‘ncopp’â strata justa!
GARGANO 7 ‘Nu paro ‘e pirciate (aperture) sballate, ma facette ‘na pressione cuntinua e s’ammentaje quacche gghiucata assaje ‘nteressante. ‘Na partita ‘a ricurdà!
ZUNIGA 6– Pronti, via e se magnaje ‘na rredda retissanta (clamorosa),ch’êsse pututo cagnà faccia a ttutta ‘a partita.’O guaglione culumbiano jette meglio ‘ncupertura ca ‘nfase ‘e ‘mpurrata.
(Da ll’88° GRAVA s.v.).

HAMSIK 7 Pe tutt’ ‘a partita me parette ca nun partecipasse maje cu cunvinzione a ll’azziona. Pe ffurtuna soja e nnosta se facette truvà ô posto justo, ô mumento justo signanno (comme aveva prummiso) ‘a siconna redda, chella d’ ‘a sicurezza e d’ ‘a libberazzione; pirciò s’ammereta sette!
(dô 78° DZEMAILI s.v.)
LAVEZZI 8 Ancòra ‘na vota fuje isso l’aco d’ ‘a valanza mettenno ‘ndifficultà, stravacante e velituso (imprevedibile) tutt’ ‘o reparto arretrato d’’ e canarine accelleranno ‘mpruvvisamente e cuntinuatamente.N’ato arbitro ll’êsse accurdato ‘nu ricore quanno ll’ecchese udinese Zapata ‘o stennette mentr’isso era lanzato ‘mporta!
CAVANI 6 Maje cercato a dduvere dê cumpagne,se vedette assaje poco, ma riuscette a mettere ‘o zampino suĵo ‘ncopp’â redda ‘e Marekiaro; ‘a signalà ddoje chiusure difenzive ô primmo tempo.
(Da ll’81° PANDEV s.v.).
MAZZARRI 5, E nno pecché ‘o voglio male, ma pecché ô primmo tempo ‘a scuatra nun me piacette visto ca jucaje cuntratta e cu ‘o freno a mmano tirato, appalesanno tenzione e ppaura ‘e nun ce ‘a fà a ccentrà ‘a cualificazzione. Po’ paré assurdo, ma scuadra se sbluccaje doppo ca ll’arbitro nurvegese (allimmeno me pare) ‘o jettaje fora pe bbia ca ‘o cugliette a sbrunzulià a bbordo campo a Nilmar(ro) ca steva dànno ‘ncuollo a Totò Aronica.’O cumpurtamento d’’o tecnico livurnese fuje – a ddicere poco – strano, ma fuje pure ‘o signale d’ ‘a granna tensione ca currette ‘ncampo e ‘mpanca. E â fine d’ ‘a ggiostra s’ à da ricunoscere ca ‘sta storica cualificazzione porta ‘a firma soja!
LL’ARBITRO (me pare nurvegese e nun ne saccio ‘o nomme)4,5 Troppo guaglione pe ‘na partita comme e cchella d’ajeressera, facette cchiú ‘e ‘na fessaria:ademasso ll’avé cunzentito pe tutt’ ‘a partita (specie ô siconno tempo) ê spagnuole ‘nu juoco faltuso e viulento nun dètte ‘nu ricore ô Napule pe vraccio vuluntario ‘e Angel Lopez ô 16°, nun ghiettaje fora a Zapata pe ffalta d’urdemo ommo ‘ncuollo a Lavezzi lanzato ‘mporta ô 22°. Durante ô ricupero po nchiudette tre uocchie pe nun vedé e sanziunà ‘o cazzotto ca Aronica s’abbuscaje ‘nfaccia.
‘Ncuncrusione ‘o Napule passaje ‘o turno piazzannose ‘nfra ‘e pprimme sidece scuatre d’Airopa, trasenno dint’ â storia spurtiva d’ ‘o cuntinente, e soprattutto cunfermmannose ll’urgoglio ‘e ‘na città spisso murtificata, ‘nzuzzata dê ffetenzie d’ ‘e fatte ‘e cronaca ‘e tutt’ ‘e juorne fernenno d’essere ‘a Cennerentula d’ ‘o ggirone e addivintanno ‘a surpresa d’ ‘o turneo! E mmo? Mo tutto po’ succedere: stammo tutte sott’ô Cielo... Vamos Napule! Adelante! Simmo tutte cu tte!
Ce sentimmo.
R.Bracale Brak