MAFARDINE CAMPAGNOLE

MAFARDINE CAMPAGNOLE

chello ca ce vo’ pe sseje perzone
600 gramme ‘e mafardine
250 gramme ‘e funge purcine,
250 gramme (piso lisso) ‘e pesielle ammunnate,
2 pastenache,
‘na cepolla ndurata ‘e Muntoro ntretata,
‘nu spiculo d’aglio ammunnato e ntretato finu fino,
‘nu bicchiere e mmieze d’ uoglio’auliva dunciglio,
ddoje carcioffole viulette napulitane,
sale duppio ‘na vrancata e ‘na presa,
pepe janco mmacenato a ffrisco q.n.s.
100 gramme ‘e caso pecurino rattato finu fino,
‘nu tuppeto ‘e prutusino lavato,asciuttato e ntretato finu fino.

comme se fa

Spuntà,arrasà (raschiare) ‘e pastenache, tagliarle a ffarinule( dadini) e sciacquarle; ammumnnà ‘e carcioffole levà a barba,tagliarle p’ ‘o lluongo a pacchetelle suttile e sciacquarle;pulezzà ‘e funge cu ‘nu curtelluccio affilato e ‘na mappina ‘nfosa e tagliarle p’ ‘o lluongo a pacchetelle suttile.
Mettere a ffuco allero ‘na prupurziunata tiella cu ‘a mmità ‘e ll’uoglio e ffù pigliù culore â cepolla ntretata;agnadirce ‘e ffarinule ‘e pastenache, ‘e pesielle, ‘nu cuppeniello d’acqua vullente, avascià ‘o ffuoco e lassà coòcere pe ddiece minute; accuncià cu ‘na presa ‘e sale duppio e ‘na mmacenata ‘e pepe. Ricà ll’uoglio rummaso dinto a n’ata prupurziunata tiella, aumentà ‘o ffuoco e fù piglià culore ô trigliato d’aglio; dallà (quindi) suassarve pe cinche minute ‘e pacchetelle ‘e carcioffole ‘nfunnennole cu ppoca acqua vullente;agnadí ‘e funge, accuncià ‘e sale e ppepe e lassà cocere pe cquatto minute. A chistu punto auní carcioffole e funge ô cumposto ‘e pesielle e pastenache tenenno ‘a tiella a ffuoco allero pe n’ati ccinche minute. Arvere teniente teniente ‘e mafardine dinto a otto litre d’acqua vullente salata (vrancata ‘e sale duppio); scularle vierde vierde, revacarle dint’ â tiella cu ‘a cunnimma appruntata, ammiscà a mmestiere, derrammarle cu ‘o ccaso pecurino e fora d’ ‘o ffuoco cu ‘o tuppeto ‘e prutusino lavato,asciuttato e ntretato finu fino.
‘Mpiattà e sserví súbbeto caude ‘e fuculare. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
raffaele bracale