NAPOLI – CHELSEA (21/2/12) 3 A 1!!!LL’AGGIU VISTA ACCUSSÍ

NAPOLI – CHELSEA (21/2/12) 3 A 1!!!
LL’AGGIU VISTA ACCUSSÍ

Ca se puteva vencere me ll’aspettavo guagliú, ma che se vincesse cu ttanta larghezza (e addirittura se nn’êssero pututo fà quatto o cinche) fuje ‘na surpresa e si nun fósse stato pe cchella fetenzia ‘e culo’echiummo-Cannavaro ca facette ‘nu fullone retissanto rijalanno ‘nu pallone commeto commeto ô diece d’ ‘o Chelsea, ca nun se facette prijà e ffuttette a De Sanctis purtanno ‘nvantaggio ‘e ‘ngrese...,si nun fósse stato pe culo’echiummo, se fósse vinciuto cchiú chiaramente e ‘a rencontra ‘e ritorno avesse pututo essere ‘na furmalità; mo ‘mmece pe comme stanno ‘e ccose, ‘a qualificazzione nun è ancòra ccerta e pe passà ‘o turno ‘nfra quinnece juorne s’ à dda jí a sputà sanco ‘ncopp’ ô campo lloro... E pirciò p’ ‘o mumento putimmo festiggià sulo p’ ‘a mmità e ce avimmo ‘a rassignà a ppenzà ca nun è ancòra fernuta, ma ‘o suonno d’ ‘e quarte è a purtata ‘e mano; è overo ca ‘o Napule apprimma vedette ‘e streche e ‘o mammone,ma po rimuntaje ‘o Chelsea (ca s’era avvantaggiato cu Mata (puttanata ‘e Cannavaro)) cu ‘na pareglia(doppietta) ‘e Lavezzi e cu Ccavani cu ‘nu tre a uno ca ô Stamford(o) Bridge‘nfra quinnece juorne ce tocca ‘e defennere cu ll’ogne e cu ‘e diente, ma i’ penzo ca ‘o Napule visto ajeressera ce ‘a po’ ffà cuiedamente (tranquillamente), spicialmente si Mazzarri ‘mmece d’ ‘o difennere lassa â casa a cchillu purpo ‘e Cannavaro e ffa jucà a ccentro a Aronica e ‘ncopp’â mancina a Britos(so), tenennose ‘e scorta a Fernandez(zo) e a Ggrava... Passammo ê ppaggelle:
DE SANCTIS 5,5: Nun tenette corpe ‘ncopp’â rredda ‘ngrese, ma sbagliaje ddoje o tre asciute. Sentette troppo ‘a rencontra e quacche vvote nun dètte ‘a nicessaria sicurezza ca ‘e cumpagne s’aspettano ‘a ‘nu purtiere.
CAMPAGNARO 7: ‘Nu gialante! Drogbà e Sturridge ‘o pigliajeno ‘e mira massacrannolo ‘e mazzate.Doppo ‘na capata cu Drogbà ca (e ppe mme ‘o ffacette apposta...) ‘o sciaccaje a ssanco, ‘o Toro strignette ‘e diente e rumanette ‘ncampo pe tutte ‘e nuvanta minute cuntinuanno a luttà ‘nceruttato e mmerecato cu ccegna e ccarattere. D” pparte soje nun se passaje; ato ca ‘nfortunio, ‘o Toro nun se fermaje maje.
CANNAVARO 3,5:È ‘nu guajo passato! ‘A negazzione d’ ‘o juoco d’ ‘o pallone! Quacche amico ‘nzisteva a ddicere ca se trattaje ‘e sfurtuna... Ma qua’ sfurtuna e sfurtuna! ‘O nquacchio ca cumbinaje dipennette esclusivamente dô fatto ca nun sape jucà a ppallone...Overamente è ‘a palla ô pere d’ ‘o Napule! Spero ca ô ritorno Mazzarri e Frustalupi ‘o lassano â casa!
ARONICA7,5: Ancòra ‘na prova straurdinaria d’ ‘o difenzore palermitano. ‘O putenziale uffenzivo d’ ‘e “blues” nun se discute,ma Totò nun s’appauraje. Assaje affattivo (efficacissimo) a ‘mpedí,ô siconno tempo ca Drogbà se truvasse a ttu ppe ttu cu De Sanctis.Furmidabbile.
MAGGIO 6,5: Doppo appena vinte minute facette ‘na primma ‘ncursione micidiale, ma Cech lle sbarraje ‘a strata. Da chille mumente nun se fermaje cchiú currenno comme a ‘nu dannato e servette assaje pure quanno redubblaje ‘ndifesa.Se facette stuppà ‘ncopp’â linia ‘e porta ‘o pallone a botta sicura, (ma tirato senza forza) d’ ‘o quatto a uno. Peccato!
INLER 6,5:Facette ‘nu poco ‘e fatica a tampunà ‘a velocità d’ ‘e centrocampiste avverzarie, ma ‘nfase ‘e costruzzione facette vedé ‘e qua’ bbona pasta è ffatto!. ‘O ddubblato (il raddoppio)’e Cavani nascette dê piere suĵe dimustranno d’avé revulato a mmestiere livella, filo a cchiummo e cumpasso.Me rummanette ‘a ‘mpressione ca ‘o turco-napulitano po’ ffà assaje ‘e cchiú tiranno ‘a luntano!
GARGANO 7: ‘Nu mastino napulitano, cu ttutto ca fisicamente addeventa sempe cchiú ssicco e ppiccerillo. Ê vvote fuje ‘mpriciso ma cumpenzaje cu ccorza cegna e appricazzione sfiatannose nfi’ a ll’urdimu minuto! ZUNIGA 6: ‘Nfase uffenziva, se perdette a ffà ‘o giocoliere cu nfente inutili e passaggi ‘mpricisi, dimustrannose utile ‘nfase difenziva,cu cchiú ‘e n’intervento dicisivo.
HAMSIK 5,5: ‘A vacante e ‘a chiena: ‘nu bruttu primmo tiempo, ma ô siconno ce mettette tanta quantità e cqualità e se sacrificaje assaje jenno a redubblà dint’â mità campo cuana pe po arremarrà (ripartire) ‘nvelocità. Po’ ffà meglio.(da ll’82° PANDEV s.v.)
LAVEZZI 8: E finalmente ‘o Pocho se sbluccaje pure ‘nCiampionsa. Anema e ccore ‘e chesta scuatra,p’ ‘o ‘ngappà ll’êtter’ ‘a vattere e mmettere ‘o ssale ‘ncopp’â coda. Se strafucaje ‘a pareglia perzunale ô pprincipio d’ ‘o siconno tiempo, ma po se facette perdunà pochi minuti doppo. Cu isso ‘ncampo ‘e tifuse cuane ponno stà tranquille! ( dô 74°DZEMAILI 6: Nun se facette piglià da ll’emuzzione; trasette súbbeto ‘mpartita cumbattenno vigurosamente.)

CAVANI 8: Coppola ê denocchie! Cech nun le cunzentette doppo sulo diece minute ‘e fà ascí pazzo ‘o San Paolo,ma ‘o Matadòrro ce riuscette ô stesso ô quarantacinquesimo d’ ‘o primmo tiempo.È n’artigliero (goleador) unico, ca segnaje pure ‘e pietto/spalla e gghiette sempe a ddà ‘na mano ê cumpagne, pe nun dicere d’ ‘a cegna e de ll’altruisemo sujo ô mumento d’ ‘o tre a uno! È unico!
ALL. FRUSTALUPI 7,5: Nun tène ‘o scartiello, ma se cunfermaje ‘o porta-bbuono (il talismano)luvardo; cu isso ‘mpanca ‘o Napule à sempe vinciuto e ppure ajeressera accussí fuje!S’era bbuono urganizzato cu Mazzarri ca – squalificato – rummanette a Castelvolturno e ‘o risultato fuje ca ‘o Napule riuscette tatticamente a struncà chilli quatte delinquente d’ ‘e guagliune ‘e Villas Boas ca lassaje ‘o san Paolo cu ‘o vveleno ‘mpont’ô musso. Cumplimenti allora sia a Mazzarri ca a Frustalupi ca nun sbagliajeno niente ‘a fora d’ ‘o fatto ‘e fà jucà a Cannavaro!
ARBITRO: Velasco Carballo (Spagna) 5 Troppo nsufferuto (permissivo ) cu ‘e “blues” ca, cu ‘a scusa d’ ‘o juoco a ll’ingrese, mazzulajeno scientificamente ê guagliune cuane senza ca isso dicesse niente!
Mo ‘o bbello à dda ancòra vení ‘nfra quinnece juorne ô Stamford(o) Bridge; p’ ‘o mumento però gudimmoce ‘sta vittoria e turnammo a penzà ô campionato; dummeneca ce attocca ll’Interre ‘e chillu sbruffone ‘e Ranieri, rumano, nquacchiato ‘e sossazza janca e nnera... e ò détto tutto!
Si dDi’ vo’ ce sentimmo lunnerí ca vene! Staveti be’
R.Bracale Brak