NAPOLI – CHIEVO 13.02.12 (2 A 0)LL’AGGIU VISTA ACCUSSÍ

NAPOLI – CHIEVO 13.02.12 (2 A 0)
LL’AGGIU VISTA ACCUSSÍ
Chella d’ajeressera guagliú fuje ‘na prova veramente ‘mpurtante p ‘ ‘e guagliune cuane e pe Mazzarri e rappresentaje ll’uccasione cchiú ‘mpurtante ‘e chist’urdimi tiempe; ‘e scunfitte casalinche ‘e ll’Interre e de ll’ Udinese c’erano jute dinto a n’uosso uffrennoce ll’urdema uppurtunità ‘e accuncià ‘a crassifica e dannoce quacche speranzella ‘e piazzamento decente ‘ncapiunato. Ma s’êv’ ‘a vencere e – pe ffurtuna ‘e guagliune ce riuscettero pure tenenno ‘e faccia ‘na scuatra tosta e ca dinto a ll’urdeme dduje anne ce aveva dato cchiú ‘e ‘nu buffettone. Ajeressera però ‘e ggiuvinotte s’arricurdajeno ca ‘ncasa, ‘ncampiunato nun vincevano dô vintuno dicembre passato e ca era ora ‘e scetarse dô suonno. E se scetajeno pure pecché giacchettella/capputtino-Mazzarri aveva ditto chiaramente ca s’êv’ ‘a vencere assulutamente, pure jucanno ‘na chiaveca.... comme si po ati vvote ‘o Napule avesse jucato bbuono! E lloro ll’accuntentajeno; jucajeno ‘ncasinate, a ppalla-fa’-tu,allimmeno nfi’ a cquanno nun passajeno ô quatto-quatto-doje, ma riuscettero a vvencere! Ora mo ‘o fatto cchiú significativo d’ ‘a vittoria d’ajeressera è ca ‘o distacco ca corre tra ‘e cuane e ‘o terzo posto addó mo sta attestata ‘a Lazzio ‘e Reja s’è arridutto a otto lunchezze e ssi – comme spero – ‘o fatto d’ajeressera nun è ffuoco ‘e paglia, putimmo sperà ‘e curmarla ‘sta distanza; resta però ‘arraggia ‘e avé jttato p’ ‘a via tanti punte cu troppi paregge e quacche scunfitta ca nun stanno nè ‘ncielo nè ‘nterra! A ‘stu punto‘o Napule s’è attestato ô settimo posto ‘ncrassifica ‘nsolitudine apprufittanno d’ ‘e passe fauze nun sulo ’e ll’Interre e de ll’Udinese,ma pure d’ ‘a Roma ( scunfitta a Ssiena ‘a Calaiò e cumpagne), purtannose a cquota 34 punte. E ce vuleva proprio ‘sta vittoria d’ ajeressera, visto ca ‘e cuane nun vincevano ‘a ll’otto gennajo passato; mo però jammo annanze cu ’e piede ‘nterra e facimmoce rispettà n’ata vota comme p’ ‘o ppassato, accummincianno ggià ‘a viernarí ca vene jenno a vvencere a Firenze e sperammo ca finalmente Mazzarri (ca cumunque se nn’à dda jí!....e primma ‘o ffà, meglio è!) sperammo ca finalmente à capito ‘a lezziona d’ajere e s’ è reso conto ca ’a scuatra sta cchiú presente dinto a ttutte ‘e zzone d’ ‘o campo e mmeglio sistimata cu ‘o quatto-quatto-doje; cumminfatte nun appena ‘o Napule cagnaje motulo, nun se currette nisciuno periculo e súbbeto se riuscette a ttirà ‘mporta..Beh ca fósse ‘a vota bbona ca giacchettella/capputtino-Mazzarri se fósse fatto capace??? Accussí êsse ‘a essere,m a ce spero poco, visto ca giacchettella/capputtino-Mazzarri tène ‘o cuoccio e ca ggià viernarí torna Cannavaro ca nun sape jucà a ttre..., figurammoce a cquatto! Niente! Âmm’ ‘a suffrí! Passammo ê ppaggelle:
DE SANCTIS 6,5: Comme è nnaturale pe ‘nu purtiere d’aldo livello se facette truvà sempe pronto quanno fuje chiammato ‘ncausa.
GRAVA 7: Fuje veramente ‘nu piacere vedé n’ata vota ‘ncampo ‘o surdatiello nuosto! Crossié, scamuso, ma diciso e puntuale non se perdette maje ‘mmellandraríe (in leziosità) risurtanno affattivo (efficace), sia cu ‘e bbone ca cu ‘e ttriste.Spettaculo dint’ô spettaculo ce facette arrecrià quanno facette stà zitto a Moscardelli.
ARONICA7,5: Jucaje a ccentro d’ ‘a difesa ô posto ‘e Cannavaro, pe ffurtuna nosta squalificato e cunfinato ‘ntribbuna cu ‘o ricchino â recchia e ‘nu cappelluccio ‘a mariuolo ‘ncapo. Totò fuje n’autentica certezza,e dê pparte soje ajeressera nun passaje niente e nnisciuno;l’atalossa d’ ‘o palermitano dètte sicurezza e fiducia a tutt’ ‘o reparto cuano.
BRITOS 7+: ‘A rredda soja ( cu ‘na capata ca fuje n’autentica fucilata) rappresentaje l’asquina (svolta) d’ ‘a rencontra; ‘o guaglione se dimustraje ‘na cratista alternativa ê titulari, o forze ‘e titulare songo n’alternativa ô terzetto d’ ajeressera? E vva’ ca no!
ZUNIGA 5,5: Sempe generoso e cuntinuo (costante), ajeressera però parette ‘nu poco disperzivo e cchiú ‘e ‘na vota se ‘ncapunette inutilmente a vvulé zumpà ll’ommo; sbagliaje paricchi cruzze. Putesse fà meglio.
INLER 6: ‘O ritmo placeto e mmesurato fuje cchiú adatto ô turco-napulitano ca però quacche vvota se cumplicaje inutilmente ‘a vita ‘nfase d’allivío (alleggerimento). Ce pruvaje senza furtuna cchiú ‘e ‘na vota e macare priesto vedimmo ‘o nomme suĵo dint’ô tabbellino ‘e chi à signato!
GARGANO 6,5: ‘Se facette ‘nu mazzo tanto faticanno comme a ‘nu ciuccio ‘e carretta: pressiona (pressing) custante e ‘na quantità esaggerata ‘e pallune ricuperate; cercaje ‘a rredda ‘a luntano cu ‘na bbella bbotta, ma Sorrentino stette leso e ppronto.Peccato!
DOSSENA 6-: ‘Na vota tanto nun facette sulo ‘e fuosse ‘nterra ‘ncopp’â curzia soja, ma arrivaje cu ffacilità ‘ncopp’â linia ‘e funno facenno quacche bbuonu cruzzo; ô siconno tiempo êtte ll’uccasione ‘e tirà ‘mporta, ma ‘a sprecaje servenno inutilmente ll’avante cuane.
HAMSIK 7: Duiciente presenze pe Marekiaro e isso ll’unuraje cu ‘n’atalossa suttisfattoria (sosddisfacente) ‘a centrocampista, prupunennose sempe a ccentro d’ ‘o juoco.
(dô 67° MAGGIO 6 ‘e stima:Trasette cunzentenno ô Napule ‘e metterse a cquatto arreto e facette ‘na bbona fijura.)
LAVEZZI 5,5: Ancòra nun s’è repigliato cumpletamente, ma cu ttutto chesto se dimustraje ‘mpurtante sia attaccanno, ca defennenno.Fósse ora ca signasse quacche rredda: se ll’ammeretasse!
(dô 76° PANDEV 6 ‘e stima : Trasette a gghiuoche fatte dimustrannose ‘mpalla e padrone d’ ‘e gghiucate.)
CAVANI6,5: Se vedette ca nun è a ll’arribba (al top) d’ ‘a fromma, ma se dètte da fà e cquanno sciuliaje annante a Ssorrentino fuje lesto e capace a sóserse súbbeto prucurannose ‘o ricore d’ ‘a sicurezza ca po trasfurmaje cu pricisione e freddezza!
(da ll’88° Vargas s.v.: Jucaje pochi minute, justo ‘o tiempo ‘e farse male…maledizzione!)
Mazzarri 6: Quanno se dice ‘o mazzo!A ll’annata ‘o turnoverro difenzivo fuje ‘nu suicitio, ma ajeressera fuje ll’asquina d’ ‘a rencontra (svolta della partita). ‘Ncarraje a levà a Marekiaro pe passà ô quatto-quatto-doje; bravo pure a ttené ‘e nievere a pposto.
Arbitro Gava 5,5: Strano mannà uno ‘e Conegliano veneto a arbitrà ‘na partita ‘e ‘na scuatra ‘e Verona, ma ‘o guaglione nun avette nisciuno prubblema, e guvernaje bbuono ‘na rencontra nun facile. Justo ‘o ricore ‘ncuollo a Ccavani, che quanno partette steva ‘nlinia esatta cu ‘e difenzure. ô siconno tiempo giustamente nun dètte ‘nu ricore ô Chievo pe ‘na falta (ca nun ce steva!) ‘ncuollo a Moscardelli,ca facette ‘a sceneggiata e se fósse mmeretato ‘o cartellino jalizzo pe simulazzione.

E mmo ve saluto. Faccio ll’auguri a Ccavani ca ogge fa vintinche anne e m’aspetto ca ‘e festeggia viernarí a Ffirenze. Ce sentimmo si vo’ dDio â prossima vota.
R.Bracale Brak