VERMICELLUNE CU ‘A CREMA ‘E CARCIOFFOLE

VERMICELLUNE CU ‘A CREMA ‘E CARCIOFFOLE
Chello ca serve pe sseje perzone
8 carcioffole viulette napulitane,
600 gramme ‘e vermicellune,
ddoje farinule pe bbroro veggetale,
miezu litro ‘e latte retunno,
‘nu cucchiaro ‘e farina,
‘nu bicchiere d’uoglio ‘auliva dunciglio,
‘nu spiculo d’aglio ammunnato e scamazzato.
sale duppio ‘na vrancata,
sale fino e ppepe janco mmacenato a ffrisco q.n.s.,
‘o zuco ‘e ‘nu limone,
‘nu túppeto ‘e prutusino lavato, asciuttato e ntretato finu fine, sale fino q.n.s..


Comme se fa

Pulezzà ‘e ccarcioffole, tagliarle p’ ‘o lluongo primma â mmità e ppo a quarticelli, levà ‘e pile e metterle dinto a acqua fredda e zuco ‘e limone. Dinto a ‘na prupurziunata tiella a ffuoco allero fà piglià culore all’ aglio dinto a ll’uoglio vullente; sculà ‘a ll’acqua ‘e carcioffole e metterle dint’â cunnimma e farle zuffrijere; accuncià ‘e sale e ppepe janco mmacenato a ffrisco; fraditante cu ‘e ddoje farinule e ‘nu litro d’acqua fà ‘nu bbroro vullente e ricarlo dint’â tiella.
Fà vollere pe tre cquarte d’ora e ppo passà tutto a ‘nu mmiscaturo e mettere n’ata vota dint’â tiella ‘a crema uttenuta; accumplià ‘o cucchiaro ‘e farina dint’â mmità d’ ‘o llatte friddo e rricà ‘o cumposto dint’â crema; agnadí ‘o riesto d’ ‘o llatte e fà vollere sempe a ffuoco allero pe diece minute e rregulà ‘nu poco ‘e sale. Fraditanto àrvere teniente teniente ‘e vermicellune dinto a ‘na caurara d’acqua vullente salata (vrancata ‘e sale duppio); scularle asciutte asciutte e revacarle dint’ â tiella cu ‘o zuco, tuiglià a mmestiere e ‘mpiattà cumpletanno ‘e piatte cu ‘o prutusino lavato, asciuttato e ntretato finu fine. Serví ancora caude ‘e fucularo. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale