MURZELLE ‘E CRAPETTO SUASSATE

MURZELLE ‘E CRAPETTO SUASSATE

Chello ca ce vo’ pe sseje perzone
‘nu kilò ‘e sella ‘e crapetto tagliata a murzelle ‘e quatto centimetre ‘e squina,
500 gramme ‘e pesielle nuvielle frische o surcelate,
200 gramme ‘e pancetta affummecata tagliate a vvarriglie ‘e cinche centimetre pe uno pe dduje,
150 gramme ‘e ‘nzogna,
‘na grossa cepolla ndurata ammunnata e ntretata,
dduje bicchiere ‘e vino janco asciutto,
dduje spicule d’aglio ammunnate e ntretate finu fine,
‘na fraschetella ‘e peperna lavata e spullecata,
‘nu cerasiello percante (piccante)lavato, asciuttato e grabbato (inciso) p’ ‘o lluongo,
‘nu tuppeto ‘e prutusino lavato, asciuttato e ntretato.

sale fino q.n.s.
Comme se fa
Appruntà ‘e pesielle e lavarle; mettere a zuffrire a ffuoco miccio dinto a ‘na prupurziunata tiella, cu ‘a‘nzogna ‘o ttrigliato d’aglio e ccepolle e ‘o cerasiello; appena piglia culore agnadí ‘e varriglie ‘e pancetta e doppo tre minuti ‘e pesielle, accuncià ‘e sale, ‘nfonnere cu ‘nu cuppino d’acqua vullente e lassà cocere pe cinche minute; subbeto doppo agnadí ‘e murzelle ‘e crapetto e ‘a peperna spullecata; lassà cocere pe cinche minute, agnadí ‘o vino e farlo svapurà, accuncià ‘e sale cummiglià ‘a tiella e fà suassà ‘a carne pe n’ora sempe a ffuoco miccio.
A ffuoco stutato derrammà cu ‘o tuppeto ‘e prutusino lavato, asciuttato e ntretato, ammiscà e serví caude ‘e fuculare.
Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve e cunzulàteve ‘o vernecale!
Raffaele Bracale