P’ ‘A MORTE ‘E ‘NU GUAGLIONE.

P’ ‘A MORTE ‘E ‘NU GUAGLIONE.
Sto’ avveluto guagliú! Avvelluto e cu ‘o ttuosseco ‘mpont’ô musso. Ma ‘sta vota nun è p’ ‘o Napule; è pe ‘na cosa cchiú sseria: è p’ ‘a morte ‘e chillu povero guaglione ‘e Piermario Morosino, jucaturiello d’ ‘o Livorno ca a vinticinche anne s’è arricettato pe n’infarto jucanno a Pescara! Vuje ce penzate?! A vinticinche anne! Cose ‘e pazze! Accuminciammo a ddicere ca nun se po’ accettà ca ô 2012 in Italia a bordo campo nun ce stanno pe llegge ‘e defibrillatore ca putessero sarvà ‘a vita ê jucature ‘ncaso ‘e
n’ arresto cardiaco... Pecché chilli povere scuorteche d’ ‘e mierece prisiente ‘ncampo che saciccio ponno fà cu ‘nu semplice massaggio cardiaco!? Ma che s’aspetta ca succedono ati traggedie ‘ncampo primma ca ‘a FIGC pruvvede?... Chesto pe ‘na mana; pe n’ata mana po ce s’à dda rennere cunto ca stanno succedenno troppi fatte strane e scuonceche’nfra chille ca fanno sporto; cca è ll’ora ‘e jí a vvedé bbuono che cacchio ê fanno magnà e che bubbazze lle dànno a ‘sti guagliune.... pecché nun se po’ accettà ‘e vedé murí accussí a ‘nu guaglione accussí guaglione e ca fa ‘o sporto! A sèntere a ccierti patatierne d’ ‘a televisione ‘e cuntrolle ce stanno, so’ bbuone e mmeglio nun se ne ponno fà..., pecché pare ca fosseno periculuse e ne muresseno cchiú assaje sott’ê cuntrolle ca ‘ncampo. I’ nun so’ miedeco, ma chesta a mme me pare ‘na strunzata! Si overo ‘e cuntrolle so’ bbuone e ‘ncampo ce vanno tutte jucature ‘nsalute, ca nun so’ malate e allora overo significa ca a ‘sti guagliune lle dànno papocchie e bbubbazzelle ca ‘e distruggeno... E nun è pussibbile ca tutte quante mo se nn’esceno comme a ccicere ‘ncopp’â cucchiara; coccheduno ll’à dda pavà ‘a morte ‘e ‘stu guaglione! Ce à dda stà ‘nu respunzabbile ‘e ‘sta traggedia! Nun è ca mo fermanno ‘e campiunate pe ‘na jurnata e rimannanno tutto ê 25 d’abbrille âmmu risolto ‘a facenna.Ggià ‘a dimane ‘ncopp’ a ttutte ‘e campe s’ànno mettere ‘e defibrillatore ‘mpianta stabbile e ppo s’ à dda jí bbuono a scuvà che succede dint’ ê ccucine, dint’ê spugliatore e dint’ê ‘nfremmarie d’ ‘e suggità! E me fermo cca, primma ‘e ascí fora d’ ‘a vuluntà ‘e Ddio ‘e dummeneca! Nun me rummane ca sperà ca Piermario sta ggià jucanno a ppallone cu ll’angele mentre ‘a mamma, ‘o pate e ‘o frate lle stanno sbattenno ‘e mmane!
R. Bracale Brak