PURCIELLO Ô GUSTO ‘E PIPERE

PURCIELLO Ô GUSTO ‘E PIPERE

chello ca ce vo’ pe sseje perzone

‘nu chilò e duiciento ‘e spalla ‘e purciello tagliata a piezze ‘e cm. cinche pe tre e pe ddoje,
miezu chilò ‘e pummarole ammature lavate, scuttate, spellate e tagliate a ffarinule,
300 gramme ‘e pipere verde,
‘nu bicchiere ‘e vino janco,
‘nu bicchiere d’uoglio’auliva dunciglio,
‘nu spiculo d’aglio ammunnato e ntretato finu fino,
sale fino e ppepe niro mmacenato a ffrisco q.n.s.
‘nu tuppeto ‘e prutusino lavato, asciuttato e ntretato finu fino.

comme se fa:
Doppo d’avé lavato a mmestiere ‘e pipere asciuttarle e tagliarle a vvarriglie suttile. Fraditanto dinto a ‘na prupurziunata tiella ricà ll’uoglio e a ffuoco miccio farve piglià culore ô trigliato d’aglio; agnadirve ‘a carna e farla suassà sempe a ffuoco miccio. Doppo scarze diece minute agnadí ‘o vino, ‘e pipere a vvarriglie e ‘e pummarole a ffarinule;salà, pepà e agnadí miezu bicchiere d'acqua cauda; cummiglià cu ‘nu cupierchio e lassà cocere ‘na quarantina ‘e minute a ffuoco miccio. â ffine cuttura, sullevà ‘a carna e metterla dinto a ‘na sperlonga cauda e mettere dinto a ‘nu mmiscatore tutt’ ‘o riesto d’ ‘o zuco e sifflà nfi’ a uttené ‘na sarzulella serrata (densa); ricarla ‘ncopp’â carna e derrammarve‘nu tuppeto ‘e prutusino lavato, asciuttato e ntretato finu fino.
Serví súbbeto ancòra cauda ‘e fuculare ‘stu spezzato gurmante. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve e cunzulàteve ‘o vernecale!
Raffaele Bracale