CALAMARE Â NAPULITANA

CALAMARE Â NAPULITANA Chello ca serve pe sseje perzone: ‘Nu chilo e ddoje (piso lisso) ‘e calamare pulezzate, lavate asciuttate e ttagliate a rundelle e pezzulle, 700 gramme ‘e pummarole pelate, miezu bicchiere ‘e vino janco asciutto, ‘nu cerasiello pircante (piccante)lavato, asciuttato e grabbato (inciso) p’ ‘o lluongo, ‘nu bicchiere e mmiezo d’uoglio dunciglio, ‘na cepolla ndurata ‘e Muntoro ammunnata e ntretata, n’aglio ammunnato e ntretato finu fino, 200 gramme d’aulive nere desciussate, ‘nu cucchiaro ‘e pignuole ‘nu cucchiaro abbunnante d’uva passa, sale duppio ‘na bbona presa, pepe niro mmacenato a ffrisco q.n.s., ‘nu tuppeto ‘e prutusino lavato asciuttato e ntretato. quacche felloccia ‘e pane arruscata ô tiesto vullente. Comme se fa Pulezzà ‘e calamare, lavarle, ntretarne a pezzulle ‘e granfetelle e ttagglià a rundelle ‘o sacco. Dinto a ‘na prupurziunata tiella ricà ‘nu bicchiere e mmiezo d’ uoglio e a ffuoco allero fà piglià culore â cepolla ntretata a ll’aglio ntretato e ô‘ cerasiello pircante (piccante)lavato, asciuttato e grabbato (inciso) p’ ‘o lluongo,; ‘nfonnere cu ‘o vino, e senza farlo svapurà agnadí ‘e pummarole e lassà cocere a ffuoco allero pe diece minute; subbeto doppo agnadí ‘e calamare ll'uva passa ammullata cu ‘nu poco d’acqua cauda, ‘e pignuole,regulà ‘e sale duppio e de pepe niro mmacenato a ffrisco. ‘Ncuperchià, avascià ‘o ffuoco e lassà cocere pe 20 minuti cuntrullanno ca ‘o zuco nun s’asciutta troppo; si serve agnadí ‘nu poco d’acqua cauda agnadí ll’aulive e lassà cocere pe n’ati ddiece minute o fino a quanno ‘ew calamare so’ ccuotte a dduvere. Stutà ‘o ffuoco e derrammà cu ‘o tuppeto ‘e prutusino lavato asciuttato e ntretato. ‘Mpiattà accumpagnanno ‘sti calamare â napulitana cu fellocce ‘e pane arruscate ô tieste vullente. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e aggarbatéve ‘o vernecale!! Raffaele Bracale