CALAMARE ACCUMPAGNATE

CALAMARE ACCUMPAGNATE Sabrosa e urigginale manera ‘e cucenà ‘e calamare accumpagnannole cu ‘e nnenmmiccule e ‘a pancetta. chello ca serve pe seje perzone ‘nu kilò (piso lisso ‘a fora d’ ‘e scarte) ‘e calamare pulezzate lavate e tagliate a anellucce, 300 gramme ‘e nnemmiccule, 300 gramme ‘e pancetta affummecata tagliata a vvarriglie, ddoje pastenache rattate, lavate, asciuttate e ntretate a ffarinule, ddoje majateche lomme ‘e accio janco pulezzate dê sfilacce, lavate, asciuttate e ntretate a ffarinule, meza cepolla ndurata ‘e Muntoro ammunnata e ntretata a ffarinule, dduje spicule d’aglio ammunnate e ntretate finu fino, ‘na cemmetella (rametto) abbunnante ‘e rosamarina, ‘nu bicchiere e mmiezo d’uoglio ‘auliva dunciglio, sale fino e pepe janco mmacenato a ffrisco q.n.s. comme se fa ‘Mprimmese lavà ‘e mmenniccule e tenerle pe ‘na mez’ora a remuoglio dinto a ll’acqua fredda;fraditanto taglià a vvarriglie ‘a pancetta e suassarla senza agnadí uoglio dinto a ‘na tiella ca nun azzecca. Dinto a ‘na marmitta ricà miezu bicchiere d’uoglio e a ffuoco miccio fà piglià culore ê ffarinule ‘e pastenache, ‘ê llomme d’accio e â meza cepolla;sculà‘e mmenniccule e metterle dinto a ‘sta marmitta cu ‘e vverdure cummigliate cu acqua fredda ; aumentà ‘o ffuoco e lassà cocere pe mez’ora. A ffine cuttura,agnadí‘na cemmetella (rametto) abbunnante ‘e rosamarina, sale fino e pepe janco mmacenato a ffrisco, tuiglià e llassà cocere pe n’ati ddiece minute. Dinto a n’ata prupurziunata tiella a ffuoco miccio fà piglià culore ô trigliato d’aglio dinto a ‘nu bicchiere d’uoglio e farve suassà pe cinche minute chianu chiano ‘e calamare e â fine accuncià ‘e sale e ppepe. Mettere dinto a ‘na sperlonga ‘e mmenniccule cu ttutte ‘e vverdure, agnadirve ‘a coppa ‘e calamare e ‘a pancetta e sserví. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale . .