CATANIA – NAPOLI 23.09.12 0 -0 LL’AGGIU VISTA ACCUSSÍ

CATANIA – NAPOLI 23.09.12 0 -0 LL’AGGIU VISTA ACCUSSÍ Che nervatura guagliú, che nervatura! ‘O Napoli ajere s’appresentaje a Ccatania contro a ‘na scuatra ca, si nun me sbaglio, so’ cchiú ‘e diece anne ca nun riuscimmo a vattere â casa soja.... e manco ajere ce riuscèttemo! E che saciccio! Cca quaccheduno ce à menato ‘o nniro ‘e seccia! Ajere, a ll’ora d’ ‘a tiella, ‘e cuane s’appresentajeno ô Massimino ‘e Catania pe tentà finalmente ‘e vencere e levarse ‘a cuollo chella jastemma menata e nun puté vencere sotto a ll’Etna. E i’ pure me credette ca ce fósseno riuscite apprufittanno ‘e ll'entusiasemo d’ ‘a vittoria contro l’A.I.K. e me credette ca nun avessemo perduto cuntatto cu ‘a rubbentus(sa) ca pe pparta soja a Turimo êva fatto ‘o vallo ‘ncopp’â mmunnezza vattenno ‘o Chievo cu ddoje rredde ‘e mMerdarella...’Mmece fernette ca ‘o Ciuccio s’ êtt’ ‘a cuntentà ‘e ‘nu punticiello doppo d’avé fatto tutt’ ‘a rencontra jucanno unnice contr’ê ddiece d’ ‘o Catania; ma niente! Nun riuscette a vvencere e i’ me ‘ntussecaje ‘e bucatine allardiate, ‘o calamaro fritto e ‘a mela annurca. ‘O fatt’è ca ajere ‘o Catania jucaje cu ‘o sanco a ll’uocchie, mazzulianno sistematicamente ê cuane sotto a ll’uocchie ‘e chillu mmunnezza ‘e Bergonzi ca doppo d’averne(‘ncapo ‘e tre o quatto minute ‘a che s’era accumminciato) jttato fora a uno pe falta ‘ntenziunale d’urdimu ommo,’ncuollo a cCavani lanzato a rrete, lle mancajeno ‘e ppa**e pe ffà ‘o stesso n’ati tre o quatto vote, quanno ll’isulane ògne vvote ca ‘e napulitane passavano ‘a mità campo o s’appresentavano dê pparte d’ ‘o purtiere lloro, nn’arrunzavano allimmeno ‘nu paro e cchilli tre delinquente ‘e Almiròn(no), Spolli e Le Grottaglie ne facètteno carne ‘e puorco. E naturalmente chillu granne mmunnezza ‘e Bergonzi (ca penzaje ‘e tené ancóra ‘nu debbeto cu ‘a rubbentus(sa) p’ ‘e fatte d’ ‘a tempurata 2007/2008), facette avvedé ca ‘o fatto nun era d’ ‘o suĵo e pe tutt’ ll’arranqua primma ‘e siscà ‘na punizziona a ffavore d’ ‘e cuane ce penzaje trirece vote... e ppo nun ‘a siscaje! E che ne putévamo sperà? Pe gghionta ‘e ruotolo Mazzarri se ‘nfessette a ffà jucà a zZuniga ca aggio paura tène ‘na ponta ‘e paposcia e nun facette niente; mettímmoce pure ca, ajere comme ajere, Maggio e mMarekiaro aizajeno sulo pórvera,mettimmoce ca Bergonzi ce mettette ‘o ssuĵo e ‘o quatro è cumpleto.... ‘Nzomma fernette zero a zzero e forze avimm’ ‘a ringrazzià ‘o Cielo ca nun perdèttemo e salvajemo ‘nu punto, pecché cu tutto ca jucavano diece contro a unnece ll’isulane ô finale travulgente tentajeno pure ‘e vencere e pe ppoco nun ce riuscètteno! P’ ‘o mumento ‘a rubbentus(sa) tène ggià dduje punte cchiú ‘e nuje e stammo appena â quarta jurnata.Pe ffurtuna ca ajeressera po ‘o Genoa ce facette ‘o piacere ‘e jí a vvattere ‘a Lazzio a rRoma lassannoce sule sule a ddiece punte ô siconno posto ‘ncrassifica ca – pe comme cucozza ntrona – è (pe chesta tempurata) ‘o mmeglio ca putimmo sperà, qualuqua cosa dicesse De Chiacchiaroniis! Mo nun ce rummane ca levarce ‘e prete ‘a dint’ê scarpe miercurí ca vène scuntannòcela proprio cu ‘o pappavallo ‘e Lotito! Ma p’ ‘a verità penzo ca, doppo d’ ‘a scutuliata pigliata dô Genoa, aggio paura ca ‘o truvammo ‘ncazzato assaje! E sperammo ca mme sbaglio! Venimmo ê ppaggelle: DE SANCTIS 6- Praticamente nun êtt’ ‘a fà maje niente pe tutt’ ‘a rencontra ‘a fora d’ ‘o finale, quanno riuscette a respingere ‘nterra ‘nu diacunale periculuso, ma arresecaje ‘e brutto sempe ô finale quanno Gomez(zo) centraje ‘o palo cu ‘na bbotta ‘a fora ca isso nun riuscette a fermà. CAMPAGNARO 6 Acribbuso (puntuale) dint’ê chiusure, nun se facette piglià d’ ‘a smania ‘e jí annante e cuntrullaje a mmestiere e ssenza difficoltà ‘a camma (zona) ‘e cumpetenza soja. CANNAVARO 5,5 Apprufittanno ca ‘o Catania dô pprincipio jucava ‘ndiece e s’era nchiuso ‘ndifesa, isso se lanzaje annante a ddà ‘mpiccio ê culleche attaccante e a ffà chello ca nun po’ nè ssape fà. Cumminfatte ‘nu paro ‘e vote se truvaje ‘ncundizziona favurevola pe risolvere ‘a rencontra, ma nun riuscette maje a rennerse periculoso: nun è arta soja! Pe nun parlà d’ ‘e ssolite pugge (rilanci) fatte a scampule ‘e cape ‘e sacicce. ARONICA 5,5 ‘Nu poco ‘mbarazzato (un po’ impacciato) cuncedette quacche surtita ‘e troppo ‘ncopp’â curzia ‘e mancina, addó Zuniga nun ‘o détte ‘na mana.Sufferette bastantamente ‘a vivacezza ( vivacità) ‘e Gomez(zo) e de Bergessio e spisso ll’êtt’ ‘a fermà cu ‘na falta. Pavaje forze ‘o fatto d’ avé jucata ‘a terza rencontra dinto a sette juorne e ‘e cunzecuenzie (i postumi) d’ ‘a cuntrattura d’ ‘a dummenica passata cu ‘o Parma; tanto pe nun cagnà s’abbuscaje pure uno d’ ‘e tante (troppe!) cartelline jalizze ca Bergonzi se divertette a sventaglià sott’ô naso d’ ‘e cuane. (dô 65° VARGAS 5,5 Doppo d’ ‘e ttre sfugliatelle sfurnate cu l’A.I.K. venette lanzato dint’ô ‘mbruoglio d’ ‘a ‘mbrugliata comme mossa d’ ‘a disperazzione, ma se vedette sulo quanno jette a mmagnarse ll’evera ‘nterra o pecché menato da ll’isulane o pecché sciuliato ‘ncopp’ô pallone! Avette ‘na bbona accasione, ma ‘a sciupaje tiranno ‘ncuollo a Legrottaglie. S’abbuscaje pure ‘nu cartellino jalizzo pecché Bergonzi, piglianno ‘a sputazza p’ ‘a lira ‘argiento, ‘o ca**o d’ ‘o ciuccio p’ ‘o campanaro d’ ‘o Carmene e ‘a bbanca ‘e ll’acqua p’ ‘o carro ‘e Piererotta... vedette ‘na cosa pe n’ata e ll’accusaje d’ icazzione [simulazione] addó Spolli ll’êva malamente stiso ‘nterra.) MAGGIO 5,5 Nun fuje jurnata! Quacche vvota pruvaje a appressurà (ad accelerare) ma ‘o facette sempe cu ‘o freno tirato,visto ca nun teneva ‘o spazzio annante. ‘Nfase ‘e pussesso risultaje usènte (assente) (da ll’ 84° DOSSENA s.v.) DZEMAILI 6 ‘Nfra ‘e cchiú agrippine (vivaci). Pruvaje a dà muvimento a ‘nu centrocampo troppo braduso (lento) e se facette vedé pure cu quacche bbotta ‘a luntano. INLER 5 Manco pe isso fuje jurnata! Nun è ancora isso. Mazzarri ‘o sostituette troppo tarde doppo n’ intero primmo aione (tempo) sprecato. (dô 46° INSIGNE 6- Trasuto troppo tarde, dètte súbbeto vivacezza ô juoco e appena trasuto servette ‘na bbella ajuda a Pandev(vo), ma po fuje poco cercato e avette pochi spazzie pe ffà ‘o juoco ca sape fa.) HAMSIK 5,5 Jurnata no! Jucaje ancòra cchiú ppoco d’ ‘o ssolito senza maje rennerse ‘mpurtante o periculoso. All’ arranqua êtt’ ‘a fà ‘o mediano arretranno addirittura ‘e vinte metre ‘a camma soja. E lla nun servette. ZUNIGA 5 Inutile. Facette ‘e fuosse ‘nterra ‘ncopp’â curzia soja,ma ne cacciaje poco e nniente ‘a fora ‘e quacche ‘ncunsistente (inutile) ricato (dribbling) ‘Na vota allimmeno curreva..., mo penzo ca ll’è scesa ‘a paposcia o le se crisciute ‘e calle, ma chesta è ‘a zita e se chiamma Sabbella; nun tenimmo ‘e meglio: Dossena? Piezzo e ppejo!Destro? E che ne parlammo a ffà!? PANDEV 6- Dette ll’anema e se spumpaje malamente; sempe alicante, nun sprecaje maje ‘nu pallone e cercaje spisso ‘e gghiucate p’ ‘e cumpagne; m’êsse aspettato quaccosa ‘e cchiú, ma ajere ô guaglione pure jucanno sempe dassilusamente ( con generosità) nun lle riuscette ‘e arrivà ô tiro e nun riuscette a ripetere ‘a rencontra spettaculare fatta cu ‘o Parma.Purtroppo nun tutte ‘e mise vèneno ‘e 31! CAVANI 6- ‘Nu lione dint’â ggiaúla (in gabbia),êsse vuluto spaccà ‘o munno pe festiggià ‘a centesima presenza cu ‘a maglia luvarda signanno ‘na rredda e ce ‘a mettette tutta custringenno spisso ll’isulane a mazzularlo pe fermarlo; ògne vvota ca putette tiraje pure, ma lle mancaje ‘o parpadío (il guizzo) dicisivo. Peccato! Sperammo ca ‘o trova miercurí! MAZZARRI 4 Lle mancaje ‘o curaggio ‘e appruntà ‘na scuatra ca nun ghiucasse cu ‘o sòlito motulo ‘e aspettà ll’avverzario p’ ebbainà (ripartire) ‘ncontropiete. Cumminfatte ajere ‘e titulare preservate da ll'E. L. nun riuscètteno a avé chella marcia ‘e cchiú pe vvencere ‘na rencontra chiave,mettemmo ‘nmostra ‘e bburnie (i limiti) ‘e sempe c e ciovè chille ‘e quanno s’à dda fà ‘a rencontra comme a cchillo d’ajere ca cu ll'avverzario ‘ndiece e nchiuso a rriccio, ‘nfatizzaje ( accentuò) ‘stu prubblema pricipuo (strutturale) d’ ‘e luvarde. Quanno se decidette a ccagnà fuje troppo tarde e cumplicaje ancòra ‘e cchiú ‘a facenna giacché a ll’arranqua rivuluzziunaje sí ‘a scuatra allignanno tutte ‘e pponte a disposizzione cu Insigne e Vargas, ma ‘o facette quanno ‘a scuatra era stanca e affannava; e accussí facenno levaje spazzio a ttutti ‘e tenure suoje! Insigne êss’ ‘a avuto ‘a trasí ô primmo aione ô posto ‘e Zuniga e forze ‘a rencontra se fósse sbluccata primma e Vargas(so) êsse pututo trasí ‘nfine ‘e rencontra ô posto ‘e Pandev(vo) spumpato! L’arbitro BERGONZI 3 e ll’aggiu trattato! ‘Sta meza cazetta ‘e sischetto, assicuratore genuvese, ati vvote ce purtaje bbuono,ma ajere fuje mannato dô Palazzo p’accurtà ‘e passe ô Napule e pe gghiella nosta ce riuscette sia pure pe mmità! Paricchi ati vvote ll’avévamo ‘ncruciato e ccierti vvote aveva purtato bbuono,ajere no! E i’ nun ‘o vulesse cchiú; vo’ fà ‘o prutagunista, ma è ‘na meza cazetta comme ô riesto ‘e tutte ll’arbitre italiane; facilmente se fa ammagagnà e se porta ancòra appriesso ‘o pisemo d’ ‘e critiche ca avette p’’e duje rigure date ô Napule (tempurata 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e napulitane sisca sempe contro e ‘nzerra tutte ‘e dduje ll’uocchie e s’appila ‘e rrecchie... pe nun vedé o sentí chello ca cummettono ll’avverzarie d’ ‘e luvarde. Cumminfatte ajere pigliaje cchiú ‘e ‘nu zzarro siscanno falte ô ccuntrario e nun tenenno ‘o stommaco ‘e jettà fora n’ati ttre isulane (Almiròn(no), Spolli e Le Grottaglie), cchiú delinquente ‘e ll’ate ca s’ ‘o ffósseno mmeretato (d’essere jettate fora) pe ttutte ‘e ‘e sistematiche falte vuluntarie tattiche o da urdemu ommo! Ma pe ffà chesto Bergonzi êss’ ‘a avuto ‘a essere n’ommo, no ‘nu chiachiello! Ncuncrusione, a pparte ll’arbitro, ajere vedette, o me parette ‘e vedé contr’ô Catania ‘o Napule d’ ‘e ttempurate passate: cu ‘e scuatre ppiccerelle addiventa piccerillo e ê vote addirittura riesce pure a pperdere, mentre cu ‘e scuatre ggrosse ca jocano a ffaccia aperta e fanno jucà fa granni rencontre; ‘o fatto è ca ‘o livurnese nun à capito ancòra ca ‘e piccerelle pure ‘ncasa se nchiudono,mazzulejano sistematicamente e ghiocano ‘ncontropiede; ma forze nun è overo ca nun ll’à capito; ‘o ssape, ‘o ssape ma passano ll’ anne e siccomme è n’ allenatore scadente , nun è ccrestiano ‘e truvà ‘na soluzzione! E cu cchesto ve saluto e si dDi’ vo’ ce sentimmo ggioverí, speranno ca ve pozzo cuntà bbelli cose! Staveti be’. R.Bracale Brak