NAPOLI – LAZIO (26/09/12) 3 A 0LL’AGGIU VISTA ACCUSSÍ

NAPOLI – LAZIO (26/09/12) 3 A 0 LL’AGGIU VISTA ACCUSSÍ Tengo ‘o core dint’ô zzuccaro, guagliú! Ajere ssera chello ca Maria vuleva ‘nzuonno lle jeva. ’E luvarde avettono a disposizzione ‘e spazzie pe ffà male e ‘e sfruttajeno a mestiere, e â fine ‘o punteggio fuje pure busciardo visto ca ‘o Napule jette vicino â rredda allimmeno n’ati tre o quatto vote. ‘Nzomma ‘ ‘o Napule facette‘na rencontra ‘e auta nivella ( alto livello), favurita dâ tattica autottònica (suicida) ‘e Petkovic e nne mannaje a rRoma a lLotito, ô pappavallo spennato suĵo e a ttutte ‘e jucature lazziale cu ttre sfugliatelle ricce ‘ncartate dinto a ‘na guantiera! E putevano pure essere quatte! Ma so’ cuntento, so’ cuntento ô stesso guagliú e pe ttre bbuoni mutive:mazzeca e uno, avimmo agguantato ‘a rubbentus(sa) ‘ncimm’â crassifica e ce simmo mise a ppare punte; mazzeca e ddoje, ce simmo levato ‘a faccia ‘o scuorno d’ ‘o pareggio ‘e Catania; mazzeca e ttre ce avimmo fatto annuzzà ‘ncanna ‘a trasferta a cchilli sbruffune ‘e Mauri & Socie ca doppo d’avé perzo cu ‘o Genoa ll’êvano fatta fora d’ ‘o rinale dicenno: “Nun ve preoccupate! Se annamo a ppiglià i tre ppunti a Napoli!” Aggiu visto! ‘Mmece d’ ‘e tre ppunte s’ànnu pigliato tre sfugliatelle!... Mo voglio vedé proprio quala ata strunzata lle jesce ‘a vocca a Lotito contro ê Borbone! Voglio proprio vedé che dice chist’erede d’ ‘o Conte Mmerda a Ppuceriale!Vedimmo si custringe n’ata vota ô prufessore Gennaro De Crescenzo a farlo ‘na chiaveca comme se mmereta! Ajere a nnotte è asciuto ll’uno ‘ncopp’â strazzione ‘e Napule e avimmo vattuto chella ca se penzava d’essere l’antípalo (antagonista) d’ ‘a rubbentus(sa)! Addó?! Una antípalo ce sta e è ‘o Napule! Mo però jammo cu ‘e piere ‘e chiummo senza abbagliarce (illuderci): dummeneca ce aspetta ‘na trasferta cu sette parme...; ‘a Sampedoria tene diece punte e è siconna ncrassifica,è allenata a’ chillu traditore ‘e Ciro Ferrara ca contro ô Napule vo’ fà sempe ‘a rencontra d’ ‘a vita. Pirciò nun ce facimmo piglià dê cchiacchiere e dâ frennesia; carma e ggesso! Vencere a gGenova contr’ â Sampedoria ‘a veco difficile, pure si nce spero..., ma purtrace ‘nu punto è n' uperazzione pussibbile e i’ nun ce sputasse ‘ncoppa specie penzanno ca a rubbentus(sa) se ll’à dda vedé cu ‘a Roma ‘e Zemàn(no) e nun se po’ maje dicere! Primma ‘e passà ê ppaggelle tenco ‘na vecchia dimanna pe ttutte vuje: Ma che ce fa ògne partita chillu cestariello ‘e De Magistris sempe ‘ncullato vicino a cchillu capitalista ‘e De Laurentiis ca po manco ‘o vuleva pe sinnaco ‘e Napule? E ppo De Magistris nun tifava Inter(re)? Pecché nun se ne va vicino a Moratti a San Siro e ttène luntano chill’uocchie stuorte suĵe dô Napule nuosto? Venimmo ê ppaggelle: DE SANCTIS 6- Dimustraje granna sicurezza ‘ncopp’ê cunchiusione ‘a fora ‘e ll’avverzarie, ma dinto a ll’area piccerella fuje spisso ‘ndiciso e isso e culo’echiummo se facetteno, pure si ‘e mano, cartià ‘a Klose; ‘ncopp’ô doje a zzero salvaje sempe ‘ncopp’ ô tedesco ca aveva fatto ‘na bbella ‘ncurnata. ‘A cosa meglia Morgàn(no) ‘a facette quanno prutestanno ‘ncazzato comme a ‘na ufara, cunvincette a Klose a ffà ll’ommo e a cunfessà ca êva signato cu ‘na mana; ‘a furtuna soja e nnosta fuje ca ‘o tedesco nun facette ‘o sittantuno e dicette ‘a verità custrignenno a cchillu scemo ‘e Banti a annullà ‘a rredda! GAMBERINI 7 Atalossa cunvincente e pusitiva pe ll'ecchese viola ca cu granna perzunalità e pricisione risulvette ‘a pratica. Sufferette ‘nu poco quanno fuje pigliato ‘nvelocità, ma ce mettette sempe ‘na pezza cu ‘a ‘sperienza ‘e viecchio filibbustiere ‘e l’area ‘e ricore! (dô 77° ARONICA 6 Frurraje (presidiò) a dduvere ‘a camma soja, senza nisciuno sfregazzo.) CANNAVARO 6 Miezu voto ‘e cchiú p’avé finalmente! ‘ncarrato ‘nu lanzo ‘a luntano, chillo ca permettette ô Matadòr(ro) ‘e signà ‘a siconna rredda. P’ ‘o riesto affannaje cu n’accunto difficile comme a Klose ca, ‘mbruglianno, cartiaje a isso e a Morgàn(no) e menu male ca po ll’arbitro annullaje ‘a rreda faveza signata dô tedesco! CAMPAGNARO 7 Dê pparte soje nun se passaje! Ajutaje a mMaggio radduppiannolo sempe ‘nfase difenziva cu granna qualità e spisso se decrusciaje (si sganciò) accumpagnanno ll’azziona. MAGGIO 5 Nun ce simmo! Nun è ancòra isso. Fuje custretto, pe bbia ‘e Lulic, a starsene assaje vascio e pe furtuna s’ ‘a cavaje senza guaje apprufittanno d’ ‘a mana ca lle dètte Campagnaro. Nun appressuraje maje a dduvere e se magnaje ‘na rredda fatta sbaglianno ‘na ‘ncurnata. BEHRAMI 7,5 Atalossa diapresa (prestazione sontuosa) d’ ‘o cane ‘e presa svizzero.’Nfase ‘e cuntrasto (interdizione) nun dètte rispiro ê trecquartiste lazziale nun perdennole ‘e vista maje! Se prupunette spisso pure annante. INLER 6,5 Forze pecché era scritto ca tutto ce avev’ ‘a jí a dderitto, ma ajeressera pure ‘o turco-napulitano me parette cchiú cunvincente e repigliato a ppietto ‘e ll’urdene asciute fatte. Nun se pigliaje grossi respunzabbilità, ma finalmente fuje priciso e sistimato cu ‘e bbassurere (suggerimenti). HAMSIK 7 Decidette ‘e jucà ‘nu poco ‘e cchiú d’ ‘o ssolito migliuranno assaje a ppietto ‘e ll’atalossa ‘ngagnata (deludente) ‘e Catania. Piscaje sempe ll’ommo libbero cu bbelli ghiucate a mmestiere, facenno a spezzatino ‘a difesa janco-celeste, ma ajere bblu nnotte. Jucasse sempe accussí ‘’stu guaglione! (da ll’ 82° VARGAS sv) ZUNIGA 6- Custretto, soprattutto ô pprincipio a starsene arreto cchiú ‘e ‘na vota jette ‘nsufferenza, ma po, passanno ‘e minute, criscette piglianno curaggio e accumpagnaje ll’azziona. Tene sempe chillu brutto vizzio ‘e fà troppi inutili ricate (dribbling)! PANDEV 6+ Ce à abbituate malamente e uno ‘a isso s’aspetta sempe ‘e cchiú. Cumunque pure si chella d’ajere nun fuje ‘a meglia atalossa soja dètte granne ajuto â manovra quanno ricevette palla spalle â porta, ‘a difennette e lanzaje cu precisione centrocampiste e esterne! (dô 69° INSIGNE 7 Trasette ‘ncampo e fuje súbbeto ‘nu spettaculo; ‘o guaglione ‘ncantaje ‘o san Paolo cu ghiucate ‘e classe. Se prucuraje pure ‘nu ricore cu ‘nu nummero ‘a circo equestro e mancaje ‘e poco ‘na rredda doppo n’atu ricato d’ ‘e suĵe!) CAVANI 8 S’êsse mmeretato nove, ma lle dongo ‘nu voto mancante p’avé sprecato ‘nu ricore tirato p’angiaría. Cumunque riturnaje a essere ‘o Matadòr(ro) ca ce serve.Sbluccaje ‘o risultato, apprufittanno ‘e ‘na deviazzione, cu ‘na bbella bbotta ‘a fora, po radduppiaje cu n’ata cagliosa putente ‘ndiacunale ca chiejaje ‘e mmane a mMarchetti e firmaje ‘o tris(so) scartanno ‘o purtiere e depositanno ‘a palla dint’â porta spalancata! E putevano pure essere quatto, ma fallette pe troppa sicurezza ‘o ricore ca s’era prucurato Insigne e ca ‘mmece ‘o Matadòr(ro) vulette tirà p’angiaría (egoismo).E cu cchillo d’ajere è ‘o terzo, ‘ncopp’a sseje ca fallesce! Ma nun se po’ avé tutto dâ vita... e i’ dico ca menu male ca ‘o tenimmo nuje a cCavani ca, ô ssolito, risultaje pulitelico (prezioso) quanno turnaje ‘ndifesa. Cu chelle d’ajere à superato a cCanè e a vVinicio dint’â crassifica ‘e ll’artigliere luvarde. (bomber azzurri). MAZZARRI 7 ‘Ncarraje ‘a rencontra! viggilia speraje ‘e vedé ‘o Napule sujo zucarrone (cinico) e apprufittatore e fuje accuntentato. Comme aggiu già ditto ‘a scuatra jucaje ‘na rencontra ‘e auta nivella ( alto livello), favurita dâ tattica autottònica (suicida) ‘e Petkovic. Azzecata ll’aretosa (la scelta) ‘e dà ancòra cunfianza (fiducia) a Inler(ro),comme pure chella ‘e fà trasí a Insigne,ca facette repusà a pPandev(vo), e soprattutto rejalaje granni ghiucate e se procuraje ‘o rigore ca po Cavani fallette. L’arbitro BANTI 3 Overamente 'na granna fetenzia cu 'e nnucchetelle:scuntentaje a ttutte; permettette ê lazziale 'nu juoco allarmante ( intimidatorio) e viulente senza sanziunarlo maje; prassempio chillu delinquente ‘e Diasso s'êsse avuto caccià fora doppo cinquantaseje siconne,p’avé, reaggenno, cauciato mo nun me ricordo a cchi pe ‘na nurmale falta ‘e juco e isso nun ll’ammunette manco! Jammo annante: Nè isso, nè chilli ati mmunnezze d’ ‘e cullabburatore suĵe s’addunajeno ca Klose 'a rredda ll’êva signata cu ‘na manata e si nun era pe De Sanctis ca cu ‘o sanco a ll’uocchie cunvincette ô tedesco a ddicere ‘a verità primma d’essere sputanto ‘int’a n’uocchio... nun saccio ‘a facenna comme jeva a fferní! Pe furtuna ca p’ ‘o riesto d’ ‘a rencontra nun succedetteno ati casini ‘a fora ‘e ll’atteggiamento pruvucatorio e scuonceco(arrogante) e Mauri ca nun fuje sanziunato. E ‘nchiudimmola cca ringrazzianno ‘sti guagliune pe ll’emuzzione e p’‘a granna suddisfazzione ca ce detteno! Forza Napule e fance sunnà ancòra ggià ‘a dummeneca ca vène contro â scuatra ‘e chella granna lota ‘e Ciro Ferrara traditore e nchiaccato ‘e sozzassa juventina. Si dDi’ vo’ ce sentimmo lunnerí ca vène.Staveti be’! R.Bracale Brak