CREMA ‘E CANNELLINE CU ‘A PANCETTA

CREMA ‘E CANNELLINE CU ‘A PANCETTA chello ca serve pe 6 perzone 3 buccacce ‘e fasule cannelline ggià arvate e sculate pe cumplessive 750 gramme, 300 gramme ‘e pancetta affummecata tagliata a ffarinule ‘e ‘nu centimetro, ¾ ‘e litro ‘e brodo veggetale fatto cu vverdure fresche o ddoje farinule pe bbroro, miezu cucchiaro ‘e doppio cuncentrato ‘e pummarola, ddoje majateche lomme ‘e accio janco pulezzate dê sfilacce, lavate, asciuttate e ttagliate a piezze ‘e cinche centimetre, ‘nu bicchiere d’uoglio ‘auliva dunciglio, dduje spicule d’aglio ammunnate e ntretate finu fino, ‘na fraschetella ‘e rosamarina, tre ffronne ‘e sarva, quacche felloccia ‘e pane casareccio arruscato ô tiesto (220°). pepe niro e ssale fino q.n.s. comme se fa: Ricà ll'uoglio dinto a ‘na prupurziunata tiella,agnadirve ‘o ttrigliato d’aglio ‘e piezze d’accio ‘a rosamarina spullecata e ‘e ttre ffronne ‘e sarva e ffà saussà tutto cosa a fuoco miccio pe cinche minute;sculà ‘e cannelline arvate, sciacquarle sott’ a ‘nu strepeto d’acqua fredda, scularle ancòra e revacarle dint’ ô zuffritto, farle ‘nzapurí pe dduje minute. Cummiglià tutto cu ‘o broro caudo, agnadirve ‘o miezu cucchiaro ‘e doppio cuncentrato ‘e pummarola,accuncià ‘e sale e ppepe e lassà cocere pe ‘nu quarto d’ora; fraditanto fà saussà ‘a pancetta a ffuoco allero dinto a n’ata tiella senza agnadirve uoglio. Quanno ‘a pancetta è pronta revacà ‘e fasule dinto a ‘nu mmiscaturo e nzuffrà (frullare) nfi’ a uttené ‘na crema abbunnante, críceta e ddellicata (spumosa e soffice);metterla n’ata a ffuoco miccio pe dduje minute; purziunà chesta crema dint’ê piatte cumpletanno ògne piatto cu ‘a pancetta saussata. Serví comme trasetura cauda accumpagnanno cu quacche felloccia ‘e pane casareccio arruscato ô tiesto (220°). Vini: asciutte e profumate janche nustrane ( Solopaca, Capri, Ischia, Falanghina, Fiano, Greco di Tufo) fridde ‘e jacciaja o ‘e ‘rotta. Mangia Napoli, bbona salute! Raffaele Bracale