CREMA ‘E TUNNO.

CREMA ‘E TUNNO. Sabrosa trasetura ‘a serví auntato ‘ncopp’ a ffellocce ‘e pane casareccio arruscato ô tiesto forno (200°) accumpagnato cu felloce ‘e caso frisco o staggiunato (muzzarella, provola o pruvolone d’ ‘o monaco). chello ca serve pe 6-8 perzone: 500 gramme ‘e tunno sott’uoglio (scegliere chello dint’ a buccaccielle ‘e virto ‘e lavurazzione artigianale), 150 gramme ‘e sulumiglie d’alicesalate sott’uoglio, 50 gramme ‘e chiapparielle ‘e Pantelleria levate ‘e sale e sciacquate, 4 ova toste, ‘nu bicchiere d’uoglio ‘auliva dunciglio, ‘o zuco passato a culaturo ‘e ‘nu limone ‘e Surriento, ‘na tazzulella d’acito ‘e vino janco, 150 gramme d’ aulive nere ‘e Gaeta desciusate, 150 gramme d’ aulive janche tonne ‘e Spagna desciusate, ‘nu spiculo d’aglio ammunnato e ntretato finu fino, ‘nu tuppeto ‘e prutusino lavato, asciuttato, ‘na presa ‘e sale duppio cunnito (alle erbette). pepe janco mmacenato a ffrisco q.n.s. 24 ffellocce ‘e pane casareccio arruscato ô tiesto (200°). comme se fa ‘Mprimmese fà ‘ntustà ll’ova mettennole cu paricchia acqua fredda dinto a ‘na caccavella auta ‘e sponna;appiccià ‘o ffuoco e fà vollere l’acqua; ll’ova risultano ‘ntustate a mmestiere, doppo otto – nove minute dô primmo vullo ‘e ll’acqua si stanno bbuono affunnate dinto a ll’acqua. Appena ll’ova so’ ppronte refreddarle sotto ‘nu strèpeto d’acqua fredda e ecussarle a dduvere, spartennole ‘ndoje parte po p’ ‘o lluongo ; mettere ‘a parte ‘e varchetelle ‘e janche e ppiglià ‘e tuorle ‘ntustate;mettere dinto a ‘nu mmiscaturo ‘mprimmese ‘o ttunno e ppo una â vota ll’alicesalate, ‘e tuorle ‘ntustate, ‘e cinquanta gramme ‘e chiapparielle ‘e Pantelleria levate ‘e sale e sciacquate, ‘o spiculo d’aglio ammunnato e ntretato finu fino,ll’ acito, ‘o zuco d’ ‘o limone passato a culaturo e a ll’urdemo ll’aulive janche e nnere desciusate e ‘o tuppeto ‘e prutusino lavato, asciuttato ed rricà tutto cu ll’uoglio a ffilo; aziunà ‘o mmiscaturo e farlo ggirà chianu chiano (‘a crema nun s’ à dda callentà...) sulo a ll’urdemo accuncià cu ‘na presa ‘e sale sale duppio cunnito (alle erbette) e cu ddoje prese ‘e pepe janco mmacenato a ffrisco .Cu ‘a mmità ‘e ‘sta crema auntà ‘e vintiquatto ffellocce ‘e pane casareccio arruscato ô tiesto e cu chell’ata mmità regnere ‘e varchetelle d’ ‘e janche e – comme aggiu ditto serví ‘sta trasetura accumpagnata cu felloce ‘e caso frisco o staggiunato (muzzarella, provola o pruvolone d’ ‘o monaco). Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta Mangia Napoli, bbona salute! raffaele bracale .