DNIPRO – NAPOLI 25/10/12 3 A 1LL’AGGIU VISTA ACCUSSÍ

DNIPRO – NAPOLI 25/10/12 3 A 1 LL’AGGIU VISTA ACCUSSÍ E accussí, guagliú, âmmo fatto n’ata fijura ‘e seje sorde! Stongo avvilito,ma i’ nun me riesco manco a m’arraggià pecché, v’ ‘o ggiuro, quase me ll’aspettavo! Ògne vvota ca ‘o Napule nun fa jucà ‘e titulari, fa ‘na fijura ‘e mmerda! ‘A dimustrazzione ‘e chello ca sto’ dicenno fuje ‘o siconno aione (quanno trasetteno tre campiune ô posto ‘e tre meze cazette) abbastanza bbuono a ppietto cu ‘o primmo. ‘O fatt’è ca ‘o Napule tène, si ‘a tène!, ‘na siconna scuatra assaje scarza a pparacone cu ‘a primma,cu ghiucature scarzulille tecnicamente ca ggià ‘nnItaglia nun songo nisciune..., figurammoce po ‘ncampo ‘nternazziunale addó se sputa sanco ‘ncopp’ a ògni ppallone!Nun capisco proprio a mMazzarri! Ma che s’apettava dâ scuatra miso ‘ncampo ajere? Possibbile ca nun capisce ca ‘o turn-over(ro), fatto in ‘mpruspettiva campionato,à dda essere meno esaggerato, e ca nun se po’ ffà a mmeno ‘e tanta ggente ‘mpurtante tutt’assieme? Penzo ca Mazzarri nun s’è ‘mparato niente ‘a chello ch’è succieso p’ ‘o passato,e cciuccio e prosuntuoso cuntinua a mmettere ‘ncampo ‘na scuatra ca a palla fremma se sperde dinto a ‘nu bicchiere d’acqua nè ssape che pisce piglià, e cuntinua a presentà n’attacco male assurtito cu Insigne e Vargas(so)[ca pe pparta soja po’ sí e nno è adatto ê campiunate meno ‘mpurtante], ca so’ ghiucature senza piso ca nun ponno preoccupà ‘e ddifese avverzarie. Lassammo perdere, va’! Passammo ê ppaggelle: ROSATI 4,5 S’êsse ‘a fà benedicere ‘a ‘nu monaco ricchione! Sfurtunato assaje putette fà poco o niente ‘ncopp’â terza rredda, ma tenette ‘e respunzabbilità ssoje ‘ncopp’ê pprimme doje: p’ ‘a primma êsse avuto ascí assaje primma visto ca ‘o pallone arrivava dint’â camma piccerella, ‘e cumpetenza d’ ‘o purtiere; p’ ‘a siconna, ‘mmece ‘e smanaccià ‘o pallone ‘nfaccia a Matheus, ll’êsse avut’ ‘a aizà doce doce ‘ncopp’â travesagna! Aggio paura ca a fforza ‘e vedé a dDe Sanctis s’ è ffatto ‘nfettà! GAMBERINI 5,5 Cercaje ‘e mantenere ‘a varca a zullé (galla)ma nun putette fà cchiú ‘e tanto; nun tenette córpe particulare, ma pavaje l’atalossa negativa generala (da ll’ 80° INLER sv) FERNANDEZ 5 Perdette súbbeto ‘a capa e ‘ncopp’â primma rredda ‘mmece ‘e cercà ‘o pallone, se piazzaje,a ll’uso ‘e Cannavaro, ê spalle ‘e ll’avverzario e ll’affussaje aumentanno ‘o casino dinto ‘a camma ‘e ricore. Avette po assaje fatica ‘a fà e spisso s’ ‘a cavaje cu ttrasute periculose, ma maje anacrippe (scorrette).Nun saccio pecché, ma ascette a cchi sî ttu e cchi songh’ i’ cu uno e se fósse mmeretato ‘o cartellino russo pe ‘na capata ‘nfaccia a gghiuoco fremmo. Ma ll’arbitro fuje ‘nu signore e ll’aizaje ‘a mana! ARONICA 5 Sufferette ‘a tassezza (velocità) ‘e ll’avverzarie e se facette ‘nfilà ‘ntromba cchiú ‘e ‘na vota; nun parlammo po ‘e quanno se trattaje ‘e ‘mpustà ll’azziona..., quanno sbagliaje sistematicamente tutt’ ‘e pprútase (suggerimenti) facenno ‘ncazzà peffino a ‘nu bbuonu guaglione comm’è Cavani! MESTO 5,5 Niente ‘e che, ma allimmeno nun mullaje nfi’ â fine. Mettette ‘mmeiezo pochi pallune, ma periculuse. Pruvaje pure a ddà ‘na mana ‘ndifesa, ma ‘o llignammo chell’è e cchille songo ‘e strummole scacate ca se ne ponno uttené! DONADEL 5 Ancòra scarzo a ssaluta avesse ‘a jucà ‘e cchiú pe tturnà a ‘nu livello decente.Difficile ‘a crerere, ma migliuraje ‘nu poco a ll’arranqua quanno riuscette a stellezzà (arginare) meglio ll’avverzarie DZEMAILI 4,5 Luttaje cu ccegna e ggenio, ma perdette quase tutte ‘e sfite cu ll’avverzarie; se ‘nnervusette e mettette ll’uoglio ‘a copp’ô peretto peggiuranno l’atalossa soja. DOSSENA 4 Uno d’ ‘e cchiú ppegge! Nun è ‘a mo ca ‘o vvaco dicenno ca è n’ecchese jucatore e ca accattannolo ce detteno ‘o pacco! Ajere sbagliaje troppi pprútase e nun riuscette maje a mmantené ‘a camma soja. ‘Nfase uffenziva nun riuscette maje a farse sèntere. ‘Ncopp’â primma rredda partecipaje ô festival(lo) d’ ‘e puttanate perdonnose ‘e vista a Striniccio ca signaje. (dô 52° PANDEV 6 Luttaje ‘ncopp’ a ògne pallone e sunergazzanno (collaborando) cu Cavani se facette sentí pure dint’â camma ‘e rigore; fuje pe poco e nniente ca nun arrivaje ‘ncopp’ a ‘nu cruzzo ‘e Mesto.) ZUNIGA 5 – Fora plantiglia (ruolo) e ffora ‘e capa. êss’ ‘a avuto sustituí a mMarekiaro..., ma chi t’ ‘o ddà? N’atu vullo e ppo se coce!Ô primmo aione êss’ ‘a avuto cullecà centrocampo e attacco ffcenno ebbainà (ripartire) ‘e suoje, ma nun ce riuscette maje! A ll’arranqua tentaje ‘e mettere ‘mmiezo quacche bbuonu pallone, ma fuje sempe asafuso (velleitario). INSIGNE 5 Nun riuscette maje a farese sèntere e a llassà truzzía (traccia). Quacche cusarella bbona, ma niente ‘e cchiú. Perdette troppi pallune ‘ncapunennose cu ghiucate ‘mpussibbili. A ll’arranqua jucaje assaje cchiú erúso (molto più largo) ascenno dâ fullé (match). VARGAS 4,5 Atalossa esizziale(disastrosa) d’ ‘o cileno.È overe ca ‘o primmo aione fuje difficultuso pe tutt’ ‘a scuatra, ma ‘o guaglione nun riuscette manco a llassà truzzía cu ‘e pprútase cchiú ffacile! (dô 52° CAVANI 7 Trasette cu ‘a cegna justa e súbbeto se dette da fà. Se prucuraje e ssignaje ‘o ricore.Mancaje ‘e poco ‘o bbisso cu ‘na granna ‘ncurnata ca ‘o purtiere, cu ‘nu miraculo, riuscette a aizà ‘a copp’â travesagna; cugliette ‘nu palo e mannaje fora ‘e poco ‘na timmuría (punizione) dâ trecquarte. E tutto chesto dinto a poco cchiú ‘e mez’ora!) MAZZARRI 4,5 Nun simmo d’accordo, ma ànnu diciso ca s’à dda ‘mprimmese penzà ô campiunato; e va bbuó, dicimmo ca sí, però visto ca nun è overo ca tenummo ddoje scuatre d’ ‘o stesso piso e vvisto ca Cavani e Pandev(vo) ànn’ ‘a jucà ‘na quarantina ‘e minute ll’uno se putesseno pure alternà, uno p’aione, dànno ‘na mano a ll’attacco ca nun esiste o è mmale assurtito cu Insigne e Vargas(so). Comme pure nun se po’ ffà a mmeno cuntemporanamente ‘e ggente comme Campagnaro, Inler, Behrami e Marekiaro! ‘O Dnipro nun facette ‘na grossa ‘mpressione; nun dico pe vencere, ma pe pariggià ‘a fullé fósse avastato quacche cagno mancante: dduje o tre titulare nfra attacco e mmediana e ‘a scuatra êsse cagnata faccia! L’ARBITRO 6 un saccio ‘o nomme, ma fuje ‘nu signore; nun sbagliaje quase niente, cumpresa ‘a rredda annullata a Insigne pe n’urzo ‘e cóse (fuorigioco) ‘e Fernandez(zo) e cchiú ‘e ‘na vota ce aizaje ‘a mana! E cu chesto ve saluto. Staveti bbe’ e si dDi’ vo’ ce sentimmo llunnerí ca vene! R.Bracale Brak