I’ PUZZO!

I’ PUZZO! I’ puzzo...e mme ne vanto! Puzzo ‘e preta ‘e tufo, ‘e vuosco ‘e Capemonte, d’ Orto botanico a fFuria,puzzo d’ abbísemo (golfo), puzzo d’Ischia, ‘e Capri, ‘e Pròceta, puzzo’e lava d’ ‘o Vesuvio, ‘e chella d’ ‘e Virgene, puzzo ‘e mare, puzzo ‘e cozzeche, puzzo ‘e jammarielle, ‘e pezzogna a ll’acqua pazza, d’alice ‘nturtiera, ’e vermicielle a vvongole verace, puzzo ‘e rraú, ‘e pizza doce fatta ‘ncasa, ‘e pizza ô furno ‘nzogna e ppummarole, ‘e pizze fritte cicule e rricotta, ‘e puparuole ‘mbuttunate, ‘e parmigiana ‘e mulignane, ‘e muzzarella ‘ncarrozza, ‘e cinche castielle,uno meglio ‘e n’ato; puzzo ‘e zurfatara, ‘e canzone cantate a ffronne ‘e limone dint’ ô bburdello d’ ‘o traffico,puzzo ‘e chello ch’è rrummaso d’’e ccanzone d’ ‘o festival(lo) ô Politeama, puzzo ‘e frutta e vverdura comme ll’à fatte ‘a mamma,puzzo ‘e serate ‘mmiez’a ‘na chiazza assettato cu dduje o tre amice fora a ‘nu cafè...,puzzo ‘e pulezzia ‘ncasa e spurchizzia ‘nchiazza,[ma nun so’ maje i’ chillo ca sporca!...], puzzo ‘e trasturno (disordine)sincero, apierto e ffranco,puzzo ‘e cafè espresso,’e rusolio fatto ‘ncasa, puzzo ‘e musica e ccanzone antiche, ‘e sole,’e mare, ‘e scuoglie e ffaragliune, ‘e frittura ‘e pesce, puzzo ‘e panzarotte, ‘e sciurille e de pastecrisciute...puzzo ‘e criature ca jocano a ppallone ‘mmiez’â via..., puzzo d’addichíe (ingiustizie) azzettate zitto e mmuto,puzzo, anze fèto ‘e baióteta (precarietà),’e maneca larga (generosità), ‘e cunfianza (fiducia) p’ ‘o ‘pòmeno (prossimo); puzzo d’ afelèia (ingenuità), e dde zimàire (illusioni), ‘e sagliute e de scese, ‘e chiazze e vvicule, ‘e cchiesie, ‘e panare acalate dê balcune, ‘e "Lassammo fà a dDio! "‘e "’A Maronna t'accumpagna",’e ‘na città sutterranea, ‘e pane d’ ‘o furno a ffascine, ‘e corze cu ‘o muturino ‘ncopp’ô marciappiere..., puzzo d’arte d’arrangiarse,’e ticòteta (inventiva) e de prosarmo (adattamento); puzzo ‘e dummeneche ‘nfamiglia cu ‘a tavulata, ‘o spasso e ‘o bicchieriello ‘e vino,puzzo d’alleria, puzzo de panne appise a s’asciuttarse no dinto a ‘na stanza, ma fora a ‘nu balcone o fora a ‘na lloggia cu ‘e ssovere e ‘o mellone, dint’ô viento e dint’ô sole ca spacca ‘e pprete e ‘nfoca tutt’ ‘e ccase..., puzzo ‘e chillu bidè ca ‘mPiamonte ô 1860 nun sapevano manco che fósse e penzavano ca se trattasse d’ ‘a forma ‘e ‘na chitarra! Puzzo ‘e ‘na lengua ch’è ‘na musica e è ccanusciuta e pparlata pe tutt’ ‘o munno e ausata ‘a ‘na sarma ‘e puvete cu ‘a "P" majateca!Puzzo ‘e tiempo antico, ‘e Riame d’ ‘e ddoje Sicilie ricco e putente cu nNapule capitale! Puzzo ‘e tutto chesto e mme ne vanto pecché è cchesto ca dà prufumo â vita mia e a cchella ‘e ttutte ‘e napulitane digne ‘e ‘stu nomme! E se futtesse chi dice ‘o ccuntrario e penza ‘e mme sfottere sulo pecché tène ‘nu microfono ‘mmano e pparla p’ ‘a teluràsa(televisione)! Sciú! Â faccia sója,sciú! R.Bracale Brak