PATANE ALLARDIATE

PATANE ALLARDIATE Chesta vota ve prupongo ‘nu cuntorno d’alliccarse ‘e bbaffe. Chello ca ce vo’ pe sseje perzone ‘nu kilò ‘e patane vecchie, 200 gramme ‘e lardo ‘e panza allacciato, 50 gramme ‘e ‘nzogna, 2 cucchiare ‘e farina, ‘na cepolla ndurata ‘e Muntoro ntretata, ‘na farinula pe bbroro veggetale,miezu bicchiere ‘e vino janco asciutto, sale fino e ppepe niro mmacenato a ffrisco q.n. s., ‘nu tuppeto ‘e prutusino lavato,asciuttato e ntretato finu fino. Comme se fa Ammunnà ‘e ppatane, tagliarle a ppacchetelle, lavarle e asciuttà. Mettere dinto a ‘na prupurziunata marmitta, pruvvista ‘e cupierchio ‘o llardo allacciato e ‘a ‘nzogna e a ffuoco allero fà zuffriejere pe cinche minute; agnadí ‘o ttrigliato ‘e cepolla e sempe a ffuoco allero farle piglià culore; a ‘stu punto derrammà ‘e duje cucchiare ‘e farina facennola ndurà; subbeto doppo agnadí ‘o vino e meza ciotola d’acqua vullente addó è stata accumpliata ‘a farinula ‘e broro veggetale; aspettà ca jesce a vollere e agnadí ‘e pacchetelle ‘e patane;accuncià ‘e sale e ppepe, ammiscà, cummiglià ‘a marmitta avascià ‘o ffuoco e lassà cocere pe trecquarte d’ora; stutato ‘o ffuoco derrammà ‘e ppatane cu ‘nu tuppeto ‘e prutusino lavato,asciuttato e ntretato finu fino. Serví caude ‘e fuculare ‘sti patane sabrose, cratistu cuntorno ‘e carne, ‘e pesce o de latticine. frische. Brak .