NAPOLI – MILAN (17.11.12) 2 A 2‘A VEDETTE ACCUSSÍ

NAPOLI – MILAN (17.11.12) 2 A 2 ‘A VEDETTE ACCUSSÍ Che nervatura guagliú, che nervatura e che scajenza! Ma comme ajeressera ‘o Napule aveva avuta ‘a sciorta ‘e ‘ncuntrà ‘nu Milàn(no) quase muorto ô san Paolo dint’â jurnata ca ‘a rubbentus(sa) e ‘o pappavallo ‘e Lotito êvano ‘mpattato pe zero a zzero... e aveva avuta ‘a sciorta ‘e mettere ddoje palle ê spalle d’Abbiati(ca [pe pparta soja] - primma ‘e caccià ‘a scienza ‘ncopp’ê tire ‘e Cavani – ll’êva dato ‘na bbona mana...), e mmece ‘e nchiudere ‘o fullé cu ‘na rredda risulutiva..., neh chillo se fa agguantà ‘ncopp’ ô doje a ddoje sciupanno ‘nu sangradale e nguajannome ‘a serata?! E quanno ll’avimmo cchiú n’accasione comme a cchella d’ajere? Quanno? Ajere êssemo pututo mannarne â casa chiagnenno a Allegri e a gGalliani, ma nun ce riuscèttemo! E che saciccio! Cca quaccheduno ce à menato ‘o nniro ‘e seccia! Ajere fernette ca ‘o Ciuccio s’ êtt’ ‘a cuntentà ‘e ‘nu punticiello doppo d’averme fatto magnà ‘o fecato pe tutta ll’arranqua! Nun riuscette a vvencere e i’ me ‘ntussecaje ‘a serata e stevo ascenno a ppisce fetiente cu n’amico ca s’azzuppava ‘o ppane assettato ‘ntribbuna-divano addó fa nfenta ‘e tifà p’ ‘o Napule, mentre sotto pelle è ‘nu juventino futtuto! Passammo ê ppaggelle va’: DE SANCTIS 6: ‘Na vota tanto nun tenette niente a cche vvedé cu ‘e rredde ‘ncassate, a differenza d’ ‘o culleca ‘e rimpetto,Abbiati. ‘Na vota tanto nun me facette fà ‘e capitune ‘ncuorpo quanno ascette ‘ncopp’ê tanti cruzze d’ ‘o Milàn(no). CAMPAGNARO 6,5: Fuje ‘o meglio d’ ‘a difesa cuana e pe paricchiu tiempo crastaje (costrinse) a El Shaarawy a ggirà a llargo pe cercà spazzio. Sulo prufanamente(apparentemente) ce trasette ‘int’ a ll’azziona d’ ‘o doje a ddoje quanno ‘a corpa fuje tutta ‘e Gamberini e ppo ve dico. CANNAVARO 5,5: Partette grannezzuso (alla grande) e mettette paura mo a bBojan, mo a bBoateng. A ll’arranqua però venette meno dint’ê mmecce, se tiraje ‘a pizza sotta e se chiammaje fora! GAMBERINI 5: Serata no ‘e ll’ècchese viola: ascette tarde e nun riuscette a nchiudere ‘ncopp’â primma rredda ‘e El Shaarawy e addirittura ‘o tenette ‘nghiuoco ‘int’ a ll’azzione ca purtaje ô siconno. Amàrteme (erroracci) ca arruvinajeno ‘a serata luvarda. MAGGIO 4,5: Rummanette â casa vicino ô criaturo ca nun ‘o fa cchiú durmí â notte.Nun se vedette maje a appressurà ‘ncopp’â curzia ‘e dritta addó ‘nteoria êsse avuto ‘a pussibbilità ‘e mettere ‘ndifficultà a Constant. Ma chi t’ ‘o ddà?! Passanno,pe gghionta ‘e ruotolo tarde, cu ‘a difesa a cquatto, fuje piezzo e ppeio! I’ nun capisco pecché Mazzarri se nfessisce ‘e tenerlo titulare d’ ‘a fascia e a tenerlo ‘ncampo quase nfi’â fine, quanno se vede ca ‘o guaglione è spumpato, stracquo e ssenza cegna! (A ll’88° VARGAS: sv) DZEMAILI 6: Miso ‘ncampo ô posto d’ ‘o squalificato Behrami, cu ttutto ca nun è ‘o ruolo suojo chillo ‘e fà ‘o cane ‘e presa, nfi’ a cche stette allerta isso, ‘o centrocampo d’’o Napule ‘a cummannaje e ‘e cuane fremmajeno qualunqua repartita (ripartenza). Passanno ‘o tiempo ‘o giuvinotto se ne scennette ‘e posa,ll’atalossa soja perdette ‘e cunzistenza e ce fósse vuluto ‘nu sustituto ca ‘o Napule nun tène visto ca Donadèllo è ‘na mmummia alisandrina bbona pe dinto a quacche scaravattolo d’ ‘o Museo Nazzionale a fFuria! INLER 6,5: ‘O meglio d’ ‘o Napule e nun sulamente p’ ‘a rredda signata (quanno avette ‘na bbona mana da Abbiati),ma p’ ‘a fatica cratista (ottima) fatta comme riggista. Peccato ca po dinto a ll’urdema mez’ora se sgunfiaje pur’isso! HAMSIK 4,5: Me dispiace, ma quanno ce vo’, ce vo’ pecché uno comme a isso à dda capí ca allimmeno diece minute a fullé ll’à dda jucà e nun po’ ffà comme facette isso ajere ca nun détte ‘na mana manco si ll’êsseno acciso... e soprattutto po pecché uno comme a isso nun po’ fallí n’accasione retissante comme a cchella ca lle capitaje a ll’arranqua, accasione ca avesse pututo definitivamente nchiudere ‘o fullé, accasione ca isso ‘mmece sciupaje malamente! ZUNIGA 5: Venette ricuperato a ttiempo a ttiempo (in extremis) e se vedette. Partette bunariello, ma a ll’arranqua se scurdaje cumpletamente ‘e difennere accuntentannese ‘e quacche repartita e de quacche ricato senza zuco. Ascette troppo tarde(A ll’87° DOSSENA: ng) INSIGNE 6,5: Se vedette poco, ma cu ‘o pallone ‘mmiez’ê piede nun sbagliaje ‘nu colpo.Uperruso (splendido) ‘o muvimento dint’â camma ca fruttaje ‘o doje a zzero.Sbagliaje una vota, quanno a ttu ppe ttu cu Abbiati, mmece ‘e tirà ‘mporta passaje a cCavani ca steva marcato. Ascette quanno Mazzarri ll’êsse vuluto cchiú battagliero ‘nfase difenziva, ma nun è cchello ca po’ ffà Lorenzigno e ascenno ‘o Napule perdette tanto ‘nfase uffenziva! (Ô 65° MESTO 5,5: Trasette pe fà cagnà ‘a scena comme era succieso a gGenova..., ma nun tutte ‘e mise songo ‘e trentuno e ajere nun se vedette maje. Colpa nun sultanto soja, ma pure ‘e Mazzarri!) CAVANI 6: Me parette ‘nu poco stanco e cumunque avette ‘o primmo pallone ‘a jucà sulo ô 64° e ‘mpignaje a Abbiati ca abbiaje a ccaccià ‘a scienza! Stessa cosa capitaje dieci minute cchiú ttarde. Détte po ‘na granna palla a Marekiaro ca però sciupaje ll’accasione! Forze tutto summato ‘o fatto ca, ammunito, à dda zumpà ‘o fullé a cCagliari, lle po’ fà bbene, facennolo arrepusà ‘nu poco.Spero sulo ca a cCagliari Wallerettino Erode Mazzarri se decide a ffarce vedé ‘e che panne veste Novotny! Allenatore MAZZARRI 4: Ll’ommo mancante d’ ‘o Napule fuje isso ca tiraje ‘o freno a mmano quanno ô 65° levaje a Insigne pe mettere a mMesto passanno a ‘nu 4-3-3 ca fagliaje (privò) ‘e suoje ‘e ll’ommo capace ‘e minaccià, cu ‘a nicessaria vitezza (velocità), ‘a bradosa (lenta) difesa milanista.Ce penzaje ‘a coppa po quanno arrivate ô doje a ddoje menaje dinto a vVargas ô posto ‘e Maggio; ma ormaje ‘o fullé se nn’era juto e nun ce stette niente ‘a fà. Pe mme fóss’ora ca De Chiacchiaroniis ‘o licenziasse; troppo scarzugno (sparagnino) e poco curaggiuso pe puté vvencere ‘nu scutetto! Arbitro BERGONZI 4.5 Cierti vvote ce purtaje bbuono,ajere no! E i’ nun ‘o vulesse cchiú; è ‘na meza cazetta comme ô riesto ‘e tutte ll’arbitre italiane, ma se porta ancòra appriesso ‘o pisemo d’ ‘e critiche ca avette p’’e duje rigure date ô Napule (tempurata 2007/2008) contro â juventússa; ‘a tanno, quanno arbitra ‘o Napule, pe fà vedé ca nun sta abbaccato cu ‘e napulitane sisca sempe contro ê cuane e ‘nzerra tutte ‘e dduje ll’uocchie cunzentenno(senza piglià pruvvedimente) ‘nu juoco viulento all’avverzarie d’ ‘o Napule (comme succedette ajere, ca primma ‘e tirà fora ‘nu cartellino jalizzo ‘nfaccia a ‘nu milanista , nce penzaje diece vote ‘a coppa e ppo nun ‘o cacciaje, futtenose ca puteva succedere ‘na disturbata e fósseno putute ascí a mmazzate…) cunzentenno ‘nu juoco viulento e carugnesco favezo e ammagagnato (nun m’arricordo ‘o nomme...,ma ‘a faccia ‘e delinquente cu ‘o naso ‘e ‘nu boxerro, sí ). Pe gghionta ‘e ruotolo teneva signate ca Cavani era diffidato e senza ca ‘o zengariello êsse fatto ‘na falta ‘mpurtante, ll’ammunette a pposta pe nun farlo jucà ‘o prossimo fullé!) Purtroppo tutte ll’arbitre italiane so’ meze-cazette e visto ca ‘o Napule dint’ô Palazzo conta quanto a ll’icchese dinto a ll’affabbeto,ce avimmo tené ‘a posta! ‘Nconchiusione me vène ‘a ridere quanno quaccuno me vène a pparlà ‘e scutetto! Possibbile ca nisciuno s’accorge ca ‘o Napule (me dispiace d’ ‘o ddicere, ma ll’aggi’ ‘a dicere...) è ‘na scuatra ca s’arrangia, ch’ è senza allenatore, senza ‘nu veru juoco, senza ggenio ‘e luttà,’e vincere.Accussí nun se po’ gghí cchiú annante! Cca s’à dda vedé che s’ à dda fà pecché aggio paura ca pure ‘e piazzamente buone p’assicurarce ‘na partecipazzione airupea nun so’ sicure cu ‘nu De Santis ca pure facenno ‘o duvere suojo s’è abbuscato ddoje purpette ê spalle, cu Gamberini vecchia roccia ca pure isso sbaglia e arruvina ‘a festa, cu zZuniga ca aiza porvera, stanco e ca nun è ccapace ‘e vencere ‘nu ricato (dribbling), cu ‘nu Maggio ca ggià ‘a n’anno nun è cchiú nisciuno e ca ‘a che ‘a mugliera à figliato è addivintato peggio.... pe nun parlà ‘e chille ca, comme a Cannavaro,nun so’ maje state quaccuno, pe nun parlà ‘e jucature comme a Marekiaro ca fanno troppo poco ‘e chello ca sanno e putesseno fà. Salvo sulo a cCavani e a quacche ato, ma cumunque ‘o respunzabbile cchiú ggruosso è mMazzarri, pe tutte ‘e ccose ch’aggiu sempe ditto e soprattutto pecchè nun è ccacchio ‘e fà ‘o duvere suĵo e ccomme allenatore nun fà capí ê guagliune comme a Insigne ca sotto porta s’à dda essere cchiú cazze-mio e s’à dda tirà ‘mporta quanno ‘a pusizzione è mmeglio ‘e chella d’ ‘e cumpagne marcate.Ajere, p’assempio, Insigne puteva certamente fà ‘o bbisso, nchiudenno ‘o fullé, si nun avesse passato ‘a palla a cCavani ca steva ‘nritardo e troppo marcato! Quaccuno,m’à fatto nutà ca ‘o Napule è ‘nfra ‘e pprimme diece/dudece scuatre airupee... Fósse ‘a Maronna! Pe mme ‘o Napule, me dispiace d’ ‘o ddicere, è sí e nno ‘na scuatra ‘e centrocrassifica taliana e è difficile ca po’ luttà pe traguarde ‘mpurtante! Fósse ora ca ‘a suggità arapesse ll’uocchie e penzasse a ffaticà seriamente p’adderezzà ‘a varca e ccagnà chello ca s’à dda cagnà accumincianno ‘a ll’allenatore ca se nn’à dda jí! E cu chesto ve saluto speranno ca cu ‘o Cagliari, pure senza Cavani, ce levammo ‘e pacchere ‘a faccia d’ ‘o pareggio d’ajere e turnammo a aizà ‘a cresta. Staveti bbe’. E ssi dDi’ vo’ ce sentimmo llunnerí ca vène. R.Bracale Brak