VERMICIELLE Â PUTTANESCA

VERMICIELLE Â PUTTANESCA Chello ca serve pe 6 perzone: 600 gramme ‘e vermicielle, miezi chilò ‘e pummarole mature lavate, scuttate, spellate e ttagliate a ffarinule, 200 gramme d’ aulive nere desciusciate, 2 spicule d’aglio ammunnate e ntretate finu fine d'aglio, 2 cucchiare ‘e chiapparielle levate ‘e sale sciacquate e asciuttate, 120 gramme ‘e sulumiglie d’alicesalate sott’uoglio, ‘nu bicchiere d’ uoglio ‘aulive dunciglio, ‘nu puparunciello pirciante (piccante)lavato, asciuttato e grabbato (inciso) p’ ‘o lluongo, ‘nu cucchiaro d’arecheta secca, ‘nu túppeto ‘e prutusino lavato, asciuttato e ntretato finu fine, sale fino q.n.s. sale duppio ‘na vrancata. comme se fa: Dinto a ‘na prupurziunata tiella appruntà ‘nu zuffritto facenno callentà a ffuoco allero tutto ll’uoglio cu ‘o ttrigliato d’aglio e ‘o puparunciello pirciante (piccante)lavato, asciuttato e grabbato (inciso) p’ ‘o lluongo.Agnadirve ‘e sulumiglie d’alicesalate e farle sciogliere dinto a ll’uoglio vullente; auní ‘e ffarinule ‘e pummarole, ll’ aulive nere desciusciate e ‘e duje cucchiare ‘e chiapparielle levate ‘e sale, sciacquate e asciuttate; accuncià ‘e sale e lassà cocere pe ‘na mez’ora.Fraditanto àrvere teniente teniente ‘e virmicielle dinto a ‘na caurara d’acqua vullente salata (vrancata ‘e sale duppio); scularle asciutte asciutte e revacarle dint’ â tiella cu ‘o zuco, derrammarve ll’arecheta, tuiglià e ‘mpiattà cumpletanno ‘e piatte cu ‘o prutusino lavato, asciuttato e ntretato finu fine. Serví ancora caude ‘e fucularo. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale