RICCE ‘E FURETANE Â MUNTANARA

RICCE ‘E FURETANE Â MUNTANARA Chello ca ce vo’ pe sseje perzone 600 gramme ‘e ricce ‘e furetana, 250 gramme ‘e caso pecurino rattato , 300 gramme ‘e spalla ‘e purciello mmacenata, 2 ove, 150 gramme ‘e mullica ‘e pane casareccio ammullata cu ‘nu bicchiere ‘e latte caudo retunno, ‘nu bicchiere d’uoglio ‘auliva dunciglio, 300 gramme ‘e passata ‘e pummarola, meza cepolla ndurata ‘e Muntoro ammunnata e ntretata, ‘nu tuppeto ‘e prutusino lavato, asciuttato e ntretato, sale fino e ppepe niro mmacenato a ffrisco q.c.n.v., sale duppio ‘na vrancata. Comme se fa Mettere dinto a ‘na zupperella ‘a carne mmacenata,’a mullica ‘e pane casareccio ammullata cu ‘nu bicchiere ‘e latte caudo retunno, ‘e ddoje ove, ‘na ‘mmità d’ ‘o ccaso pecurino rattato, ‘nu pizzeco ‘e sale fino e ppepe niro mmacenato a ffrisco, ‘na mmità d’ ‘o tuppeto ‘e prutusino lavato, asciuttato e ntretato e ‘na vota ‘mpastato, furmà cu ‘stu ‘mpasto tanti purpettelle grosse comme a ‘na noce piccerella; fraditanto dinto a ‘na prupurziunata tiella ricà ll’uoglio e a ffuoco allero fà piglià culore â cepolla ndurata ‘e Muntoro ammunnata e ntretata; ricà ‘a passata ‘e pummarola, accuncià ‘e sale fino e pepe niro, avascià ‘o ffuoco e lassà cocere pe quinnece minute; a chistu punto ricà dint’a ‘stu zuco ‘e purpettelle appruntate, cummiglià e lassà cocere pe diece minute, mantenenno ‘ncaudo. Àrvere teniente teniente ‘e ricce ‘e furetana dinto a otto litre ‘e acqua vullente salata (vrancata ‘e sale duppio), scularle e revacarle dint’ â tiella cu ‘o zuco mantenuto ncaudo. Ammiscà derrammanno cu ‘o riesto d’ ‘o ccaso pecurino grattato finu fino, e fora dô ffuoco cu ‘o riesto d’ ‘o tuppeto ‘e prutusino lavato, asciuttato e ntretato. Ammiscà, ‘mpiattà e sserví súbbeto ‘ntavula ‘sti sabruse ricce ‘e furetane â muntanara. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale