NAPOLI – VICTORIA PLZEN (14/02/13) 0 A 3!‘A VEDETTE ACCUSSÍ

E/L NAPOLI – VICTORIA PLZEN (14/02/13) 0 A 3! ‘A VEDETTE ACCUSSÍ Che mazziata guagliú e cche granna fijura ‘e ppuppú! E cchi s’ ‘o fósse aspettato...chi? E ‘mmece jette proprio accussí e ‘e cuane se nn’ êtten’ ‘a ascía dô san Paolo cu ll’ossa rotte e ‘ncapo ‘e nuvanta e cchiú minute nun fujeno cacchie ‘e signà manco ‘na zuzzimma ‘e rredda d’ ‘a bbannera. E che saciccio! Doppo d’avé rijalato a ll’avverzarie tutto ‘o primmo aione,’nsotto ggià ‘e ‘na rredda a ll’arranqua se magnajeno quatto o cinche accasione e ‘ncoppo a dduje contropiete s’ abbuscajeno n’ati ddoje rredde e fujeno tre: ‘a primma dô lemmeto d’ ‘a camma ca De Sanctis c’êsse pututo fà quaccosa..., ma seh... chi t’ ‘o ddà?,’a siconna ca ‘o... cecagnuolo, voglio dicere ‘o ceko, steva nn’ orzo ‘e cose (fuorigioco),ma ce n’addunajemo sulo nuje ‘ntribbuna-divano, mentre arbitro e signalinie nun ‘o vvedetteno... e ‘a terza cu ‘na granna puttanata ‘e Zuniga ‘nchietta (in coppia) cu De Sanctis ca ô ssolito nun ascette, nè lle dicette ‘e jettà fora ‘o pallone... ‘Nzomma ‘o Napule doje, ma cu De Sanctis e cCavani e ô siconne aione pure cu cCalaiò, cu mMarekiaro e ppo pure cu Inlèr(ro) facette ‘na granna fijura ‘e ppuppú annante ô scarzo pubblico d’ ‘o san Paolo..., ‘ncopp’ a ‘nu schifo ‘e campo addó cchiú ‘e ‘nu cuano sciuliaje e ‘nciampecaje dint’ê mumente cchiú ‘mpurtante... eppure eppure nun saccio si ‘ncazzarmene o esserne cuntento. E mme spieco: purtroppo chesta è ‘a forza d’ ‘o Napule e vvisto e ccunziderato ca ‘o Napule, ‘stu Napule,proprio nun è ccapace ‘e stà all’ardezza manco ‘e ‘sti scanusciute cecagnuole (ca ‘mmece ce vedetteno bbuono assaje e sapetteno chello ch’avevan’ ‘a fà...), visto e ccunziderato ca ‘o Napule pe passà ‘o turno, ‘nfra quinnece juorne êss’ ‘a jí â casa lloro, â casa d’ ‘e cecagnuole a ffarle vrognole vrognole e nun saccio proprio ‘a sustanza e ‘a cegna pe ffà chesto ‘a do’ ‘e pponno piglià..., visto e ccunziderato tutto chesto, i’ dico ca se futtesseno De Chiacchiaroniis e ttutte ‘e ppaparelle ca se putesse mettere dint’ô cogliapiecuro, si ‘o Napule passasse ‘o turno... e ‘e cuane penzasseno sulo ô campiunato pe ddà filo ‘a torcere â rubbentús(sa) e vedé si se putesse mettere ‘e mmane ‘ncopp’ a cchillu coso a ttre cculure... ca fósse tutta n’ata suddisfazzione..., ato ca E/L! Passammo ê ppaggelle va’! No, ‘sta vota paggelle nun ne faccio; nun s’ ‘e mmeretano; mecco quatto a ttutte quante ‘a fora ‘e ll’arbitro ulandese, ‘e Mazzarri, ‘e De Sanctis,’e Zuniga e ‘e Donadèl(lo) ca s’ammeretano tre e lloro sanno ‘o pecché. E cu cchesto ve saluto e si dDi’ vo’ ce sentimmo lunnerí ca vène, speranno ca dummeneca cu ‘a Sampedoria ‘o Napule nun facesse fessarie e turnasse a vvencere. Staveti bbe’! R.Bracale Brak