CASOCAVALLO FRITTO

CASOCAVALLO FRITTO Chesta è ‘na granna manera ‘e priparà e serví, comme trasetura cauda ‘o ssabruso casocavallo pudolico percante (piccante),caso tipico d’ ‘e cumarche (regioni) meridiunale prudotto sulamente cu ‘o llatte d’ ‘e vvacche pudoliche, tradiziunalmente sulo durante a ccierti periode ‘e ll’anno: fine staggiona (estate) – testera (principio) ‘autunno. ‘A razza ‘e vacche pudoliche ca ‘na vota era presente ‘ncopp’ a ttutto ‘o territorio taliano, mo oramaje se trova sulo ‘ncopp’ê muntagne d’ ‘a Campania, d’ ‘a Sila,d’ ‘a Puglia e d’ ‘a Sicilia ‘nterna. Chello ca ce vo’ pe sseje perzone ‘Nu kilò e duiciento gramme ‘e casocavallo pudolico percante, Dduje spicule d’aglio ammunnate e scamazzate, ‘Na tazzulella d’acito ‘e vino janco, ‘Nu pizzico d’arecheta, Miezu bbicchiere d’ uoglio pe frijere Dujeciento gramme ‘e cierne (gherigli) ‘e noce ntretate, Sale fino e ppepe janco macenato a ffrisco q.n. s. ottuciente gramme ‘e felle ‘ pane casareccio abbrustuluto ô tiesto caudo(220°). Comme se fa Taglià ‘o ccaso a felle doppie ‘nu centimetro; dinto a ‘na tiella ‘e fierro niro callendà (riscaldare), a ffuoco allero, ‘o miezu bbicchiere d’ uoglio pe frijere ‘nzieme cu ‘e spicule d’aglio ca vanno levate appena pigliano culore. Agnadí (aggiungere) una â vota tutte ‘e ffelle ‘e casocavallo e farle suassà (rosolare) ‘nu minuto pe ffaccia; farne scorrere ‘nu poco ll’uoglio supierchio e appujarle ‘ncopp’ a ‘nu fuoglio ‘e carta asciugante; a chistu punto passarle dinto a n’ata tiella ‘e fierro niro callendata senza cunnimma e ‘nfonnerle cu ll’acito, prufumarle cu ‘nu pizzeco d’arecheta,pocu ssale e paricchiu ppepe janco macenato a ffrisco; servirle caude ‘e tiella derramate (cosparse) cu ‘e cierne ‘e noce ‘ntretate ‘ncopp’ê ffelle ‘e pane abbrustuluto ô tiesto. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja. Magna Napule, bbona salute! Scialàteve e aggarbbatéve ‘o vernecale!! raffaele bracale