MACCARUNCIELLE Ô ZUCO D’ANNECCHIA E FUNGE

MACCARUNCIELLE Ô ZUCO D’ANNECCHIA E FUNGE Chello ca serve pe cquatto perzone 400 gramme ‘e maccaruncielle murcellate a ppiezze ‘e quatto centimetre, 300 gramme ‘e spalla d’annecchia a ffarinule ‘e ‘nu cm. ‘e squina, ‘nu bicchiere d’uoglio ‘aliva dunciglio, 50 gramme ‘e funge sicche ammullate cu ‘na tazza d’ acqua cauda, miezu litro ‘e broro fatto cu acqua cauda e ddoje farinule pe broro vegetale, ‘na fraschetella ‘e rosamarina lavata e asciuttata, ‘nu bicchiere ‘e vino janco asciutto ‘na cepolla ‘e Muntoro ammunnata e ntretata, ‘nu spiculo d’aglio ammunnato e ntretato, sale duppio ‘na vrancata, sale fino e pepe janco mmacenato a ffrisco q.c.n.v. ‘nu tuppeto ‘e prutusino lavato, asciuttato e ntretato. Comme se fa Fà ammuscià ‘e funge dinto a ‘na tazza d’acqua cauda e spremmerle ‘nu poco;fraditanto appruntà ‘a carne tagliata a ffarinule ‘e ‘nu cm. ‘e squina; a ffuoco allero dinto a ‘na prupurziunata tiella ricà ll’uoglio e ffà suassà ll’aglio e ‘a cepolla ‘nzieme â fraschetella ‘e rosamarina lavata e asciuttata; agnadí ‘e ffarinule ‘e carna e farla ndurà per tre minute, ricà ‘o vino e farlo svapurà, agnadí ‘o broro, accuncià ‘e sale e ppepe e cuntinuà ‘a cuttura pe ‘na mez’ora; a ‘stu punto piglià ‘e funge ammullate, ntretarle e agnadirle ô zuco ‘e carne cumpletanno ‘a cuttura ‘ncapo ‘e n’ati diece minute a ffuco avasciato. Fraditanto dinto a abbunnante acqua salata (vrancata ‘e sale duppio) còcere vierde vierde ‘e maccaruncielle; scularle e agnadirle dint’â tiella; ammiscà e lassà ‘nzapurí pe quatto minute a ffuoco allero.A ffuoco stutato derrammà cu ‘o prutusino ntretato e abbunnante pepe janco mmacenato a ffrisco.Ammiscà ancòra, ‘mpiattà e serví caude ‘e fuculare chisti sabbruse maccaruncielle ô zuco d’annecchia e funge. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale