ARSENAL- NAPOLI 2 A 2 ( 3/8/2013)

ARSENAL- NAPOLI 2 A 2 ( 3/8/2013) ‘A VEDETTE ACCUSSÍ Che delusione, guagliú, che delusione! Nun è ancòra accumminciato ‘o campiunato, se trattaje ‘e n’amichevole, ma ‘a delusione fove forte ô stesso, pecché doppo ‘nu primmo aione ca me s’allariaje ‘o core comme a ‘nu cufenaturo pecché ‘o Napule steva vincenno pe ddoje a zzero e m’aspettavo ca a ll’arrancua êsse miso ll’uoglio ‘a copp’ô peretto facenno scennere ‘ncampo ‘o piezzo ‘a nuvanta: Higuaín(no). E ‘mmece, ‘mmece succedette ca ‘o Napule doppo d’ ‘e sostituzzione fatte ‘a Benitèz(zo) nun fove cchiú isso e avastajeno ddoje puttanate ‘e culo’echiummo pe fà pattà ‘o fullé a ll’Arsenàl(lo) ca proprio nun vulette perdere. E nun perdette! Ma ‘a sfarma fove tutta d’ ‘o Napule e me ‘ntussecaje pecché, nun me dicite niente..., amichevole, campiunato, Ciampionsa o coppa d’ ‘o nonno, i’ vulesse vencere sempe soprattutto quanno ce stanno ‘e premesse e fósse pussibbile. Pe ccuje ‘ncunchiusione me dispiace, ma ll’aggi’ ‘a dicere: ave voglia Benitèz(zo) ‘e dichiarà:” «Il Napoli è una grande squadra in Italia e vogliamo lavorare perché possa diventare forte anche in Europa. È una società che vuole crescere, stiamo lavorando per migliorare; ci è mancata l'intensità nella gestione della palla quando l'Arsenal ci pressava, nel secondo tempo in particolare», a mme ‘sta cosa nun me cuntenta e ca isso promuove tutta ‘a scuatra, dicenno: «Buona partita, abbiamo dimostrato quello che sappiamo fare», a mme nun me po’ ffà piacere: I’ voglio vencere! Sempe, cu ttutte e sinamparco (comunque)! E soprattutto nun voglio vedé cchiú ‘nnante ê ppalle ‘e ll’uocchie scarzune cumme a culo’echiummo, mesto e ddossena e mme fa maraviglia ca n’ommo priparato e de ‘sperienzia comme a Benitèz(zo) nun ll’à arrunzate ‘mparanza a ttutte quante e nun mm’ ‘o pozzo spiecà ‘e nisciuna manera. È overo ca stammo appena appena ô pprincipio e àmmo ‘a dà tiempo ô trainèr(ro) ‘e fà capí ‘o juoco ca vo’ e soprattutto ê viecchie ll’àmm’ ‘a dà ‘o tiempo ‘e metterse dint’ê chiocche ca ‘o direttore è cagnato e à dda cagnà pure ‘a museca e ll’ànn’ ‘a ferní ‘e fà chillu juoco ‘a femmenielle ca faceva mazzarri passanno sempe ‘o pallone arreto speranno ca ‘e difenzure ‘ncarrasseno ‘nu lanzo; è ‘nu juoco ca nun se po’ ffà: arreto nun tenimmo a kKròl(lo), ma a ‘nu scarzugno comme a cannavaro! Passammo ê ppaggelle va’: REINA 6,5 Ô pprincipio me facette fà ‘e vierme cu ‘nu pasiglio(passaggio) a cca**o ‘e cane, ma po se levaje ‘e pacchere ‘a faccia paranno ‘o ricore a Podolski. Facette n’atu miraculo ô finale, ma (pe bbia ‘e cannavaro, ca pe ddoje vote s’ addurmette cu ‘a zizza ‘mmocca) êtt’ ‘a piglià pe ddoje vote ‘o pallone ‘nfunno â rezza soja!Peccato! MESTO 4 Confermaje d’essere ‘nu jucatore fernuto; nun le riuscette nè ‘e mantené a dduvere ‘a zzona soja, né d’accumpagnà ll’azziona! . CANNAVARO 3 ‘A morta civile! ‘Nu guajo passato!Nun saccio si fove Benitèz(zo) a metterlo centrale ‘ncuollo a Giroud, ma nun fove cacchio ‘e mantenerlo, anze se facette spustà pesulo pesulo dô francese dint’ ‘accasione d’ ‘a rredda ca rimettette ‘nfullé (in partita) l'Arsenàl(lo).’Ncopp’â siconna rredda ‘ngrese s’addurmette pruvanno inutilmente a spustà ll’avverzario,a ‘nu metro dâ porta addó ‘nu difenzore capace êsse penzato ô pallone mannannolo ‘ntribbuna!Chisto nun po’ sta a ccentro d’ ‘a difesa e nun po’ stà manco ‘mpanca; chisto se nn’à dda jí, sempe ca tène ancòra mercato e si no ‘o rijalasseno, ‘o jettasseno, ma m’ ‘o levasseno ‘a ‘nante ê ppalle ‘e ll’uocchie!Tengo n’aità e nun pozzo suffrí accussí! BRITOS 5,5 Bastantamente sfurtunato, fósse ora ca se facesse benedicere ‘a ‘nu monaco ricchione! Eternamente sott’esame cunvincette poco; pruvaje a gghiucà a ppalla fa’ tu, a Vviva ‘o parroco! alluntananno pallune senza penzarce ‘a coppa ma ne rijalaje troppe a ll’avverzarie! (dô 62° ALBIOL 5,5 Trasette ô mumento cchiú difficultuso p’ ‘o Napule e me parette Pullicenella spaventato dê mmaruzze pure pecché cannavaro nun ‘o détte maje ‘na mana!) ARMERO 5 Se sape ca ‘o giuvinotto è cchiú purtato p’ appressurà (spingere) e nno pe difennere. Ajere nun le detteno ‘o canzo ‘e fà chello ca sape fà e quanno fove attaccato dimustraje ‘e saperce fà poco ‘ndifesa! BEHRAMI 7 Cu ttutto ca ll’arbitro ‘o cundizzunaje bastantamente, Valòn(no) nun se tiraje maje arreto luttanno ‘ncopp’a ògne ppallone! (da ll’85° DZEMAILI sv) INLER 5 Me détte ‘a ‘mpressione d’essere ancòra ‘nfase ‘e funcionamiento (rodaggio). Lanzaje a mmestiere a Insigne dint’ ‘accasione d’ ‘a primma rredda, ma po sbagliaje troppi bassurere (suggerimenti).Ô finale fove stracco assaje e i’ ll’êsse sustituito! INSIGNE 7,5 Purtaje ‘nvantaggio ‘o Napule scuntrannose e resistenno cu n’avverzario ddoje vote a isso; ê vvote nun fove priciso cu ll'urdemo pasiglio, ma fove sempe ‘na spina dint’ ô scianco p’ ‘a difesa ‘ngrese. (dô 76° DOSSENA 4 Chisto nn’ è n’ato bbuono pe san Gennaro ‘e pòvere, si nun ll’ànnu chiuso ancòra, si no ce sta sempe ‘o scasso o ‘a discarica ‘e Pianura; nun se po’ cchiú guardà; ajere sulamente ‘na bbrutta falta (un brutto fallo) e nient’ ato pe cchellu poco ca fove chiammato ‘ncausa! Ma pecché ‘o tenimmo ancòra? Forze Dela à fatto ‘nu vuto e nun ‘o po’ caccià? ) HAMSIK 7+.Ancòra troppo cumpassato e poco tassuso (veloce), ma soprattutto ô primmo aione facette bbelli ghiucate e tenette visione ‘e juoco cu granni bassurere (suggerimenti) comme a cquanno lanzaje a pPandev p’ ‘o 2-0. (dô 64° MERTENS 6 ‘E stima. Avette pochi pallune e nun putette fà vedé chello ca sape fà; ll’aspetto prutagunista ogge contro ô Porto) CALLEJÓN 6,5 ‘O giuvinotto ce sape fà e nun se sparagna; meglio ajere rispetto ô fullé cu ‘o Galatasaray. Aiuta ‘nfase difenziva e spisso dint’â stessa azziona se vede dint’â camma a difennere e ppo a ll’ attacco a serví l'urdemo pasiglio! (dô 46° MAGGIO 5,5 Se piazzaje a ddritta addietro a ll’artigliero (punta); po passaje a ffà ll’esterno d’ ‘o 4-4-2. Currette assaje, ma lle mancaje, comme ll’è sempe mancata,’a qualità pe cupulià (dialogare) cu ll’attaccante!) PANDEV 8 Troppo bbella ‘a rredda ca valette ‘o dubblato (raddoppio) luvardo (azzurro). Se cunfermaje ggià pronto e ‘mpalla; da primmo artigliero riuscette a ffà saglí ‘e suoje cu granna qualità e i’ ‘o vedesse bbuono pure ‘mmiez’ô campo visto ca è ll’unico capace ‘e guvernà a mmestiere ‘o pallone capace d’ annasconnerlo, difennerlo e ppo darlo cu pricisione ê cumpagne! (dô 46° HIGUAIN 6 ‘E stima. Cu ttutto ca nun fové ancòra a ll’arriba (al top) d’ ‘a cundizziona avette quacche bbuonu spunto perzunale pure nun ricevenno pallune dê cumpagne.) BENITEZ 6,5 Se vedette ca ll'Arsenàl(lo) steva cchiú annante ‘mpriparazione e cchesto forze po’ spiecà ‘o calo finale ca purtaje ô pareggio d’ ‘e gunners.’Ncumpenso ‘o primmo aione fove tutto d’ ‘o Napule e se vedette ‘a mano d’ ‘o spagnuolo ‘a fora ‘e quacche fessaria d’ ‘e viecchie ca cuntinuajeno a gghiucà comme facevano cu mazzarri passanno ‘o pallone arreto speranno ca ‘e difenzure ‘ncarrasseno ‘nu lanzo ca nun sapetteno fà visto ca arreto nun tenimmo a kKròl(lo), ma a ‘nu scarzugno comme a cannavaro ca nun me spieco pecché Benitèz(zo) ancòra se nfessisce a ffà jucà!’Ncumpenso me pare ‘e puté ddicere ca Marekiaro dintoâ zzona soja riesce a essere funnamentale e ca Callejòn(no) è ‘o jucatore adatto p’ ‘o juco ‘e Benitèz(zo) visto ca corre senza maje fermarse assicuranno l'equilibbrio ca ‘on Rafèle vo’. L’ARBITRO 4 Nun saccio comme se chiamma, ma saccio ca fove sfacciatamente casalinco; assignaje ‘nu ricore (ca nun ce steva) a ffavore d’’e ‘ngresi e nun ne détte uno, gruosso comme a ‘nu palazzo, a ffavore ‘e Pandev menato ‘nterra cu ‘nu sbuttulone ê spalle dint’ â camma ‘e ricore. Â prossima, si ‘o Signore ce ‘o fa vedé! Staveti bbe’ ! r.Bracale Brak