NAPOLI- BENFICA 2 A 1 ( 9/8/2013) ‘A VEDETTE ACCUSSÍ

NAPOLI- BENFICA 2 A 1 ( 9/8/2013) ‘A VEDETTE ACCUSSÍ ‘Assa fà â Madonna. Ajeressera jette comme êv a ‘a jí! Certo se trattaje pure ajere ‘e n’amichevole... ma ‘a suddisfazziona ‘e vencere fove grossa assaje pure si me fósse piaciuto ca ‘a difesa nun se fósse fatta cogliere ‘e surpresa â fine d’ ‘o primmo aione cunzentenno tempuraneamente ô Benfica ‘e pattà ‘o fullé; pe ffurtuna ca a ll’arrancua Higuaìn(no) s’arricurdaje d’essere n’artigliero e comme avette ‘a soja signaje ‘a primma rredda cu ‘a maglia luvarda e ce facette vencere ‘o fullé accussí comme m’aspettavo ca succedesse pe dimustrà ca cuonce cuonce ‘o juoco ‘e don Rafaele Benitèz(zo) sta venenno fora, se sta affinanno e ppo’ sulo migliurà; dammo tiempo ô tiempo, aspettammo ca ‘a difesa a cquatto trova ll’ammesca (l’amalgama) soja, aspettammo ca quaccuno scennesse dô lietto, se mettesse a gghiucà, cacciasse fora ll’amice ‘e Maria De Filippo e so’ ssicuro ca ‘e suddisfazzione nun ce veneno meno. ‘Nzomma ajere fove ‘na bbella serata cu quacche nnuvità ca ‘o Presidente c’êsse pututo sparagnà e sto’ parlanno’e chella fetenzia ‘e vesta nova d’ ‘O Surdato ‘nNammurato,[ ca si vengo a ssapé chi è stato lle scioglio ‘o velliculo cu ‘e mmane meje...],sto’ parlanno d’ ‘e gguaglione ccoccodè [ca ce steva cchiú ‘e ‘na marruffa senza manco ‘a bbellezza d’ ‘a ggiuventù...], e sto’ parlanno ‘e chella cafunata d’ ‘a bbannera americana cu ‘o stemma d’ ‘o Napule ‘mmiezo. ‘Ncumpenso ajeressera arrivaje ‘a nutizzia ca Marekiaro êva rinnuvato nfi’ ô 2018. E chesta fósse stata ‘na bbella nutizzia si nun me fósse arricurdato ca ‘e chisti tiempe ll’anno passato Cavani êva rinnuvato nfi’ ô 2017 e âmmu visto comme è gghiuta a fferní!...Ma nun penzammo ô ppassato; parlammo d’ ‘o fullé e ppassammo ê ppaggelle. REINA 6 ‘A rredda d’’o Benfica nun fove sfarma soja, ma d’ ‘a difesa ‘mparanza e soprattutto ‘e Zuniga e Albiòl(lo) ca nun dètteno ‘na mana a Britòs(so) ‘mpignato a cuntrullà ‘nu paro d’avverzarie.Nsi’ a ll’urdemo ‘o purtiere pruvaje a ddà ‘na voce ê cumpagne pecché nun lassasseno sulo a Luisao, ma nisciuno ‘o stette a ssèntere! Cumplessivamente n’asciuta ô lèmmeto d’ ‘a camma, po nun fove maje ‘mpignato. (dô 46° RAFAEL 6 Cunfermaje ‘e tené cratiste (ottime) qualità tecniche, jucanno spisso cu ‘e difenzure cu tranquillità e sicurtà (sicurezza)). MESTO 6 Atalossa urdinata ‘a soja, ‘nu poco pecché ‘o Benfica nun se facette vedé troppo dê pparte soje ‘nfase uffenziva, ‘nu poco pecché avette spazzio ‘ncopp’â curzia ‘e dritta e putette farese vedé. (dô 46° MAGGIO 5 Nun fóve ancòra a ll’arriba (al top) d’ ‘a cundizione, pe ccuje quanno partette ‘ncopp’â curzia ‘e dritta nun riuscette a ffà ‘a differenza) ALBIOL 6 Nun cummettette sfregazze (sbavature) ‘a fora chella ‘e lassà sulo a lLusiao e cu perzunalità, soprattutto a ll’arrancua, se staccaje spisso pe ‘mpustà l'azziona. Trasenno Cannavaro s’êtt’ ‘a spustà cchiú a mmancina. (dô 74° GAMBERINI 6,5 Nun arresecaje maje alluntananno ògne minaccia senza inutile ziarelle (fronzoli)) BRITOS 6 - Nun fove chiammato a ffà straurdinarie, ma se facette ‘nquatto pe cuntrullà cchiú ‘e n’avverzario pure si fove lassato sulo ‘a Zuniga e d’Albiòl(lo). (dô 46° CANNAVARO 5,5 ‘Mmece ‘e difennere spisso ascette palla ô pede tentanno ‘e ‘mpustà ll’azziona, ma menaje cchiú ‘e ‘na vreccia a vvienetenne! Nun ‘o vvo’ capí ca nun tène ‘e piede ‘e Krol!) ZUNIGA 5 Pochi ffessarie ‘nfase difenziva, ma una ‘mpurtante quanno nè isso, nè Albiòl(lo) dètteno ‘na mano a Britòs(so) lassanno sulo a lLusiao; p’ ‘o riesto accompagnaje poco ll'azziona uffenziva (dô 46° ARMERO 6,5 Trasette súbbeto ‘nfullé facennose valé ‘ncopp’â curzia ‘e mancina. Arrivaje spisso ‘ncopp’â linia ‘e fuunno-campo ma po turnaje subbeto arreto pe nun sguarní ‘a linia a cquatto!) INLER 6 - Migliurato a ppietto ‘e ll’urdemu fullé, ma nun riuscette sempe a vvencere ‘a briga (il duello) cu ‘o diretto avverzario. Se spurcaje ‘e troppe ffalte (falli) quanno pruvaje a rricuperà ‘o pallone, pure si quacche vvota fove ll’arbitro a siscarle contro a ca**o ‘e cane (dô 46° DZEMAILI 6,5 Trasette súbbeto ‘nfullé dimustranno granne muvimento;’ncapo a ll’urdemi vinte minute cagnaje spisso passo e arrivaje cchiú ‘e ‘na vota ô tiro) BEHRAMI 7 Nun sulo ‘a solita cegna (grinta) ‘mmiezo ô campo ma cunfermaje ‘e saperce fà pure comme ‘nsertamiente (inserimenti). (dô 78° RADOSEVIC 6 - Comme a ‘na calamita, riuscette a spurcà tanti pallune e ll’abbastajeno pochi minute pe dimustrà ‘e sapé fà ‘o cane ‘e presa pressanno e azzannanno ê feliette (ai polpacci) tutte ll’ avverzarie) CALLEJON 6,5 Jucaje senza stracquarese maje currenno cchiú ‘e tutte quante.Dint’â stessa azziona aspettaje ‘o pallone lla, annante a ttutte quante [pure si ‘e cumpagne spisso nun ‘o vedetteno] e súbbeto doppo turnaje a ddà ‘na mana arreto. (da ll’ 84° NOVOTHNY sv) HAMSIK 6- Cu Higuaín(no) ‘ncampo dô primmo minuto êtt’ ‘a jucà ‘mpusizziona cchiú auta, ma cchiú ‘e quacche bbona jucata nun ne cacciaje. (dô 62° PANDEV 6+ Trasette súbbeto ‘nfullé difennenno palla e facenno saglí ‘e suoje;ô finale, cu Calaiò e Novothny ‘e primma linia se piazzaje cchiú esterno guvernanno sempe ‘a palla a mmestiere.) INSIGNE 7 Ô pprincipio d’ ‘o fullé êsse pututo cercà ‘a porta, ma se ntalliaje preferenno rientrà ‘ncopp’ô pere ‘e dritta;se facette perdunà però servenno ll' ajuda (assist) a bBehrami p’ ‘a rredda d’ ‘o vantaggio. Senza scurdarce po’ ca facette tant’ ati nummere d’auta scola. Âmmo sulo aspettà ca migliora ‘a ‘ntesa cu Callecòn(no) e Higuaín(no). (dô 46° MERTENS 6- Po’ e â dda migliurà: doppo pochi minuti avette ‘na commeta palla ‘a menà ‘mporta, ma ‘e capa, ‘a menaje fora. E cche saciccio! ‘A chiena e ‘a vacante: facette pure cchiú ‘e ‘na fessaria, ma pure quacche bbona jucata; po’ e â dda migliurà! ) HIGUAIN 7 Pe ttutto ‘o primmo aione jucaje cchiú da accabbatore (rifinitore) ca da artigliero, facenno allimmeno tre apreture pe ll’esterne, facenno addecrià ‘o san Paolo. Po finalmente a ll’arrancua s’arricurdaje ‘o mestiero suĵo e signaje ‘a rredda ca tutte aspettavamo e ca ce rijalaje ‘na vittoria mmeretata! (dô 74° CALAIÒ 5,5 ‘o purtiere lle levaje ‘o sfizzio ‘e signà e isso se mettette a ccorrere appriesso a ògne avverzario dimustranno però ‘e nun essere jucatore ‘e serie A.) BENITEZ 7 Nc’è ppoco ‘a fà: cu ‘o tiempo e cu ‘a paglia s’ammaturano ‘e nespole; ‘o Napule vincette e soprattutto divertette ‘o pubblico dànno ‘a ‘mpressione ca ògne fullé ca passa [allimmeno chille quanno po’ schierà bbona parte d’ ‘e pussibili titulare] ‘e jucature riesceno a ddiggerí ll’idee ‘e don Rafele. ‘O primmo aine pe cqualità ‘e juoco fuje meglio d’ ‘o siconno pure si ‘a rredda ‘e Luisao, dinto a ll'unica surtita uffenziva d’ ‘e purtuchesi ‘e tutto ‘o primmo aione, poco mancaje e nun ce ruvinava n’ ata vota ‘a festa. Chiaramente ‘a difesa s’ à dda riggistrà soprattutto ‘ncopp’ê ppalle fremme (inattive), ma – aspettanno ca arrivasse Skretl - da Albiol e da Gamberini (quanno trasette) arrivajeno signale pusitivi. ‘Nfase uffenziva ‘e movimenti so’ ggià bbunarielle , ma à dda migliurà ‘a ‘ntesa soprattutto tra Insigne e ll’ate.Ma ‘ncopp’ a cchesto ‘on Rafele nun po’ fà miracule; pe cunoscerse, pe capirse, pe sturià ‘e muvimente e ‘e ffunzioni (caratteristiche) d’ognuno ce vo’ tiempo; s’ à dda aspettà! Cu ‘o tiempo e cu ‘a paglia s’ammaturano ‘e nespole! l’arbitro CARMINE RUSSO 4 Robba ‘e Nola, nun fove maje casalinco... anze ce siscaje sempe contro e spisso a spruposito; pe mme chisto po’ ffà ‘e tubbette, ‘e don-ciccillo-‘ncruvattate, ô cchiú, ô cchiú ‘e pacchere, ma ll’arbitro proprio no! E cu cchesto ve saluto. E si dDi’ vo’ ce sentimmo ‘a vota ca vène. Staveti bbe’! R. Bracale Brak