NAPOLI – PORTO 1 A 3 (4/8/2013) ‘A VEDETTE ACCUSSÍ

NAPOLI – PORTO 1 A 3 (4/8/2013) ‘A VEDETTE ACCUSSÍ N’ata delusione, guagliú,cu ‘o fullé d’ajere piezzo e ppejo ‘e chillo ‘e ll’atu juorno contro ll’Arsenàl(lo) fenuto ‘mpareggio ddoje a ddoje. Pure ajere ‘o Napule fenette ‘o primmo aione ‘nvantaggio p’uno a zzero, ma po a ll’arrancua sbracaje malamente e mme facette assapurà ‘o ttuosseco d’ ‘a primma scunfitta ‘e ‘sta tempurata... Mo sta’ a ccapí pe sfarma ‘e chi, pe qua’ mutivo e ppe qua’ raggiona. Nun ‘o ssaccio e forze nun ‘o vvoglio manco sapé... Sto’ troppo ‘ntussecato e ‘o calore ce sta mettenno ‘a jonta! E saccio ca accussí comme s’è vvisto ‘a scuatra ‘e Benitèz(zo) po’ ppure perdere... I’ nun ‘a voglio vedé perdere; e don Rafele pe mme doppo d’avé d’avé passato ‘nrassegna tutt’ ‘o mazzo s’à dda chiajetà quacche rinforzo ‘ndifesa e a ll’attacco e à dda levà ‘a miezo cchiú ‘e ‘nu scarparo, facenno jucà ‘e titulare overo pe ffarle misturà (amalgamare). Passammo ê ppaggelle: RAFAEL 6 Facette tutto chello ca se puteva fà, manun avastaje; ajere ce fosseno vulute ‘nu paro ‘e miracule, ma ‘o guaglione nun ‘e ffacette. Arresecaje ‘na sola vota ô primmo aione ascenne nun prutetto a dduvere ‘a Fernandèz(zo), ma dinto a cchella accasione nun succedetteniente. ZUNIGA 5,5 Nun è attrezzato pe ffà ‘o quarto ‘ndifesa e se vedette specie a ll’arrancua , ma ajere raramente facette chello ca sape fà meglio e accompagnaje poco ll'azziona. (dall’84° NOVOTHNY sv) GAMBERINI 6 Facette ‘nu fullé urdinato, senza grossi fessarie penzanno cchiú ô ccuncreto ca a aizà fummo. (dô 62° ALBIOL sv – Trasette dint’ô mumento cchiúdifficultuso, accussí comme era succieso contro a ll’Arsenàl(lo); facette ‘o ppussibbile e nun lle se po’ ddà nisciuna sfarma ‘ncopp’ê rredde ‘ncassate!) FERNANDEZ 4,5 E chisto nn’è n’ato ca comme a bBritòs(so) s’êsse ‘a fà benedicere ‘a ‘nu monaco ricchione; è ttroppo sfurtunato e ppo tène ll’uocchie ‘ncuollo ‘e chillu cestariello ‘e culo’echiummo ca nun ‘o fa fà bbene; ajere doppo quacche bbuono ‘ntervento accummincià a smarrunà pe ttutto ‘o primmo aione nun difennenno ‘o pallone quanno Papiluccio Barbosa ascette e se lassaje piglià ê spalle ‘ncopp’â primma rredda purtuchesa.Pe nun parlà d’ ‘a trasuta a cca**o ‘e cane ‘ncopp’ô pallone quanno prucuraje ll’utobbutto d’ ‘o vantaggio d’ ‘o Porto ‘ncopp’ô cruzzo ‘e Varela cu ‘nu sulo jucatore d’ ‘o Porto dint’â camma contro a ttre difenzure d’’o Napule. DOSSENA 3 Esizziale (disastroso)! S’arranguiaje pe quase tutto ‘o primmo aione, ma a ll’arrancua sbracaje malamente e venette sistematicamente casticato ‘a Varela ca sfunnaje sistematicamente dô lato suĵo. Cumpletaje ‘o ‘nquacchio e ‘a ‘a frittata rijalanno ô Porto ‘o pallone d’ ‘o 3-1. DZEMAILI 5,5 ‘Ncalo a ppietto d’ ‘e pricedente fullé e ‘nfase ‘e trancara ca ‘nfase ‘e ‘mpustazziona e d’ appuojo (supporto) a ll'azziona.’Mparticulare sufferette ‘a vivacezza (imprevedibilità) ‘e Quintero ca partette ‘a luntano. RADOSEVIC 6,5 A pparere mio Una d’’e poche note pusitive d’’o fullé. ‘O guaglione, senza emuzziunarse e ccu granna perzunalità, sfuderaje ‘nu primmo aione cu ‘o curtiello ‘mmiez’ê diente sfodera un primo tempo di grande combattenno e ricuperanno tante e ttanti pallune.S’à dda migliurà ‘nfase prupusitiva. (dô 46° HAMSIK 6,5 Trasette súbbeto ‘nfullé,distribuenno juoco e mmannanno ‘mporta ‘e cumpagne ca però nun n’apprufittajeno) MERTENS 6 Nun è Cagliecòn(no) e sse vedette e nnun ajutaje ‘nfase difenziva.’Ncumpenso assaje bbello ‘o bbassurero (suggerimento) dint’ô stritto pe pPandèv(vo) ca po se jette a abbuscà ‘o ricore d’’o vantaggio napulitano. PANDEV 6,5 ‘Ncapo ‘e diece minute sprecaje n’ accasione sapurita, ma se facette perdunà abbuscànnose e trrasfurmanno ‘o ricore ‘e ll'1-0. ‘Na certezza, sia comme primmo artigliero, ca [accussí comme êvo prunusticato ll’atu juorno] comme fantasista ê spalle d’ ‘o terminale uffenzivo (dô 55° MAGGIO 5 ‘Na sostituzziona inutile e sballata! Nun ce simmo, nun ce simmo, nun ce simmo; nun trasette ‘nfullé;currette tanto pe correre , ma quase sempe a vvacante nun riuscenno maje a ccumbinà cu ‘e cumpagne!) CALLEJÓN 6,5 ‘Ncopp’ a ‘na taga (imbeccata) di Higuaín(no) vedette bbuono ‘a porta , ma Helton lle levaje ‘o sfizzio ‘e signà. Se sacrificaje assaje ‘nfase difenziva pe ddà surrupío (equilibrio) â scuatra. Quanno accumminciaje a calà ne risentette tutta ‘a scuatra (dô 75° BEHRAMI 6 Pruvaje a ddà vivacezza ô centrocampo, ma spisso êtt’ ‘a correre a vvacante) CALAIÒ 5 Nun lle riuscette praticamente niente; spisso scigliette ‘a soluzziona sbagliata e nun riuscette ‘e cupulià (dialogare) cu ‘e cumpagne ‘e reparto (dô 46° HIGUAIN 6 Sempe ‘e stima pecchéstammo ancòra aspettanno ‘e vederlo dô primmo aione; miso ‘ncampo ancòra ‘na vota a ll’arrancua, nun riuscette a ffarese apprezzà. Rijalaje però ‘nu lampo d’ ‘e suoje quanno mettette ‘nterra ‘nu pallone difficultuso, s’avutaje e cunfezziunaje na bbella ajuda pe cCagliecòn(o)) BENITEZ 5,5 E mme dispiace,ma quanno nun se vence e ancòra cchiú quanno se perde ‘a sfarma è ssempe pure d’ ‘o trainèr(ro) ‘O primmo aione fove bastantamente pusitivo cu ‘o Napule ca nchiudette ‘nvantaggio senza maje sufferí rialmente ‘o Porto, però a ppietto d’ ‘o fullé cu ll'Arsenàl(lo) ‘a scuatra aspettaje ll’avverzario e nun dètte maje ‘a ‘mpressione ‘e vulé ‘mpustà ‘o juoco accussí comme vulesse ‘on Rafèle ca è mmeglio si tira ‘e rrecchie ê suoje ca s’ànn’ ‘a scurdà ‘e mazzarri e ànn’ ‘a cagnà sistema. Pe gghionta ‘e ruotolo ‘on Rafele doppo d’ ‘o fullé nun à fatto ‘na chieja e s’ è quase chiammato fora dicenno ca ‘e bbrutte arrancue ‘e ll’urdemi dduje fullé dipennono dâ priparazziona fisica, ma i’ dico ch’ êsse avuto fà ‘nu poco mea culpa, mea culpa pe nun avé fatto trasí a Insigne! E fermammoce cca, speranno ca ‘sta scoppola serve a quaccosa. Si dDi’ vo’ ce sentimmo sàpato ca vene! R.Bracale Brak