CHIEVO – NAPOLI (31/8/13) 2 A 4! ‘A VEDETTE ACCUSSí

CHIEVO – NAPOLI (31/8/13) 2 A 4! ‘A VEDETTE ACCUSSí Che granna suddisfazziona ajere, guagliú! Granna! Ajere ‘o Napule all’ora d’’e pastarelle jette a ffà ‘nu mazzo tanto ô Chievo-verona levannose ‘a cuollo ‘na jastemma menata ca pe ll’anne passate êva fatto d’’a scuatra ‘e quartiere verunese, ‘a bbestia nera d’’o Napule e si nun ricordo male pure ‘e don Rafele ca cu ll’Interre ll’êva pigliate ‘ncopp’ê rrecchie p’’o passato. ‘Mbe’ ajere se levajeno ‘e pprete ‘a dint’ê scarpe sia ‘o Ciuccio ca don Rafele! Mancaje però ‘na siconna suddisfazziona pecché, a ll’ora d’’a tiella [puparuolee!] ‘a scuatra ‘e parrucchino-conte e cchella d’’o pappavallo ‘e Lotito nun se scardajeno ‘e ccorne ll’una cu ll’ata spartennose ‘e sciòccele,ma p’’a siconna vota ‘a lazzio se calaje ‘e mutante facennoselo mettere a cchillu servizzio dâ zoccola janca e nnera. Che peccato! Ma penzammo a nnuje e â bbella vittoria d’ajere. Passammo ê ppaggelle: REINA 5,5 Sfurtunatiello! Nun fove sfarma soja si nisciuno l’avvisaje ca mentre steva facenno ‘o primmo rinvio, Paloschi arrivannole pe ddereto ‘o steva pe ffottere;o forze ll’avvisajeno, ma isso nun sentette pe bbia ca teneva ‘e recchie ‘ntasate ‘e cerriglia (cerume), comme se vedette ‘nnaccasione d’’o primmo pareggio verunese, quanno ‘ncopp’a ‘nu cruzzo d’uno ca sinamparco (comunque) steva, nun veduto ‘a ll’arbitro, ‘nnurzo ‘e cóse (fuorigioco), nun se ‘ntennette cu bBritosso(‘a piglio i’, ‘a piglie tu…’a pigliaje Paloschi ca ‘e ffuttette a ttutt’’e dduje) MAGGIO 4,5 Ma qua’ maggio e mmaggio. A ccomme sta chisto nun è manco frevaro o marzo...Pe mme, me dispiace d’’o ddicere, chisto è arrivato ô capolinea e s’êss’ ‘a sustituí cu quaccuno. Nun me sento ‘e dà cunziglie a don Rafèle, ma me pare ca fósse ora ‘e mannarlo a assettarse ‘ntribbuna vicino a cculo’echiummo! Ajere doppo ‘nu primmo ajone esizziale (disatroso) ca ne sbagliaje cienteuna sia ‘nfase uffenziva[quanno perdette sistematicamente palla], ca difenziva[quanno apprimma rijalaje a Paloschi ‘nu pallone ca ‘o verunese mannaje ‘ncopp’ô palo...e ppo facette ‘a cannavarata sbaglianno a mmarcarlo e cunsentennole ‘o mumentaneo doje a ddoje] cercaje a ll’arrancua ‘e se riscattà..., ma oramaje nun ne tene cchiú e ppe mme s’à dda assolutamente sustituí cu quaccuno ca nun po’ essere Mesto! ALBIOL 6,5 Nun perdette ‘a calma dint’ ô mumento sfavurevole (critico) e provaje sempe a a metterce ‘na pezza pure ê fessarie d’’e cumpagne. Guaglione ‘ntelliggente quanno fove ‘o caso, rallentaje a mmestiere ebbainanno (ripartendo) ‘a reto. BRITOS 5,5 Accumminciaje bbuono riuscenno a sustàtere (impostare) ll'azziona‘a reto, po – forze pe ‘nu malaurato prubblema ‘e cerriglia (cerume) nun se ‘ntennette cu Reina e cuncedette a Paloschi ‘o primmo mumentaneo pareggio... Fósse a isso e a Reina m’’a facesse ‘na cammenata a ll’Ascalesi, o ô san Gennaro o add’’e muonece ‘e san Pascale a cChiaia e m’ ‘e facesse spilà ‘e rrecchie! ZUNIGA 5,5 Ajere ce mettette poca qualità quanno accumpagnaje ll’azziona e ppo, troppo ‘nnammurato d’’o pallone, spisso rallentaje ll’azziona, sufferenno ‘nu poco troppo quanno fove attaccato. Migliuraje ‘nu poco a ll’arrancua..., ma a nnuje ce serve uno ca joca pe nuvanta minute, no pe quarantacinche. E si no, visto ca s’è ‘nnammurato d’’a maglia janca e nnera, se nne jesse a tTorino e ce facesse stà cuiete! INLER 6,5 ‘A chiena e ‘a vacante, anze primma ‘a vacante (‘o primmo ajone, soprattutto ‘nfase ‘e trancara (interdizione) risultaje spisso fora pusizziona) e ppo ‘a chiena (ll’arrancua) quanno jette assulutamente meglio risultanno cchiú tassuso (veloce) e priciso e riuscette a smistà cu sicuranza (sicurezza) ‘ncopp’a ll’ esterni; mettette paura ê verunese cu ‘na bbotta dô lemmeto e dicette ‘a soja dint’â dicisiva azziona d’ ‘o tre a ddoje. BEHRAMI 6 P’’a verità nun fóve ê nivelle (ai livelli) ‘e ll’atalossa d’’o fullé cu ‘o Bologna, ma dint’ ô mumento difficultuso(‘nchiusura d’’o primmo ajone) venette fora riuscenno a sbruglià diverzi situazzioni cumplicate ô lemmeto d’’a camma d’’e cuane. (dô 65° DZEMAILI 6 Se piazzaje annante â difesa e trasette súbbeto ‘int’ô juoco riuscenno a a smistà buono tanti pallune). INSIGNE 7 Eccezziunale dint’ô tu ppe ttu (nell'uno contro uno). Criaje sistematicamente ‘a superiorità nummereca e favurette (propiziò) ll'azziona ca purtaje Marekiaro a signà una d’’e ddoje rredde soje. A ll’ arrancua tutte ll’ azzione cchiú periculose passajeno p’’e piere suĵe e cunfeziunaje ll’ajuda (l'assist) p’’a rredda d’’o Pipita ‘o sfriggiato. HAMSIK 8 Nun se facette prijà e accumminciaje a gghiucà súbbeto guvernanno ‘a palla ‘nfra ‘e linie e lanzanno bbuono ll’attaccante. Cu ‘na botta malegna ‘a luntano sbluccaje ‘o risultato e ppo mettette ‘a firma soja sotto n’ ata rredda ripurtanno anante ‘e suoje. Quatto rredde dinto a dduje fullé... e scusate si è ppoco! (dô74° PANDEV 6 ‘e stima) CALLEJON 7 ‘Nfra ‘e meglie.Pulitelico (prezioso) dinto ê ddoje fase ‘e juoco, se facette truvà ô mumento justo ô posto justo[sotto porta] pe cunchiudere pusitivamente ‘nu gruosso pasiglio d’’o Sfriggiato e realizzaje ‘a siconda rredda dinto a dduje fullé. Currette comme a ‘nu pazzo annante e arreto nsi’ â fine. Pe don Rafele è uno ca nun se ne po’ ffà a mmeno; e ave raggione ‘on Rafele, ave raggione! A uno comme a cchisto comme ‘o lieve? HIGUAIN 7,5 Cu ‘a faccia sfriggiata, ma ‘o Pipita facette tutto ‘o duvere suĵo e ppure ‘e cchiú!Servette n’ajuda spettaculare p’ ‘o mumentaneo ddoje a uno ‘e Cagliecòn(no), mannaje ‘e poco a llato ‘na palla ch’êsse pututo essere chella d’’o tre a uno, ma po spilaje ‘a sciampagna d’’a primma rredda soja ‘ncampiunato chiudenno ‘o fullé cu n'azzione terca (caparbia). Assicuraje pure cuntinue jucate d’auta scola facenno respirà ‘e suoje (da ll’84° ARMERO 6 ‘e stima) Benitez 7 Doppo d’avé vattuto ‘o Bologna ajere don Rafele struncaje n’ata bestia nera d’’e cuone e ssoja. ‘O Napule accumminciaje cu cchella perzunalità ch’isso pretenne dê suoje e ppareva ca tutto putesse jí cagliatamente (con tranquillità), ma ‘ntrasatte turnajeno ‘e fantaseme d’’o ppassato e, ppe ddoje vote ‘nvantaggio, ‘o Napule se facette arrivà pe ddoje vote pe ddoje fessarie d’’a difesa, arresecanno ‘e arruvinà tutto cosa.A ll’arrancua però ‘o Napule venette fora e l’atalossa d’’e cuane fove desburdante (straripante) e ce alliccajemo ‘e bbaffe. arbitro VALERI 5 Nun me piacette, nè isso nè ‘e cullabburatore suĵe!Niente ‘e particulare,ma nun le perdono ‘e nun avé veduto ca chillo ca facette ‘o cruzzo ca permettette ‘a primma rredda ‘e Paloschi, steva ‘nnurzo ‘e cóse..., comme nun le perdono ca ‘stu libbero prufessiunista (ma nun se sape ‘e che...) rumano siscaje sempe, pe partito pigliato, contro ô Napule caputianno ‘e ffalte (i falli)e sparagnaje cchiú ‘e nu cartellino jalizzo ê verunese. Ma sinamparco (comunque) facette palla corta pecché ‘o Napule vincette ô stesso schiattanno ‘ncuorpo ô chievo cu quatto pallette, quatto e piazzannoce ancora ‘ntesta â crassifica ‘nzieme a cchella zoccola janca e nnera ca ajere facette ‘o vallo ‘ncopp’â mmunnezza cu ‘a scuatra d’’o pappavallo ‘e lotito ca chist’anno po’ ppure jí a fferní ‘nseria B! Sinamparco(comunque) ‘na granna scuatra cu ‘nu granne juoco! S’à dda sulo migliurà ‘a ‘ntesa e ppo tutto va p’’o mmeglio.Sulo ‘ndifesa s’ à dda ancòra accuncià coccosa visto ca nè mMaggio nè zZuniga songo abbituati a rientrà súbbeto. Zuniga se ne vo’ jí? E se nne jesse, ca ‘a Maronna ll’accumpagna! E ccu Maggio, ll’aggiu ditto, oramaje nun ce sta niente ‘a fà: è arrivato ô capolinea, anze ô deposito ‘e Marianella!!!! Sperammo ca arrivasse ‘nu difenzore ‘e dritta accussí ‘on Rafele Benitèz(zo) nn’ ‘o manna pure a isso ‘ntribbuna a tené cumpagnia a culo’echiummo. Ma p’’o riesto ave raggione don Rafele: SENZA PRESSA, SENZA PAURA, SENZA CASSURA (pausa). E fermammoce cca.Dummeneca ca vene nun se joca e ppirciò si dDi’ vo’ ce sentimmo ‘nfra ‘na quinnicina ‘e juorne speranno ca ‘o Napule turnasse a vvencere ‘ncasa contro n’atu bbrutto accunto (cliente), ll’Atalanta! Staveti bbe’. R.Bracale Brak